వాలంటైన్స్ డే స్పెషల్ - ఈ ప్రజాప్రతినిధులు ప్రేమకు బందీలే

Valentines Day 2024 : ప్రేమ అనేది రెండు అక్షరాలకే పరిమితమైంది కాదు. హృదయాల వేదికగా సాగే జ్ఞాపకాల మజిలీ. ప్రేమతో ఇతరుల మనసులు గెలుచుకోవడమే గొప్ప. అలాంటి అపురూపమైన ప్రేమకు దాసులు కానివారు ఎవరుంటారు. ఎవరో ఒకరు ఎక్కడో అక్కడ ప్రేమను ఆస్వాదించే ఉంటారు. అలాంటి అనుభూతిలో తమను తాము మర్చిపోయి కాలం గడపిన వారు ఉన్నారు.

Valentines Day 2024 :ప్రేమ ఎన్నో భావోద్వేగాల కలయిక. రెండు క్షణాలతో అంతమయ్యేది అంతకన్నా కాదు. ఒక్కమాటలో చెప్పాలంటే ఏ బంధమూలేని తొలి సంబంధమే ప్రేమ. అది ఒక అనిర్వచనీయ అనుభూతి. ప్రేమను నిజంగా మనసుపెట్టి చూడగలిగితే, మనస్పూర్తిగా ఆస్వాదించగలిగితే ఆది, అంతం లేని అమరానందమే. రెండు హృదయాల్లో సెలయేటిలా పారుతుంది. అలసట తీర్చే చిరుగాలిలా మారుతుంది.

ఒకరి మనసు మరొకరు అర్థం చేసుకున్నపుడు ప్రేమే జీవరాగమవుతుంది. ఆ ప్రేమే జ్ఞానయోగమూ అవుతుంది. అలాంటి ప్రేమకు మన ప్రజాప్రతినిధులూ బందిలే. అందరి మాదిరిగానే వారి ప్రేమ వ్యవహారంలోనూ అనేక మలుపులున్నాయి. నేడు ప్రేమికుల దినోత్సవం (Valentines Day 2024) సందర్భంగా వారి ప్రేమ ప్రయాణం ఎలా మొదలై ఏవిధంగా సుఖాంతమైందో తెలుసుకుందాం.

ప్రజాప్రతినిధులు అంటే నిత్యం సభల్లో సమావేశాల్లో, ఎన్నికల ప్రచారాల్లో గంభీరంగా కనిపిస్తుంటారు. కానీ వారి వ్యక్తిగత జీవితంలోకి తరచిచూస్తే మాత్రం మరో కోణం దాగి ఉంటుంది. వారి లోలోపల ప్రేమికులు దాగి ఉన్నాడని తెలుస్తుంది. పలువురు ఎమ్మెల్యేలూ ప్రేమను జయించిన వారే. ప్రస్తుతం రాజకీయాల్లో బీజీగా ఉన్నపట్టికి వారంతా తమ జీవితభాగస్వాములకు ప్రేమను పంచుతూ ఆదర్శంగా నిలుస్తున్నారు.

బోటులో పరిచయం పెళ్లితో ఒకరికొకరం :సీఎం రేవంత్‌రెడ్డి (CM Revanth Reddy) తాను చదువుకునే రోజుల్లో ప్రేమించిన గీతారెడ్డినే వివాహం చేసుకున్నారు. వీరిద్దరి ప్రేమ ప్రయాణం ఓ బోటులో మొదలైంది. ఇంటర్‌ చదివే రోజుల్లో నాగార్జునసాగర్‌ వెళ్లిన రేవంత్‌ బోటులో గీతారెడ్డిని తొలిసారి చూశారు. ఆమె కుటుంబ వివరాలు తెలుసుకునే క్రమంలో మొదలైన వారి పరిచయం తర్వాత స్నేహంగా మారింది. రేవంత్‌ స్వయంగా గ్రీటింగ్‌కార్డులు తయారుచేసి మరీ ఆమెకు పంపించేవారు. క్రమంగా ఇద్దరి మధ్య ప్రేమ మొగ్గ తొడిగింది.

రేవంత్‌రెడ్డి దంపతులు

CM Revanth Reddy Love Story : మొదట రేవంత్‌రెడ్డి తన ప్రేమను గీతారెడ్డికి తెలియజేశారు. ఆయన వ్యక్తిత్వం, ముక్కుసూటితనం నచ్చి ఆమె అంగీకరించారు. కొన్నాళ్ల తర్వాత వ్యవహారం పెద్దల వరకూ వెళ్లింది. కుటుంబ సభ్యులు ఆమెను కొన్నాళ్లు దూరంగా పంపారు. కొంతకాలం ఎడబాటు అనంతరం రేవంత్‌రెడ్డి నేరుగా గీతారెడ్డి తరఫు పెద్దలతో మాట్లాడి తన ప్రేమను గెలిపించుకున్నారు. ఇరు కుటుంబాల అంగీకారంతో 1992లో వైవాహిక జీవితంలోకి అడుగుపెట్టారు.

భట్టి విక్రమార్క దంపతులు

విశ్వవిద్యాలయంలో మొగ్గ తొడిగిన ప్రేమ :డిప్యూటీ సీఎం భట్టి విక్రమార్కది (Bhatti Vikramarka) అందమైన ప్రేమకథే. ఆయన హైదరాబాద్‌ కేంద్రీయ విశ్వవిద్యాలయంలో ఎంఏ హిస్టరీ చదువుతుండగా, అదే యూనివర్సిటీలో ప్రవేశం కోసం వచ్చిన నందినితో పరిచయం ఏర్పడింది. వారిది హైదరాబాద్‌లో స్థిరపడిన ఉత్తరాది సంప్రదాయ కుటుంబం. మొదటిచూపులోనే ఆమెను ఇష్టపడిన భట్టి గుండె గుడిలో ప్రతిష్ఠించుకున్నారు. నందిని విశ్వవిద్యాలయంలో చేరకపోయినా, ఆమెతో స్నేహాన్ని కొనసాగించారు. కాలక్రమంలో అదికాస్తా ప్రేమగా మారగా ఇరు కుటుంబాలను ఒప్పించి వివాహబంధంలోకి అడుగుపెట్టారు.

దామోదర రాజనర్సింహ దంపతులు

తొలి చూపులోనే ప్రేమలో పడ్డారు : వైద్యారోగ్యశాఖ మంత్రి దామోదర రాజనర్సింహది తొలిచూపులోనే ప్రేమలో పడ్డారు. ఇంజినీరింగ్‌ చదువుతున్న సమయంలో ఆయన నిజామాబాద్‌లో స్నేహితుని వివాహానికి వెళ్లారు. అక్కడ పెళ్లి కుమార్తె తరఫు బంధువు పద్మినీరెడ్డిని చూసి ఇష్టపడ్డారు. కొన్నాళ్ల తర్వాత తన ప్రేమను తెలియజేయగా ఆమె అందుకు అంగీకరించారు. తర్వాత వ్యవహారం పెద్దల వరకూ వెళ్లింది. చిన్నచిన్న గొడవలు తలెత్తాయి. చివరికి స్నేహితుని సహకారంతో ఇద్దరూ 1985లో పెండ్లి చేసుకోగా పెద్దలు ఆశీర్వదించారు.

కొండా మురళి దంపతులు

బీకాంలో మొదలైన కొండా దంపతుల ప్రణయం : దేవాదాయశాఖ మంత్రి కొండా సురేఖ, మురళీధర్‌రావులదీ ప్రేమ వివాహమే. మురళి వరంగల్‌ ఎల్బీ కళాశాలలో బీకాం చదువున్న రోజుల్లో సురేఖతో పరిచయమైంది. స్నేహబంధం చిగురించింది. అనంతరం దాన్ని ప్రేమగా మలుచుకున్న ఆయన తన అభిప్రాయాన్ని ఆమెకు తెలియజేశారు. ఆ తర్వాత ఒకరినొకరు ఇష్టపడ్డారు. 1987లో సురేఖను తిరుపతి తీసుకెళ్లి వివాహం చేసుకున్నారు. వీరే కాకుండా చెన్నూరు ఎమ్మెల్యే గడ్డం వివేకానంద-సరోజ, జనగామ ఎమ్మెల్యే పల్లా రాజేశ్వర్‌రెడ్డి-నీలిమ, బెల్లంపల్లి ఎమ్మెల్యే గడ్డం వినోద్‌-రమ, సత్తుపల్లి ఎమ్మెల్యే రాగమయి-దయానంద్‌, నకిరేకల్‌ ఎమ్మెల్యే వేముల వీరేశం-నీలిమ, దంపతులవీ ప్రేమ వివాహాలే.