Telangana Ex Sarpanch Protest :పెండింగ్ బిల్లులు విడుదల చేయాలంటూ రాష్ట్రవ్యాప్తంగా మాజీ సర్పంచ్లు నిరసనలు చేస్తున్నారు. హైదరాబాద్‌ జూబ్లీహిల్స్‌ పెద్దమ్మ తల్లిని దర్శించుకున్న అనంతరం సీఎం రేవంత్‌రెడ్డి ఇంటికి వెళ్లి వినతి పత్రం ఇవ్వాలని నిర్ణయించుకోగా మాజీ సర్పంచ్లను పోలీసులు అరెస్టు చేసి వివిధ స్టేషన్లకు తరలించారు. అప్పులు తెచ్చి గ్రామాల్లో శ్మశానవాటికలు, క్రీడా ప్రాంగణాలు, డంపింగ్‌ యార్డులు వంటి అనేక అభివృద్ధి పనులు చేసినట్లు వివరించారు.
ఆయా పనులకు సంబంధించి 2019నుంచి 2024వరకు బిల్లులు రాలేదని ఆవేదన వ్యక్తం చేశారు. స్థానిక సంస్థల ఎన్నికలు వస్తున్న నేపథ్యంలో బిల్లులు చెల్లించాలని సీఎం, గవర్నర్ సహా అధికారులకు ఎన్నిసార్లు విజ్ఞప్తి చేసినా పట్టించుకోవట్లేదని ఆరోపిస్తున్నారు. శాంతియుతంగా నిరసన తెలిపేందుకు వస్తున్న మాజీ సర్పంచ్లను అరెస్టు చేయడం సరికాదని చెబుతున్నారు.
మాజీ సర్పంచుల పరిస్థితి దారుణం :పెండింగ్ బిల్లుల కోసం మాజీ సర్పంచులు ఏడాదిగా తిరుగుతున్నారని బీఆర్ఎస్ కార్యనిర్వాహక అధ్యక్షుడు కేటీఆర్‌ అన్నారు. వారి కుటుంబాలను రోడ్డున పడేయడం దారుణమని తెలిపారు. శాంతియుతంగా నిరసన చేస్తున్న వారిని ఎందుకు అరెస్టు చేస్తున్నారని ప్రశ్నించారు. వెంటనే పెండింగ్ బిల్లులు విడుదల చేయాలని డిమాండ్ చేశారు.
అరెస్టును తీవ్రంగా ఖండిస్తున్నాం : మాజీ సర్పంచుల అరెస్టును తీవ్రంగా ఖండిస్తున్నామని ఎమ్మెల్యే హరీశ్‌రావు అన్నారు. సీఎంను కలిసేందుకు వచ్చిన వారిని అడ్డుకోవడం అప్రజాస్వామికమన్నారు. గ్రామాభివృద్ధి కోసం ఖర్చు చేసిన డబ్బు ఇవ్వాలని కోరితే అరెస్టులు చేస్తారా అని ప్రశ్నించారు. మాజీ సర్పంచులు అంతా అప్పులు తెచ్చి, ఆస్తులు అమ్మి, భార్యాపిల్లల బంగారం తాకట్టు పెట్టి పనులు చేపట్టారని తెలిపారు. ప్రజాపాలన అంటే గ్రామానికి సేవ చేసిన వారిని అరెస్టు చేయడమేనా?అని ప్రశ్నించారు.