Published : Jun 2, 2024, 9:57 AM IST
|Updated : Jun 2, 2024, 8:07 PM IST
LIVE FEED
జయహే జయహే తెలంగాణ పూర్తి గీతం ఆవిష్కరణ
ట్యాంక్‌బండ్‌పై 5 వేల మంది ట్రైనీ పోలీసులతో జయ జయహే తెలంగాణ రాష్ట్ర గీతానికి ఫ్లాగ్ వాక్ చేస్తున్నారు. ట్యాంక్‌బండ్‌పై మిరుమిట్లు గొలిపే లేజర్‌ షో, బాణసంచా మెరుపులు ఆకట్టుకున్నాయి. వర్షంలో సైతం పోలీస్‌ వాక్‌ను నిర్వహిస్తున్నారు.
ట్యాంక్బండ్ పరిసరాల్లో కురుస్తున్న వర్షం
ట్యాంక్బండ్ పరిసరాల్లో వర్షం కురుస్తోంది. వర్షంలోనే కళా బృందాల ప్రదర్శన కొనసాగుతోంది. తెలంగాణకు చెందిన 17 కళలను ప్రదర్శిస్తున్నారు. పదేళ్ల పండుగను చూసేందుకు భారీగా జనం తరలివచ్చారు.
ట్యాంక్‌బండ్‌పై 5 వేల మంది ట్రైనీ పోలీసులతో ఫ్లాగ్‌వాక్
సీఎం రేవంత్‌రెడ్డి, గవర్నర్ రాధాకృష్ణన్ తదితరులు ట్యాంక్‌బండ్‌పై ఏర్పాటు చేసిన స్టాళ్లను పరిశీలిస్తున్నారు. తెలంగాణ సంస్కృతిని చాటిచెప్పే 17 కళలను ప్రదర్శనకు ఉంచారు. మరికాసేపట్లో ట్యాంక్‌బండ్‌పై 5 వేల మంది ట్రైనీ పోలీసులతో ఫ్లాగ్‌వాక్ నిర్వహించనున్నారు. జయ జయహే తెలంగాణ రాష్ట్ర గీతానికి ఫ్లాగ్ వాక్ చేయనున్నారు. పదేళ్ల పండుగను చూడటానికి తరలివచ్చిన ప్రజలతో ట్యాంక్బండ్ జనసంద్రంగా మారింది.
ట్యాంక్‌బండ్‌పై తెలంగాణ ఆవిర్భావ సంబురాలు ప్రారంభం
'పదేళ్ల పండుగ' పేరుతో ఘనంగా రాష్ట్ర అవతరణ వేడుకలను సీఎం రేవంత్, మంత్రులు ప్రారంభించారు. అవతరణ వేడుకల్లో గవర్నర్ రాధాకృష్ణన్ సహా తదితరులు పాల్గొన్నారు. రాష్ట్ర అవతరణ వేడుకల్లో భాగంగా ట్యాంక్‌బండ్‌పై ప్రత్యేక కార్యక్రమాలు ఏర్పాటు చేశారు. తెలంగాణ చరిత్ర, వైభవాన్ని చాటేలా కళారూపాలను ప్రదర్శిస్తున్నారు. వివిధ కళారూపాల ప్రదర్శన ఆకట్టుకుంటున్నాయి.
కాంగ్రెస్కు ప్రత్యామ్నాయం బీఆర్ఎస్నే : కేసీఆర్
లైన్మెన్లను హరీశ్రావు పని చేయనివ్వట్లేదని సీఎం రేవంత్ రెడ్డి అంటున్నారని కేసీఆర్ ధ్వజమెత్తారు. అసలు ముఖ్యమంత్రి హరీశ్రావా? రేవంత్ రెడ్డా?. ప్రస్తుత ప్రభుత్వానికి రోజులు దగ్గరపడ్డాయని అన్నారు. దళిత బంధు పథకం అతీగతీ లేదన్నారు. అన్ని రంగాల్లో తెలంగాణను అగ్రస్థానంలో నిలబెట్టామని హర్షించారు. అనవసరంగా బీఆర్ఎస్ను ఒడగొట్టుకున్నామనే ముచ్చట్లు వస్తున్నాయని తెలిపారు. కాంగ్రెస్కు ప్రత్యామ్నాయం బీఆర్ఎస్నే అని చెప్పారు.
బీఆర్ఎస్ అంటే మహావృక్షం : కేసీఆర్
'బీఆర్ఎస్ అంటే మహావృక్షమని కేసీఆర్ అన్నారు. అసెంబ్లీ ఎన్నికల్లో ఓడిపోయాం, కానీ కొంత నైరాశ్యంలో ఉన్నారని తెలిపారు. బస్సుయాత్ర మొదలుపెట్టగానే మళ్లీ అదే గర్జన మొదలైందన్నారు. మళ్లీ గెలిచేది బీఆర్ఎస్నే అని అన్నారు. ఓట్ల కోసం రైతుబంధు ఇవ్వలేదు. చేప పిల్లలు, గొర్రె పిల్లలను పంపిణీ చేస్తే అపహాస్యం చేశారు. బీఆర్ఎస్ హయాంలో గ్రామీణ ఆర్థిక వ్యవస్థను పరిపుష్టం చేశాం. కేవలం 1.08 శాతం ఓట్ల తేడాతో ఓడిపోయాం. గులాబీ జెండా పుట్టిందే తెలంగాణ రక్షణం కోసం. రాజకీయం నిరంతర ప్రవాహం అధికారంలో ఉంటేనే రాజకీయం కాదు. ప్రజల కోసం పని చేయడమే మన కర్తవ్యమని' కేసీఆర్ పేర్కొన్నారు.
వ్యూహం లేకపోవడం వల్లే 1969లో ఉద్యమం విఫలం : కేసీఆర్
వ్యూహం లేకపోవడం వల్లే 1969లో ఉద్యమం విఫలమైందని నాటి రోజులను మాజీ సీఎం కేసీఆర్ గుర్తు చేశారు. 2001లో కాదు 1999లోనే ఉద్యమం ప్రారంభమైందన్నారు. ఉద్యమ రూపాలు గుర్తు చేసుకుంటే ఒళ్లు పులకరిస్తుందని తెలిపారు. ఉద్యమం ప్రారంభించగానే పదవులు, పైసలు కోసం మొదలుపెట్టారనే ప్రచారం చేసేవారని ధ్వజమెత్తారు. ఉద్యమం కోసం ఎవరైనా పైసలు అడిగితే నాకు ఫోన్ చేయాలని చెప్పా అని చెప్పానన్నారు. ఆఫీసుకు జాగా ఇచ్చారని కొండా లక్ష్మణ్ బాపూజీ నివాసం కూలగొట్టారని అన్నారు. ఆఫీసు కోసం తెలంగాణలోనే తెలంగాణ వ్యక్తికి జాగా దొరకని పరిస్థితి వచ్చిందని అన్నారు.
బతుకమ్మ సినిమా తీద్దామని కథ రాశాను : కేసీఆర్
ముల్కీ నిబంధనల అంశం చాలా ఏళ్లు న్యాయపోరాటంగా మారిందని బీఆర్ఎస్ అధినేత కేసీఆర్ గుర్తు చేశారు. ముల్కీ నిబంధనలు సమంజసమే అని సుప్రీంకోర్టు చెప్పిందన్నారు. సుప్రీంకోర్టు తీర్పుతో ఆంధ్రాలో జై ఆంధ్రా ఉద్యమం వచ్చిందని కేసీఆర్ తెలిపారు. జై ఆంధ్ర ఉద్యమంలో 70 మందికి పైగా కాల్పుల్లో చనిపోయారని చెప్పారు. సుప్రీంకోర్టు తీర్పును కాలరాస్తూ కేంద్రం రాజ్యాంగ సవరణ చేసిందన్నారు. తెలంగాణ ఉద్యమంలో టీఎన్జీవోల పాత్ర చాలా గొప్పదని అన్నారు. ఏపీ ఏర్పడిన తర్వాత కూడా టీఎన్జీవో సంఘం కొనసాగిందని తెలిపారు. ఎప్పటికైనా ఓ నాయకుడు రాకపోతాడా అని జయశంకర్ భావించారని పేర్కొన్నారు. బతుకమ్మ సినిమా తీద్దామని కథ కూడా రాశాను అని కేసీఆర్ అన్నారు. ఉమ్మడి ఏపీలో తెలంగాణ వాళ్లను సీఎం కానీయలేదని కేసీఆర్ అన్నారు. ఉమ్మడి ఏపీలో ముగ్గురు తెలంగాణ వాళ్లే సీఎంలు అయ్యారని గుర్తు చేశారు. తెలంగాణనాడు సీఎం కాగానే ఏదో ఒక గొడవ పెట్టి దించేసేవారని చెప్పారు.
తెలంగాణ భాష స్వచ్ఛమైన తెలుగు కాదని కొందరు హేళన చేశారు: కేసీఆర్
తెలంగాణ భవన్లో రాష్ట్ర అవతరణ దశాబ్ది ఉత్సవాలు ప్రారంభమయ్యాయి. రాష్ట్ర అవతరణ దశాబ్ది ఉత్సవాల్లో మాజీ సీఎం కేసీఆర్ పాల్గొని, అమరవీరులకు నివాళులు అర్పించారు. ఈ సందర్భంగా కేసీఆర్ మాట్లాడుతూ ఈరోజు గొప్ప ఉద్విగ్నమైన క్షణం అని అన్నారు. గతంలో తెలంగాణ అంశం హాస్యాస్పదంగా ఉండేదన్నారు. గతంలో చాలామంది తెలంగాణ ఉద్యమాన్ని ప్రారంభించారని తెలిపారు. గతంలో తెలంగాణ అనే పదాన్నే పలకవద్దని స్పీకర్ అసెంబ్లీలో అన్నారని గుర్తు చేశారు. ప్రొఫెసర్ జయశంకర్ ఆ జన్మ తెలంగాణవాది అని కొనియాడారు. ఈ సమయంలో జయశంకర్ను స్మరించుకోకుండా ఉండలేమని పేర్కొన్నారు. ప్రొఫెసర్ జయశంకర్ వంటి మనుషులు అరుదుగా ఉంటారని అన్నారు. తెలంగాణ భాష స్వచ్ఛమైన తెలుగు కాదని కొందరు హేళన చేశారని కేసీఆర్ ధ్వజమెత్తారు.
డ్రగ్స్‌, గంజాయి అంశంలో ఎంతటివారున్నా వదిలిపెట్టం : సీఎం రేవంత్
ఎగువన ఉన్న ఉమ్మడి రంగారెడ్డి, దిగువన ఉన్న ఉమ్మడి నల్గొండ వరకు సాగునీటి వనరులుగా మూసీ ఉపయోగపడుతుందని సీఎం రేవంత్ స్పష్టం చేశారు. ప్రజల అవసరాలకు గినట్లు మెట్రో విస్తరణ చేశామన్నారు. త్వరితగతిన రీజినల్ రింగ్ రోడ్డును పూర్తి చేస్తామని మాటిచ్చారు. తక్కువ ఖర్చుతో ఎక్కువ నీటిని ఇచ్చే సాగునీటి ప్రాజెక్టులకు తొలి ప్రాధాన్యత ఇస్తామన్నారు. డ్రగ్స్‌, గంజాయి విషయంలో ఉక్కుపాదంతో అణచివేస్తామని చెప్పారు. డ్రగ్స్‌, గంజాయి అంశంలో ఎంతటివారున్నా వదిలిపెట్టమని చెప్పారు. డ్రగ్స్‌ రహిత తెలంగాణకు ప్రభుత్వ పరంగా, వ్యక్తిగతంగా అత్యధిక ప్రాధాన్యత ఇస్తున్నామని వెల్లడించారు. అధికారం రాగానే ఆడపడుచులకు ఉచిత బస్సు, ఆరోగ్య శ్రీ పథకాన్ని రూ.10లక్షలకు పెంచుతూ అమల్లోకి తెచ్చామని వివరించారు. తెలంగాణ పబ్లిక్‌ సర్వీస్‌ కమిషన్‌ను ప్రక్షాళన చేశామని గుర్తు చేశారు. 30 వేల మందికి ఉద్యోగ అవకాశాలు కల్పించామన్నారు. 11,062 పోస్టులతో మెగా డీఎస్సీకి నోటిఫికేషన్‌ ఇచ్చామని, ఈ ఏడాది 4.50 లక్షల ఇందిరమ్మ ఇళ్లు మంజూరు చేశామన్నారు. ఇందిరమ్మ ఇళ్ల కోసం రూ.22,500 కోట్ల నిధులు మంజూరు చేశామని ప్రకటించారు. ప్రతి మండల కేంద్రంలో అంతర్జాతీయ మోడల్‌ స్కూల్‌ నిర్మించడం తమ బాధ్యత అని, స్కిల్ యూనివర్సిటీలను ఏర్పాటు చేస్తామని మాటిచ్చారు. అమ్మా ఆదర్శ పాఠశాల పథకం కింద 26 వేల పాఠశాలల్లో మౌలిక సదుపాయాలు కల్పిస్తున్నామని సీఎం చెప్పుకొచ్చారు.
రాష్ట్రాన్ని 3 జోన్లుగా విభజన చేస్తున్నాం : సీఎం
తాలు, తరుగు లేకుండా ధాన్యం కొంటున్నామని సీఎం రేవంత్‌రెడ్డి అన్నారు. తడిసిన ధాన్యాన్ని కూడా మద్దతు ధరకే కొంటున్నామన్నారు. రూ.7,500 కోట్ల రూపాయాల ఖాతాలను రైతుల ఖాతాల్లో జమ చేశామని తెలిపారు. తెలంగాణకు డ్రీమ్‌ 20-50 మాస్టర్‌ ప్లాన్‌ తయారుచేస్తున్నామని చెప్పారు. రాష్ట్రాన్ని 3 జోన్లుగా విభజన చేస్తున్నామన్నారు. హైదరాబాద్ ఓఆర్‌ఆర్‌ పరిధిలో ఉన్న ప్రాంతాన్ని అర్బన్‌ తెలంగాణ, ఓఆర్‌ఆర్‌ నుంచి రీజినల్ రింగ్ రోడ్డు ప్రాంతాన్ని సబ్‌ అర్బన్‌ తెలంగాణ, రీజినల్ రింగ్ రోడ్‌ నుంచి తెలంగాణ సరిహద్దుల వరకు గ్రామీణ తెలంగాణ జోన్లుగా విభజించి అభివృద్ధి ప్రణాళికలను త్వరలో ప్రకటిస్తామని పేర్కొన్నారు. మూసీని సుందరీకరణ కార్యక్రమాన్ని చేపడతామని హామీ ఇచ్చారు. మూసీ సుందరీకరణ ద్వారా పరివాహన ప్రాంతంలో ఉపాధి కల్పన చేస్తున్నామని వివరించారు. మూసీ సుందరీకరణ రూ.వెయ్యి కోట్లు కేటాయించామని సీఎం రేవంత్ రెడ్డి వెల్లడించారు.
11.14 AM
జయ జయహే తెలంగాణను రాష్ట్ర అధికారికంగా గీతంగా సగర్వంగా ప్రకటిస్తున్నాం : సీఎం
"తెలంగాణ వచ్చి పదేళ్లయినా రాష్ట్ర గీతం లేదు. ఉద్యమాన్ని ఉవ్వెత్తున ఎగిసిపడేలా చేసిన జయ జయహే తెలంగాణ గీతాన్ని రాష్ట్ర గీతంగా ఉండాలని అనుకున్నాం. అందెశ్రీ రాసిన గీతాన్ని రాష్ట్ర గేయంగా ఉంటుందని విశ్వసించాం. ప్రజల ఆకాంక్షల మేరకు జయ జయహే తెలంగాణను రాష్ట్ర అధికారికంగా గీతంగా సగర్వంగా ప్రకటిస్తున్నాం. జాతి చరిత్రకు అద్దంపట్టేదే చిహ్నం. జాతి చరిత్ర మెుత్తం నిక్షిప్తమయ్యి ఉండేది చిహ్నంలోనే. తెలంగాణ అంటేనే ధిక్కారం, తెలంగాణ అంటనే పోరాటం. రాష్ట్ర అధికారిక చిహ్నంలో ధిక్కారం, పోరాటం ప్రతిబింబించాలి. వివిధ వర్గాల నుంచి వచ్చిన సూచనలకు అనుగుణంగా రాష్ట్ర నూతన చిహ్నాన్ని రూపొందిస్తున్నాం. ప్రజల ఆకాంక్షల మేరకు టీఎస్‌ను టీజీగా మార్చాం. సగటు గ్రామీణ మహిళా రూపమే తెలంగాణ తల్లి రూపంగా ఉండాలి. తెలంగాణ తల్లి కష్టజీవి, కరుణామూర్తి ఈ రూపురేఖలతో తెలంగాణ తల్లి రూపానికి పునరుజ్జీవనమని" సీఎం రేవంత్ రెడ్డి అన్నారు.
11.10 AM
ప్రజా ప్రభుత్వం జరుపుకుంటున్న మెుదటి ఆవిర్భావ దినోత్సవం ఇది : సీఎం రేవంత్
స్వేచ్ఛపై దాడి జరిగింది, సామాజిక న్యాయం మేడిపండు ఛందమైందని సీఎం రేవంత్ అన్నారు. ప్రజల సంపదం గుప్పెడు మంది చేతుల్లోకి వెళ్లిందని సీఎం ఆరోపించారు. తెలంగాణ సంసృతి, సంప్రదాయాలు విధ్వంసానికి గురయ్యాయన్నారు. ప్రజల కోసం ఎన్నికైన ప్రభుత్వం తెలంగాణలో ఉందని తెలిపారు. ప్రజా ప్రభుత్వం జరుపుకుంటున్న మెుదటి ఆవిర్భావ దినోత్సవం ఇది అని ఆనందించారు. తెలంగాణ ప్రధాత సోనియా గాంధీని ఈ ఉత్సవాలకు తమ మంత్రివర్గం ఆహ్వానించిందన్నారు. ఏ హోదాలో సోనియాగాంధీని ఆహ్వానించారని కొందరు అడుగుతున్నారన్నారు. బిడ్డ ఇంట్లో శుభకార్యానికి తల్లికి హోదా కావాలా? అని అడుగుతున్నానని ప్రశ్నించారు. తల్లిని ఆహ్వానించేందుకు బిడ్డకు ఒకరి అనుమతి అవసరమా? ఏ హోదాలో, ఏ పదవిలో ఉన్నారని మహాత్మాగాంధీని జాతిపితగా గుర్తించుకున్నామన్నారు. తెలంగాణ చరిత్ర ఉన్నంతవరకూ ఈ సమాజం సోనియాను తల్లిగానే గౌరవిస్తుందని తెలిపారు. తెలంగాణ గడ్డతో సోనియాగాంధీది రాజకీయ బంధం కాదు, తెలంగాణతో సోనియాగాంధీకి ఉన్నది పేగు బంధమని వివరించారు. సాంస్కృతిక పునరుజ్జీవనం, ఆర్థిక పునరుజ్జీవనం తెలంగాణ భవిష్యత్‌ నిర్మాణానికి కీలక అంశాలని అన్నారు.
11.01 AM
మేం సేవకులం కాదు, పాలకులం అని నిరూపించాం : సీఎం
తమ నిర్ణయాలను, లోటుపాట్ల సమీక్షకు అవకాశమిస్తున్నామని సీఎం రేవంత్ పేర్కొన్నారు. ప్రతిపక్షానికి గౌరవం ఇచ్చామన్నారు. ఇందిరాపార్కులో ధర్నాకు అనుమతి, మీడియాకు స్వేచ్ఛను ఇచ్చామని తెలిపారు. సచివాలయాల్లోకి సామాన్యుడు రాగలిగే పరిస్థితిని తీసుకువచ్చామన్నారు. జ్యోతిబాపూలే భవన్లో మంగళ, శుక్రవారాల్లో దరఖాస్తులు తీసుకుంటున్నామని తెలిపారు. ప్రగతి భవన్ మహాత్మా జ్యోతిబాపూలే భవన్గా పేరుమార్చి ప్రజలకు అందుబాటులోకి తీసుకువచ్చామని తెలిపారు. మేం సేవకులం కాదు, పాలకులం అని నిరూపించామని సీఎం అన్నారు.
10.57 AM
సర్వజ్ఞానులం అన్న భ్రమలు మాకు లేదు : సీఎం రేవంత్
పదేళ్ల పాలనలో వందేళ్ల విధ్వంసం జరిగిందని సీఎం రేవంత్ రెడ్డి అన్నారు. దానికంటే ముందు దశాబ్ది ఉత్సవం అనేది మైలురాయి అని చెప్పారు. ప్రజల ఆశలు, ఆశయాలు నెరవేర్చడంలో ఎక్కడ ఉన్నామనేది సమీక్షించుకోవాల్సిన సందర్భమిదని వివరించారు. ఉద్యమ లక్ష్యాలు, అమరుల ఆశయాలు సాధించిన నాడే తెలంగాణ సాధనకు సార్థకత వస్తుందని చెప్పారు. సామాజిక న్యాయం, సమాన అవకాశాలు ఇవ్వలన్నదే తమ ప్రభుత్వ ప్రాధాన్యత అని చెప్పుకొచ్చారు. అందరి సలహాలు, సూచనలు స్వీకరించి, చర్చించి ముందుకెళ్తామన్నారు. సర్వజ్ఞానులం అన్న భ్రమలు మాకు లేవని స్పష్టం చేశారు. తప్పులు జరిగితే సరిదిద్దుకోవడానికి సిద్ధంగా ఉన్నామన్నారు.
10.50AM
మా పాలనలో స్వేచ్ఛ పునరుద్ధరణకు తొలి ప్రాధాన్యం : సీఎం రేవంత్
తెలంగాణ జీవనశైలి స్వేచ్ఛం, బానిసత్వాన్ని తెలంగాణ భరించలేదని సీఎం రేవంత్ రెడ్డి అన్నారు. ప్రేమను పంచడం, పెత్తనాన్ని ప్రశ్నించడం తెలంగాణ ప్రజల తత్వమని పేర్కొన్నారు. సంక్షేమం ముసుగులో తెలంగాణను చెరబట్టాలని చూస్తే సమాజం సహించదని తెలిపారు. మా పాలనలో స్వేచ్ఛ పునరుద్ధరణకు తొలి ప్రాధాన్యం ఇచ్చామన్నారు. పాలకులు, పాలితుల మధ్య గోడలు బద్దలు కొట్టామన్నారు.
10.45 AM
నాలుగు కోట్ల ప్రజల హృదయాలు ఆనందంతో ఉప్పొంగే పర్వదినం ఈరోజు : సీఎం
జై తెలంగాణ నినాదంతో సీఎం రేవంత్ రెడ్డి ప్రసంగాన్ని ప్రారంభించారు. నాలుగు కోట్ల ప్రజల హృదయాలు ఆనందంతో ఉప్పొంగే పర్వదినం ఈరోజు అని చెప్పారు. తెలంగాణ అస్తిత్వానికి, ఆత్మగౌరవానికి పట్టాభిషేకం జరిగి దశాబ్దం పూర్తయ్యిందని అన్నారు. రాష్ట్ర సాధనలో ప్రాణాలు అర్పించిన అమరవీరులకు నివాళులు అర్పించానన్నారు. ఆరు దశాబ్దాల కలను సాకారం చేసిన నాటి ప్రధాని మన్మోహన్ సింగ్, యూపీఏ ఛైర్పర్సన్ సోనియాకు కృతజ్ఞతలని తెలిపారు. రాష్ట్ర ప్రజలకు తెలంగాణ ఆవిర్భావ దినోత్సవ శుభాకాంక్షలు చెప్పారు.
10.40AM
తెలంగాణ ప్రజలకు రాష్ట్ర ఆవిర్భావ దినోత్సవ శుభాకాంక్షలు: సోనియాగాంధీ
తెలంగాణ ప్రజలకు రాష్ట్ర ఆవిర్భావ దినోత్సవ శుభాకాంక్షలను కాంగ్రెస్ అధినేత్రి సోనియా గాంధీ తెలిపారు. అమరవీరులకు శ్రద్ధాంజలి ఘటిస్తాస్తున్నానని చెప్పారు. తెలంగాణ స్వప్నాన్ని నెరవేరుస్తామని 2004లో కరీంనగర్ సభలో హామీ ఇచ్చామని సోనియా గాంధీ గుర్తు చేశారు. గడిచిన పదేళ్లుగా తమ పార్టీ పట్ల ప్రజలు అత్యంత ప్రేమ, అభిమానాలు చూపారన్నారు. తెలంగాణ అభివృద్ధే లక్ష్యంగా మా పార్టీ పని చేస్తుందని తెలిపారు. తెలంగాణ ప్రజల స్వప్నాన్ని నెరవేర్చే కర్తవ్యం మాపైన ఉందని ఆమె పేర్కొన్నారు. రేవంత్ రెడ్డి నేతృత్వంలోని తమ ప్రభుత్వం ప్రజలకు ఇచ్చిన గ్యారంటీలు అమలు చేస్తామని సోనియా గాంధీ హామీ ఇచ్చారు.
10.35 AM
జయ జయహే తెలంగాణ గీతాన్ని విడుదల చేసిన సీఎం
తెలంగాణ రాష్ట్ర గీతాన్ని సీఎం రేవంత్ రెడ్డి విడుదల చేశారు. జయ జయహే తెలంగాణ గీతాన్ని సీఎం విడుదల చేశారు. జయ జయహే తెలంగాణ గీత రచయిత అందె శ్రీ, సంగీత దర్శకుడు కీరవాణి. రాష్ట్ర అవతరణ దినోత్సవ వేడుకల్లో కాంగ్రెస్ అధినేత్రి సోనియా సందేశం ప్రదర్శించారు.
10.25 AM
గాంధీభవన్లో తెలంగాణ ఆవిర్భావ వేడుకలు
హైదరాబాద్లోని గాంధీభవన్లో రాష్ట్ర ఆవిర్భావ దశాబ్ది ఉత్సవాలు ఘనంగా జరిగాయి. గాంధీభవన్లో జెండా ఎగురవేసిన ఎమ్మెల్సీ మహేశ్ కుమార్గౌడ్. ఈ కార్యక్రమంలో డిప్యూటీ సీఎం భట్టి విక్రమార్క, దీపాదాస్ మున్షీ, మంత్రులు తుమ్మల, పొన్నం ప్రభాకర్, సీతక్క, జూపల్లి కృష్ణారావు పాల్గొన్నారు.
10.10 AM
పరేడ్ గ్రౌండ్లో జాతీయ జెండా ఆవిష్కరించిన సీఎం రేవంత్ రెడ్డి
పరేడ్ గ్రౌండ్లో రాష్ట్ర ఆవిర్భావ దినోత్సవ వేడుకలు ప్రారంభమయ్యాయి. జాతీయ జెండాను సీఎం రేవంత్ రెడ్డి ఆవిష్కరించారు. పరేడ్ గ్రౌండ్లో సీఎం పోలీసుల గౌరవ వందనం స్వీకరించారు.
10.00AM
తెలంగాణ హైకోర్టులో ఆవిర్భావ వేడుకలు
తెలంగాణ హైకోర్టు ప్రాంగణంలో రాష్ట్ర ఆవిర్భావ దశాబ్ది ఉత్సవాలు నిర్వహించారు. హైకోర్టు ప్రాంగణంలో జెండాను సీజే జస్టిస్ అలోక్ అరాధే, న్యాయమూర్తులు ఎగురవేశారు.
09.51AM
సీఎం రేవంత్కు ఉద్యమం గురించి తెలియదు : కేటీఆర్
హైదరాబాద్ తెలంగాణ భవన్లో రాష్ట్ర ఆవిర్భావ దినోత్స వేడుకలు ప్రారంభమయ్యాయి. తెలంగాణ భవన్లో జాతీయ జెండాను కేటీఆర్ ఎగురువేశారు. సీఎం కేవలం ఒక్కరోజే దశాబ్ది ఉత్సవాలు నిర్వహిస్తున్నారని అన్నారు. అదే బీఆర్ఎస్ ప్రభుత్వం ఉంటే నెల రోజుల పాటు సంబురాలు చేసేవాళ్లమన్నారు. సీఎం రేవంత్కు ఉద్యమం గురించి ఏమాత్రం తెలియదని ఎద్దేవా చేశారు. రాష్ట్ర సాధన కోసం ప్రాణాలు అర్పించిన అమరవీరులకు కేటీఆర్ వందనాలు తెలిపారు.
09.44 AM
తెలంగాణ భవన్లో ఛాయాచిత్ర ప్రదర్శన
తెలంగాణ ఉద్యమయాది పేరిట తెలంగాణ భవన్లో ఛాయా చిత్ర ప్రదర్శనను బీఆర్ఎస్ ఏర్పాటు చేసింది. తెలంగాణ ఉద్యమం, కేసీఆర్ పాలనలోని అభివృద్ధి, సంక్షేమం వివరించేలా ఫొటో ఎగ్జిబిషన్ను ఏర్పాటు చేశారు.
09.43 AM
రాష్ట్ర ప్రజలకు తెలంగాణ ఆవిర్భావ దినోత్సవ శుభాకాంక్షలు : సీఎం రేవంత్
రాష్ట్ర ప్రజలకు తెలంగాణ ఆవిర్భావ దినోత్సవ శుభాకాంక్షలను సీఎం రేవంత్ రెడ్డి చెప్పారు. ప్రపంచంతో నా తెలంగాణ పోటీపడుతుందని అన్నారు. విశ్వ వేదికపై తెలంగాణ సగర్వంగా నిలబడుతుందని తెలిపారు.
09.35 AM
అమరవీరుల స్తూపానికి సీఎం రేవంత్ నివాళి
గన్పార్క్ వద్ద అమరవీరుల స్తూపానికి సీఎం రేవంత్ రెడ్డి నివాళులు అర్పించారు. అలాగే డిప్యూటీ సీఎం భట్టి విక్రమార్క, మంత్రులు కోమటిరెడ్డి వెంకట్రెడ్డి, పొన్నం ప్రభాకర్, దామోదర రాజనర్సింహ, పొంగులేటి శ్రీనివాస్ రెడ్డి, జూపల్లి కృష్ణారావు, సీతక్క, కాంగ్రెస్ ఎమ్మెల్యేలు నివాళులు అర్పించారు.
09.30 AM
బీఆర్ఎస్ చేసిన తప్పులే కాంగ్రెస్ చేస్తోంది : ఎంపీ లక్ష్మణ్
కోదండరామ్ ఆత్మ విమర్శ చేసుకోవాలని ఎంపీ లక్ష్మణ్ సూచించారు. ప్రత్యేక తెలంగాణ కోసం జేఏసీలో బీజేపీ చేరిందన్నారు. పార్టీ జెండాలు పక్కనపెట్టి, తెలంగాణ అజెండా కోసం పోరాడామని తెలిపారు. బీఆర్ఎస్ చేసిన తప్పిదాలనే కాంగ్రెస్ కొనసాగిస్తోందని తప్పుబట్టారు. ఓట్ల వేటలో ప్రజలను కాంగ్రెస్ మభ్యపెట్టిందన్నారు. ఉద్యమకారులను బీజేపీ సత్కరిస్తుందని తెలిపారు.
09.20 AM
సచివాలయంలో రాష్ట్ర ఆవిర్భావ దశాబ్ది ఉత్సవాలు
హైదరాబాద్లోని సచివాలయంలో రాష్ట్ర ఆవిర్భావ దశాబ్ది ఉత్సవాలు ప్రారంభమయ్యాయి. సచివాలయంలో సీఎస్ శాంతికుమారి జాతీయ జెండాను ఆవిష్కరించారు.
09.15 AM
బీజేపీ కార్యాలయంలో ఘనంగా రాష్ట్ర అవతరణ దినోత్సవ వేడుకలు
హైదరాబాద్లోని బీజేపీ రాష్ట్ర కార్యాలయంలో రాష్ట్ర ఆవిర్భావ దినోత్సవ వేడుకలు ఘనంగా జరిగాయి. కార్యాలయంలో జాతీయ జెండాను ఎంపీ లక్ష్మణ్ ఎగురవేశారు.
9.10 AM
రాష్ట్ర ఆవిర్భావ దశాబ్ది వేడుకలు చేసుకోవడం సంతోషంగా ఉంది : గవర్నర్
రాజ్భవన్లో తెలంగాణ ఆవిర్భావ దశాబ్ది ఉత్సవాలు ఘనంగా జరుగుతున్నాయి. పోలీసుల గౌరవ వందనం గవర్నర్ రాధాకృష్ణన్ స్వీకరించారు. రాష్ట్ర ఆవిర్భావ దశాబ్ది వేడుకలు చేసుకోవడం సంతోషంగా ఉందని గవర్నర్ తెలిపారు. అందరికీ అవతరణ దినోత్సవ వేడుకల శుభాకాంక్షలను గవర్నర్ చెప్పారు. అవినీతి నిర్మూలనే మనందరి లక్ష్యమని అన్నారు.
7.36 AM
ప్రతి ఒక్కరికీ తెలంగాణ దశాబ్ది ఉత్సవ శుభాకాంక్షలు : కేటీఆర్
బీఆర్ఎస్ పార్టీ కార్యనిర్వాహక అధ్యక్షుడు కేటీఆర్ రాష్ట్ర ప్రజలకు తెలంగాణ దశాబ్ది ఉత్సవ శుభాకాంక్షలు తెలిపారు. తెలంగాణ ఉద్యమం మరో స్వాతంత్య్ర పోరాటమని అన్నారు. ఉక్కు సంకల్పం కలిగిన కేసీఆర్ పోరాట ఫలితమిదని పేర్కొన్నారు. 'అమరుల ప్రాణత్యాగాల పునాదులపై ఏర్పడిన కొత్త రాష్ట్రం మన తెలంగాణ. శతాబ్దంలో సాధ్యంకాని అద్భుతాలు దశాబ్దంలో అయ్యాయి. తెలంగాణ ఆచరిస్తుంది, దేశం అనుసరిస్తుందనేలా దశాబ్దం గడిచింది. 60 ఏళ్ల విధ్వంస గాయాలను పదేళ్ల వికాసంతో మాన్పేసుకున్నాం. తెలంగాణ దేశానికే దిక్సూచిగా కొనసాగాలి' అని కేటీఆర్ కాంక్షించారు.
