గారాబంగా చూసుకోవాల్సిన నానమ్మే మనువడిని అమ్మేసింది - Grandma sold Her Grandson

Grandma sold Her Grandson in Khammam Telangana : ఖమ్మం జిల్లాలో సొంత మనవడినే అమ్మేసింది నాయనమ్మ. మనవడిని దత్తత పేరుతో హై డ్రామాకు తెరతీసి అమ్మకానికి పెట్టింది. ఈ వ్యవహారం పోలీసుస్టేషన్‌కు చేరడంతో బిడ్డ తల్లి ఒడికి చేరింది.

Grandma sold Her Grandson in Khammam :తమ మనువళ్లను ఎక్కువ ప్రేమ చేస్తుంటారు నానమ్మలు, అమ్మమ్మలు. చిన్న పిల్లల బుడిబుడి నడకలు, తెలిసి తెలియని మాటలు విని సంబరపడుతుంటారు. మనవడు, మనవరాల్లు అంటే వారికి మక్కువ ఎక్కువ. వారిని ఎంతో గారాబంగా చూసుకుంటూ వాళ్లతో కాలం గడేపేస్తుంటారు. పిల్లలకు కూడా నానమ్మ, అమ్మమ్మ అంటే ఎంతో ఇష్టం ఉంటుంది. కానీ ఇక్కడ మాత్రం ఓ నానమ్మ మనవడు అన్న కనికరం లేకుండా అమ్మకానికి పెట్టేసింది. ఈ ఘటన ఖమ్మం జిల్లాలో చోటు చేసుకుంది

మనువడిన అమ్మేసిన నానమ్మ :ఖమ్మం జిల్లా నిజాం పేటకు చెందిన ఓ యువ జంట నిండు నూరేళ్లు కలిసి ఉందామని ప్రేమించి పెళ్లి చేసుకున్నారు. వారి ప్రేమకు ప్రతిఫలంగా ఒక బాబు పుట్టాడు. కానీ తాము ఒకటి తలిస్తే దైవం ఒకటి తలచినట్లు బాబు పుట్టిన నెల రోజులకే ఓ రోడ్డు ప్రమాదంలో భర్త చనిపోయాడు. దీంతో బాబును పెట్టుకుని పుట్టింటికి వచ్చిన ఆమె చిన్న పనులు చేసుకుంటూ జీవిస్తోంది. బాబుకు ప్రస్తుతం 21 నెలలు. కొడుకు లేని లోటును మనవడిలో చూసుకుంటానని బాబును దత్తతకు ఇవ్వాలని అత్త కోడలితో చెప్పింది. చిన్న వయస్సు అయినందున వేరే పెళ్లి చేసుకోవచ్చని మాయమాటలు చెప్పింది.

Grandma sold Her Grandson : కోడలిని ఒప్పించి అబ్బాయిని పెంచి పెద్దవాడిని చేస్తానని నమ్మించేలా చేసింది. చనిపోయిన కొడుకును మనవడి రూపంలో చూసుకుంటానని నచ్చ చెప్పింది. దీంతో అత్త మాటలు నమ్మిన కోడలు తన బిడ్డను అప్పగించింది. కానీ అత్త డబ్బులకు ఆశపడి సొంత మనువడినే అమ్మేసింది. కొన్ని రోజులకే బాబును నాయనమ్మ హైదరాబాద్‌ వాళ్లకు అమ్మినట్లు తెలుసుకుని పోలీసు ఠాణా మెట్లెక్కింది ఆ తల్లి. పోలీసులు బాబును తీసుకురావడంతో చిన్నారి కోసం కన్నీరు మున్నీరుగా విలపించింది. బాబును ఒళ్లో కూర్చోబెట్టుకుని ఆనందబాష్పాలు కార్చింది. చివరకు చిన్నారిని శిశు సంరక్షణ కేంద్రానికి తరలించటంతో ఖమ్మం ఒకటో పోలీసు ఠాణా వద్ద ఉద్వేగభరిత వాతావరణం నెలకొంది.