'సర్వే చేయడానికి మీ ఇళ్లకు రాను - మీరే పంచాయతీ కార్యాలయానికి రండి'

ప్రభుత్వ ఆదేశాలకు విరుద్ధంగా కుటుంబ సర్వేలు - పంచాయతీ కార్యాలయానికి పిలిపించి ధ్రువపత్రాల ధ్రువీకరణ

Samagra Kutumba Survey at Panchayat Office :రాష్ట్ర ప్రభుత్వ ప్రతిష్టాత్మకంగా సమగ్ర కుటుంబ సర్వే చేపడుతోంది. ఎన్యూమరేటర్లు ఇంటింటికీ వెళ్లి సర్వే చేయాలని ప్రభుత్వం నుంచి ఆదేశాలు ఉన్నాయి. కొందరు మాత్రం ఆదేశాలకు విరుద్ధంగా పని చేస్తున్నారు. గ్రామ పంచాయతీల్లో, కాలనీల్లో ఒక దగ్గర ఉంటూ సర్వేలు చేపడుతున్నారు. కుమురం భీం ఆసిఫాబాద్‌ జిల్లా లింగాపూర్ మండలంలోని కొత్తపల్లి గ్రామ పంచాయతీ కార్యాలయంలోనే సర్వే చేశారు. అక్కడి కార్యదర్శి నిబంధనలకు విరుద్ధంగా విధులు నిర్వహిస్తూ, గ్రామస్థులను అక్కడికే పిలుపించుకుని సభ్యుల వివరాలు అడిగి ఫారాల్లో నింపుతూ సర్వే చేశారు. పంచాయతీ కార్యాలయంలోనే సర్వే చేస్తున్నారని తెలిసి అక్కడికి గ్రామస్థులు పరుగులు పెట్టారు.

ఇదిలా ఉంటే ఇళ్లకు వెళ్లకుండా ఒక దగ్గరే ఉంటూ సర్వ చేయడంపై విమర్శలు వెల్లువెత్తుతున్నాయి. ఇంటికి వచ్చి సర్వే చేయాల్సిన వారు ఇలా ఒక దగ్గరే ఉంటూ చేయడం సరికాదన్నారు. వృద్ధుల, ఆరోగ్య సమస్యలతో బాధ పడుతున్నవారు ఎలా వెళ్లగలరన్న అభిప్రాయాలు వ్యక్తమవుతున్నాయి. విషయం తెలుసుకున్న వారైతే సర్వే చేస్తున్న దగ్గరకు వస్తారని, లేని సందర్భంలో ఎలా అన్న ప్రశ్నలు వినిపిస్తున్నాయి.

మంత్రి క్లారిటీ :మరోవైపు సోషల్‌ మీడియాలో ఫ్రిజ్​లు, టీవీలు, ఏసీలు, కారు, ద్విచక్ర వాహనం ఇలా అన్ని వివరాలు వెల్లడిస్తే ప్రస్తుతం వస్తున్న ప్రభుత్వ పథకాలు ఆగిపోతాయని కొందరు తప్పుడు సమాచారం ఇస్తున్నారు. ఈ విషయంపై మంత్రి పొన్నం ప్రభాకర్​ క్లారిటీ ఇచ్చారు. ఈ సమాచారం సేకరించడంతో ఎలాంటి ప్రభుత్వ పథకాలు ఆగిపోవని స్పష్టం చేశారు. ఇంకా అదనంగా పథకాలు అవ్వడానికి వినియోగిస్తామన్నారు.

అలాగే విద్యా, ఉద్యోగరిత్యా వేరే ప్రాంతాల్లో నివసించే వారికి ప్రభుత్వం వెసులుబాటు కల్పించింది. ఒక కుటుంబం ప్రస్తుతం ఎక్కడ నివసిస్తుంటే, అక్కడే ఎన్యూమరేటర్ల వద్ద తమ వివరాలను నమోదు చేయించుకునే అవకాశం ఇచ్చింది.

అలాంటి అపోహలు వద్దు : ఆధార్ కార్డులో చిరునామా ఉన్న చోటికి, స్వగ్రామానికి వెళ్తేనే కుటుంబ వివరాలు నమోదు చేస్తారనే అపోహ పడవద్దని రాష్ట్ర ప్రణాళిక శాఖ స్పష్టం చేసింది. సర్వేలో కుటుంబ సభ్యుల వ్యక్తిగత ఆధార్, సెల్​ఫోన్ నంబర్లు, ప్రశ్నపత్రంలో అడిగిన వివరాలన్నీ చెప్పాలి. రేషన్ కార్డు, పట్టాదారు పాసుపుస్తకం, ఆధార్, బ్యాంకు పాసు పుస్తకం వంటివి అందుబాటులో ఉంచుకుంటే సర్వే కోసం వచ్చిన గణకులకు త్వరగా సమాచారం ఇవ్వవచ్చని అధికారులు పేర్కొన్నారు.