TTD Chairman Latest Tweet : తిరుమల తిరుపతి దేవస్థానంలోని ప్రశాంతతను దెబ్బతీసేలా కొండపై ఎవరు రాజకీయ పరంగా వ్యాఖ్యలు చేసినా సహించేది లేదని టీటీడీ ఛైర్మన్ బీఆర్‌ నాయుడు హెచ్చరించారు. ఈ మేరకు ఆయన తన ‘ఎక్స్‌’ ఖాతాలో ఒక ట్వీట్ పెట్టారు. తిరుమల పవిత్ర క్షేత్రమని ఇది రాజకీయ వేదిక కాదన్నారు. ఎవరు రాజకీయంగా తిరుమలను వేదికగా చేసుకున్నా చర్యలు తప్పవని గతంలోనే హెచ్చరించడం జరిగిందని తెలిపారు.
చర్యలకు ఆదేశిస్తున్నాం : తిరుమల పవిత్రతను కాపాడే విషయంలో వెనుకడుగు వేయకూడదనే మా టీటీడీ పాలకమండలి తొలి సమావేశంలోనే ప్రత్యేక ఎజెండాగా ఈ విషయాన్ని చర్చించి నిర్ణయం తీసుకుందని వివరించారు. ఎంతటివారైనా సరే తిరుమల కొండపై రాజకీయ వ్యాఖ్యలు చేస్తే ఉపేక్షించేదేలేదని స్పష్టం చేశారు. తెలంగాణకు చెందిన మాజీ మంత్రి శ్రీనివాస్గౌడ్ తిరుమల దేవస్థానం వేదికగా రాజకీయ వ్యాఖ్యలు చేయడాన్ని ఉల్లంఘన కింద పరిగణిస్తున్నామని అన్నారు. ఆయనపై చర్యలకు ఆదేశిస్తున్నట్లు టీటీడీ ఛైర్మన్ వెల్లడించారు. తెలంగాణ భక్తులపై వివక్ష చూపుతున్నారనే వ్యాఖ్యలు చేసిన నేపథ్యంలో తిరుమల తిరుపతి దేవస్థానం ఛైర్మన్ ఈ విధంగా స్పందించారు.