ఆర్టీసీలో 100 శాతం దాటుతోన్న ఆక్యుపెన్సీ - రిపేర్ల కోసం షెడ్లకు క్యూ కడుతోన్న బస్సులు

Telangana RTC Buses Crossing 100 percent OR Rate : ఒకప్పుడు ఆర్టీసీ బస్సుల్లో 65-68 శాతం ఆక్యుపెన్సీ రేషియో ఉంటే, మహాలక్ష్మి పథకం తర్వాత అది 100 శాతానికి మించిపోతోంది. ఇలా కెపాసిటీ మించి బస్సులో ప్రయాణించడం వల్ల బస్సులు తుక్కుగా మారుతున్నాయి.

Telangana RTC Buses Crossing 100 percent OR Rate : ఆర్టీసీ బస్సులు ప్రయాణికులతో కిటకిటలాడుతున్నాయి. మహాలక్ష్మి పథకంతో ఈ రద్దీ మరింత ఎక్కువైంది. ఈ పథకానికి ముందు బస్సుల్లో సీట్ల భర్తీ నిష్పత్తిని తెలిపే ఓఆర్‌ (ఆక్యుపెన్సీ రేషియో) 65-68 శాతం ఉంటే, ఇప్పుడు తరచూ 100 శాతం దాటేస్తోంది. ఫిబ్రవరి 19వ తేదీన (సోమవారం) ఏకంగా 114.28 శాతం ఓఆర్‌ నమోదవ్వగా, 20న 108.38 శాతం నమోదైంది.

సమ్మక్క సారలమ్మ జాతర సందర్భంగా బస్సుల్లో రద్దీ మరింత పెరిగింది. గతంలో 8 లక్షల కి.మీ దాటిన బస్సుల్ని తుక్కుగా మార్చేవారు. ఇప్పుడు 14-15 లక్షల కి.మీ దాటినా వాటిని నడిపిస్తున్నారు. పాత బస్సులు పలుసార్లు బ్రేక్‌డౌన్లు అవుతున్నాయి. నిర్వహణ సమస్యలు సైతం అధికం కావడంతో మెకానిక్‌లు తీవ్రంగా శ్రమిస్తున్నారని ఆర్టీసీ కార్మికులు చెబుతున్నారు. కెపాసిటీ పెరగడం వల్ల ఓవర్​ వెయిట్​ అయ్యి బస్సులు తుక్కు పడుతున్నాయి.

100 Percent Occupancy in RTC Buses :పాత బస్సుల స్థానంలో కొత్తవి ప్రవేశపెట్టడంతో పాటు పెరిగిన రద్దీకి తగ్గట్లు అదనపు బస్సులను అందుబాటులోకి తీసుకురావాలి. అప్పుడప్పుడు కొత్త బస్సులు వస్తున్నా, మొత్తం బస్సులతో పోలిస్తే వాటి సంఖ్య అరకొరగా మాత్రమే ఉంటుంది. ఆర్టీసీలో రాష్ట్రవ్యాప్తంగా అద్దె వాటితో కలిపి 9,200 బస్సులు నడుస్తున్నాయి. వీటిలో ఐదు వేల బస్సులకు పైగా పాతవే. అద్దె బస్సులను ఒప్పందం ముగిశాక పక్కన పెడుతున్న ఆర్టీసీ, సొంత బస్సులను మాత్రం ఆర్థిక ఇబ్బందుల కారణంగా కొత్తవి తీసుకురాలేకపోతుంది.

ఇప్పటికే భారీ అప్పుల్లో ఉన్న ఆర్టీసీ అతి కష్టం మీద రూ.1000 కోట్ల రుణాల్ని తీసుకుంది. గతంతో పోలిస్తే ప్రయాణికుల సంఖ్య పెరిగినా, నేరుగా వచ్చే ఆదాయం రూ.450 కోట్ల నుంచి రూ.270 కోట్లకు తగ్గినట్లు తెలుస్తోంది. మహాలక్ష్మి పథకం 'జీరో' టికెట్ల (Zero Tickets) కింద ఆర్టీసీకి నెలకు రూ.300 కోట్లు ఇస్తున్నట్లు ప్రభుత్వం తెలిపింది. అయితే అప్పు ఇచ్చే బ్యాంకులు మాత్రం ఆర్టీసీకి ప్రయాణికుల నుంచి నేరుగా వచ్చే ఆదాయాన్ని మాత్రమే పరిగణనలోకి తీసుకుంటున్నాయన్న అభిప్రాయాలు వ్యక్తమవుతున్నట్లు తెలుస్తోంది.

బస్సుల బ్రేక్‌ సిస్టమ్‌ నిర్వహణ సక్రమంగా చేయాలంటూ ఆర్టీసీ యాజమాన్యం (RTC) అధికారులకు ఇటీవల ఓ సర్క్యులర్‌ ఇచ్చింది. నిర్వహణ నిర్లక్ష్యం కారణంగా కొన్ని డిపోల్లో జరిగిన ప్రమాదాలను దృష్టాంతంగా చూపించి వివరించింది. బ్రేక్‌ లైనర్ల నిర్వహణకు సంబంధించి మార్గదర్శకాల్ని ఆ సర్క్యులర్‌లో స్పష్టంగా వివరణ ఇచ్చింది. ప్రమాదాల నిర్వహణ, ఆపద సమయంలో ఎలా స్పందించాలన్న విషయంపై డ్రైవర్లకు అవగాహన కల్పించాలని ఆదేశాలు ఇచ్చింది.