Baby Born Just After Father Dies : పుట్టబోయే బిడ్డ కోసం ఆ దంపతులు కోటి ఆశలతో ఎదురుచూశారు. ఆ శిశువు నాన్న అని పిలిచే పదం కోసం ఆ తండ్రి పరితపించాడు. ఆ బిడ్డను ఎత్తుకొని ఆడించాలని కలలు కన్నాడు. కానీ వారి పట్ల విధి వింత నాటకం ఆడింది. ఆ భర్త రోడ్డు ప్రమాదంలో మృతి చెందాడు. భర్త చనిపోయిన ఒక గంట వ్యవధిలోనే అతడి భార్య పండంటి మగబిడ్డకు జన్మనిచ్చింది. ఓవైపు తండ్రి మరణం మరోవైపు కుమారుడి జననం. ఈ హృదయవిదారక ఘటన తెలంగాణలోని జోగులాంబ గద్వాల జిల్లాలో చోటుచేసుకుంది.
ఇందుకు సంబంధించిన వివరాలు ఈ విధంగా ఉన్నాయి. జోగులాంబ గద్వాల జిల్లా మండల కేంద్రం రాజోలిలో శివ (26) అనే యువకుడు నివాసం ఉంటున్నాడు. అతడు పెట్రోలుబంకులో పనిచేస్తున్నాడు. ఆంధ్రప్రదేశ్లోని ఉమ్మడి కర్నూలు జిల్లా బనగానిపల్లెకు చెందిన లక్ష్మితో అతడికి 14 నెలల కిందట వివాహమైంది. ఆమె గర్భం ధరించడంతో కాన్పు కోసం పుట్టింటికి వెళ్లింది. శివ మంగళవారం సాయంత్రం రాజోలిలో ద్విచక్రవాహనంపై వెళ్తుండగా ఎస్సీ కాలనీ వద్ద అదుపు తప్పి పడిపోయాడు.
ఈ క్రమంలో శివ తలకు తీవ్ర గాయాలు కావడంతో రాత్రి 8 గంటలకు కర్నూలు ప్రభుత్వ ఆసుపత్రికి తరలించారు. కుటుంబసభ్యులు ఈ విషయాన్ని బనగానిపల్లెలో ఉన్న లక్ష్మికి తెలిపినా ప్రాణాపాయం లేదని ధైర్యం చెప్పారు. సరిగ్గా మంగళవారం రాత్రే లక్ష్మికి పురిటినొప్పులు రాగా ఆమెను రాత్రి 10 గంటలకు కర్నూలు ప్రభుత్వ ఆసుపత్రిలోనే చేర్చారు. బుధవారం తెల్లవారుజామున 2:30 గంటల సమయంలో పరిస్థితి విషమించడంతో శివ మరణించాడు.