10 నెలల చిన్నారికి అరుదైన వ్యాధి - ఇంజెక్షన్​కు రూ.17 కోట్లు - ఆపన్న హస్తం కోసం తల్లిదండ్రుల ఎదురుచూపులు - Ten Months Child Suffering

Child Suffering With Spinal muscular Diseases In Warangal: బుడిబుడి అడుగులతో ఇంట్లో అల్లరి చేయాల్సిన బుజ్జిపాప అరుదైన వ్యాధితో ఉలుకుపలుకు లేకుండా మంచం పట్టింది. పాపకు చిన్న దెబ్బతగిలినా అల్లాడిపోయే ఆ తల్లిదండ్రులు బిడ్డకు ఆయుష్షు రెండు సంవత్సరాలు మాత్రమే అని తెలిసి ఆ కన్న పేగు తల్లడిల్లిపోతుంది. పాప బతకాలంటే రూ. 17 కోట్ల ఇంజక్షన్‌ ఇవ్వాలని వైద్యులు చెప్పడంతో కన్నవారి గుండె ఆగినంత పనైంది. ఓ వైపు చావుబతుకుల్లో చిన్నారి ఇంకోవైపు రూ.17 కోట్లు ఎవర్ని అడగాలి ఏం చేయాలో పాలుపోక నిస్సహాయ స్థితిలో విలపిస్తున్నారు ఆ చిన్నారి తల్లిదండ్రులు.

Ten Months Child Suffering With Spinal muscular Diseases :ముద్దులొలికే ఈ చిన్నారి పేరు వైష్ణవి. వయస్సు పది నెలలు. వరంగల్ ఎంజీఎం ఆసుపత్రిలో పిల్లల వార్డులోని బెడ్ పై అమాయకంగా ఆడుకుంటున్న ఈ పసికందు ఆయువు రూ.17 కోట్లతో ముడిపడి ఉంది. బుడి బుడి నడకలతో సందడి చేస్తూ బోసినవ్వులు ఒలకబోసే పసిప్రాయానికి అరుదైన వ్యాధి సోకింది.

జనగామలోని అంబేడ్కర్​నగర్‌కు చెందిన ప్రశాంత్, సంపూర్ణల గారాల పట్టి వైష్ణవి. పాప పుట్టగానే సాక్షాత్తు మహాలక్ష్మే పుట్టిందని కుటుంబ సభ్యులు సంబరపడ్డారు. కానీ పుట్టి నాలుగు నెలల్లో పాపలో హుషారు లోపించడం, బొర్లాపడకపోవడంతో అనుమానించిన తల్లిదండ్రులు స్ధానికంగా ఉన్న ఆసుపత్రికి తీసుకెళ్లారు. అక్కడున్న వైద్యుల సూచన మేరకు హైదరాబాద్‌లోని ఓ ప్రైవేటు ఆసుపత్రి వైద్యులకు చూపించగా పిల్లల్లో అరుదుగా వచ్చే స్పైనల్ మస్కులర్ అట్రోఫీ వ్యాధి అని నిర్ధారించారు. పాప బతకాలంటే విదేశాల నుంచి ఇంజెక్షన్ తెప్పించాలని దాని ఖరీదు 17 కోట్లవుతుందని వైద్యులు తేల్చి చెప్పారు.

పాపకు రెండేళ్లలోపే ఇంజెక్షన్ చేయాలని లేదంటే బతకదని వైద్యులు చెప్పిన మాటలు విని ఈ నిరుపేద తల్లిదండ్రులు కుప్పకూలిపోయారు. కేవలం 12 వేల రూపాయల ఆదాయంతో బతికే వీరికి రూ.17 కోట్ల రూపాయలు తేవడం శక్తికి మించిన భారమే. ప్రస్తుతం పాపకు న్యుమోనియా కూడా సోకడంతో ఎంజీఎంలోని పిల్లల వార్డులో ఉంచారు. పది నెలల క్రితమే ఊపిరి పోసుకున్న ఈ చిన్నారి ఇప్పుడు ఊపిరి తీసుకోవడానికి కష్టపడుతోంది.

ప్రభుత్వం కానీ దాతలు కాని ఆర్థిక సాయం చేసి తమను ఆదుకోవాలని చిన్నారి తల్లిదండ్రులకు కన్నిటీతో వేడుకుంటున్నారు. రోజులు గడస్తున్న కొద్దీ పాప మృత్యువుకు దగ్గరవుతుండడంతో ఈ తల్లిదండ్రులు వేదనకు అంతు లేకుండా పోతోంది. రూ.17 కోట్ల రూపాయల సాయం అందించే దాతల కోసం ఆశగా ఆతృతగా ఎదురు చూస్తున్నారు.

"మా పాప పేరు వైష్ణవి. పాపకు పది నెలలు. పాప ఆరోగ్యంతో భాదపడుతుండటంతో ఎంజీఎం ఆస్పత్రికి తీసుకొని వెళ్లాం. పాప అరుదైన వ్యాధితో భాదపడుతుందని తెలిపారు. పాప బతకాలంటే రూ. 17 కోట్ల ఇంజక్షన్‌ ఇవ్వాలని వైద్యులు తెలిపారు. నాకు 12,000వేల జీతంతో కుటుంబం గడుస్తుంది. చిన్నారి వైద్యం కోసం ఎవరైనా దాతలు, ప్రభుత్వం ఆదుకోవాలని వేడుకుంటున్నాం"_ చిన్నారి తల్లిదండ్రులు