Three Died in Road Accident at Medchal Checkpost :మేడ్చల్ చెక్‌పోస్టు వద్ద ఘోర రోడ్డు ప్రమాదం చోటు చేసుకుంది. ఈ ప్రమాదంలో ముగ్గురు మృతి చెందారు. పూర్తి వివరాల్లోకి వెళితే, మేడ్చల్ చెక్‌పోస్టు వద్ద ద్విచక్ర వాహనాన్ని లారీ ఢీకొట్టింది. ఈ ప్రమాదంలో దంపతులతో పాటు కుమార్తె మృతి చెందింది. కుమారుడి కాళ్లపై నుంచి లారీ వెళ్లింది. దీంతో ఆ బాలుడి రెండు కాళ్లు విరిగాయి. ఘటనా స్థలానికి చేరుకున్న పోలీసులు క్షతగాత్రుడిని సమీప ఆసుపత్రికి తరలించారు.
ఏపీలోని కాకినాడకు చెందిన సాగి బుల్లబ్బాయ్‌ ( 37) కుటుంబం హైదరాబాద్ ఉప్పల్‌లో నివాసముంటోంది. ఉదయం పూట బండిపై టిఫిన్ అమ్ముకుంటూ జీవనం సాగిస్తున్నారు. బంధువుల ఇంటికి భార్య, ఇద్దరు పిల్లలతో కలిసి బైకుపై వెళ్తుండగా మేడ్చల్ చెక్‌పోస్ట్‌ సమీపంలో వెనక నుంచి అతి వేగంగా వస్తున్న ఓ కంటైనర్ లారీ ఢీకొట్టింది. ప్రమాదంలో బుల్లబ్బాయ్‌ సహా అతని భార్య సాగి లావణ్య (32), కుమార్తె సాగి హర్షిత దేవి (8) అక్కడికక్కడే మృతి చెందారు. కుమారుడు సాగి సిద్ధేశ్వర్ (6) కాలిపై నుంచి లారీ దూసుకెళ్లడంతో ఆ బాలుడి రెండు కాళ్లు విరిగాయి. ఘటనా స్థలానికి చేరుకున్న పోలీసులు క్షతగాత్రుడిని సమీప ఆసుపత్రికి తరలించారు. సంఘటనా స్థలం నుంచి లారీ డ్రైవర్ పరారయ్యాడు.