TSRTC Good News for Passengers : తెలంగాణ ఆర్టీసీ ప్రయాణికులకు మరో శుభవార్త చెప్పింది. ఎప్పటికప్పుడు సరికొత్త ఆఫర్లను ప్రకటిస్తూ ప్రయాణికులను ఆకర్షించే టీఎస్ఆర్టీసీ.. తాజాగా మరో బంపరాఫర్ ప్రకటించింది. ఇది ఎక్స్ప్రెస్ మంత్లీ సీజన్ టికెట్(MST) పాస్ తీసుకునే వారికి సూపర్ న్యూస్ చెప్పుకోవచ్చు. అదేంటంటే.. ఎక్స్ప్రెస్ MST పాస్ ఉన్నవారు ఇకపై డీలక్స్ బస్సుల్లో కూడా ప్రయాణించే వెసులుబాటును కల్పిస్తున్నట్లుటీఎస్ఆర్టీసీ(TSRTC) ఎండీ వీసీ సజ్జనార్ ట్విట్టర్లో పేర్కొన్నారు. అయితే, ఇందుకోసం మళ్లీ సపరేట్గా ఏదైనా టికెట్ తీసుకోవాలా? లేదంటే ఎక్స్ప్రెస్ MST పాస్ సరిపోతుందా? ఎంత దూరం వరకు ప్రయాణించవచ్చు? అనే వివరాలు ఈ స్టోరీలో తెలుసుకుందాం.
తెలంగాణ ఆర్టీసీ ఎండీగా బాధ్యతలు స్వీకరించినప్పటినుంచి వీసీ సజ్జనార్.. ఆర్టీసీ ఆదాయాన్ని పెంచేందుకు ప్రతీసారి ఏదొక సరికొత్త ఆఫర్ను ప్రకటిస్తున్నారు. ఈ క్రమంలోనే తాజాగా ట్విట్టర్లో ఎక్స్ప్రెస్ మంత్లీ సీజన్ టికెట్ ఉన్న ప్రయాణికులకు అదిరిపోయే ఆఫర్ ప్రకటించారు. MST పాస్ కలిగిన వారు రూ.20 కాంబినేషన్ టికెట్ తీసుకొని డీలక్స్ బస్సులోనూ ప్రయాణించవచ్చని ఆయన పేర్కొన్నారు. అయితే, ఇక్కడ గుర్తుంచుకోవాల్సిన ముఖ్యమైన విషయమేమిటంటే.. ఈ ఆఫర్ ఎక్స్ప్రెస్ మంత్లీ సీజన్ టికెట్(MST) పాస్ ఉన్నవారికి మాత్రమే వర్తిస్తుందని ఆర్టీసీ ఎండీ సజ్జనార్ స్పష్టం చేశారు. కాబట్టి ఎంఎస్టీ పాస్ ఉన్న ప్రయాణికులు ఈ కాంబినేషన్ టికెట్ ఫెసిలిటీని సద్వినియోగం చేసుకొని డీలక్స్ బస్సులో ప్రయాణించాలని సజ్జనార్ సూచించారు.