అదనపు ఆదాయం కావాలా ? - మీ ఇంటిపైన సోలార్​ ప్లాంట్ పెట్టుకోండిలా !

కేంద్ర ప్రభుత్వ సూర్యఘర్‌ పథకంతో ఇంటిపైనే సోలార్‌ ప్లాంట్లతో కరెంట్​ ఉత్పత్తి - తయారైన కరెంట్​లో కొంత ఇంటికి వాడుకుని మిగతా యూనిట్లు తిరిగి ట్రాన్స్‌కో డిస్కమ్‌కే అమ్మి సొమ్ము చేసుకునే అవకాశం

PM Surya Ghar Solar Power Plant Scheme : కరెంటు బిల్లు నెలకు వెయ్యి రూపాయలు దాటుతోందా ? భవిష్యత్తులో కూడా కరెంట్​ బిల్లు ఛార్జీల భారం మరింతగా పెరుగుతుందని అనుకుంటున్నారా ? అయితే మీ సొంత ఇంటిపైకప్పుపై సోలార్​ ప్లాంట్లు పెట్టి ఆ లబ్ధిదారులుగా మారండి. ప్రస్తుతం మీరు వాడుతున్న కరెంట్​ కన్నా ఎక్కువగానే తయారు చేసి తిరిగి ట్రాన్స్‌కో డిస్కమ్‌కే అమ్మి సొమ్ము చేసుకోండి. ప్రస్తుతం ఇది కేంద్ర ప్రభుత్వం సోలార్​ ప్లాంట్ల ఏర్పాటుకు చేస్తున్న ప్రచారం. ఈ నేపథ్యంలో కరెంటు బిల్లు ఎక్కువగా వచ్చే వినియోగదారులు సోలార్​ ప్లాంట్ల ఏర్పాటుకు మొగ్గు చూపుతున్నారు.

ఉమ్మడి నల్గొండ జిల్లాలో సుమారు 600కిపైగా ఇళ్లపై సోలార్‌ ప్లాంట్లను ఏర్పాటు చేసుకున్నారు. హైదరాబాద్, వరంగల్ నగరాల్లో ఎక్కువ సంఖ్యలో సోలార్​ ప్లాంట్లు ఏర్పాటు కాగా ఇప్పుడిప్పుడే జిల్లా కేంద్రాలు, మున్సిపాలిటీల్లో సోలార్‌ ప్లాంట్ల ఏర్పాటుకు ముందుకు వస్తున్నారు. గతంలో సోలార్‌ ద్వారా తయారైన కరెంటును బ్యాటరీల్లో స్టోర్​ చేసి రాత్రివేళ ఇంటి అవసరాలకు వాడుకునేవారు. కానీ ప్రస్తుతం బ్యాటరీలు లేకుండానే డీసీ కరెంట్‌ను ఏసీ కరెంట్‌గా మార్చే ఇన్వర్టర్‌ను బిగించి డైరెక్ట్​గా గ్రిడ్​కు అనుసంధానం చేస్తున్నారు.

ఇంటిపైన ఏర్పాటు చేసిన 3 కెవి సోలార్‌ ప్లాంటు (ETV Bharat)

ఆరునెలలకోసారి యూనిట్ల లెక్కింపు

లబ్ధిదారులు డిస్కమ్‌తో చేసుకున్న అగ్రిమెంట్​ ప్రకారం ప్రతి ఆరునెలలకోసారి ఇంట్లో ఏర్పాటు చేసిన నెట్‌మీటరు సాయంతో ఎన్ని యూనిట్ల కరెంట్​ వాడిందని, ఇంకా ఎంత ఉందని లెక్క వేసి మనం ఖర్చు చేయగా మిగతా యూనిట్లకు లెక్క వేసి రూ.4.50 చొప్పున లెక్కించి లబ్ధిదారుల బ్యాంకు ఖాతాల్లో జమ చేస్తుందని ఓమ్​ సోలార్​ ఎనర్జీ సర్వీసెస్‌ ఎండీ గుండా వెంకటేశ్వర గుప్తా వెల్లడించారు.

పెట్టుబడి, రాయితీ వివరాలు

మూడు కిలోవాట్లు అంతకంటే ఎక్కువ కిలోవాట్ల ప్లాంటు ఏర్పాటు చేసుకుంటే సుమారు రూ.80 వేల నుంచి రూ. 2 లక్షల వరకూ ఖర్చవుతుంది. అదనంగా ఎన్ని కిలోవాట్లు ఏర్పాటు చేసుకుంటే అదే స్థాయిలో పెట్టుబడి కూడా పెరుగుతుంది. కేంద్ర ప్రభుత్వం సూర్యఘర్‌ పథకం కింద ప్రతి కుటుంబానికి మూడు కిలోవాట్లు అంతకన్నా ఎక్కువ కిలోవాట్ల సోలార్‌ప్లాంటు ఏర్పాటు చేసుకున్నా రాయితీ కింద రూ.78 వేలు ఇస్తోంది. ఈ మొత్తం పెట్టుబడికి సైతం బ్యాంకులు రుణాలు ఇస్తున్నాయి. గతంలో అయితే ఖాతాలో రాయితీ జమ కావడానికి కనీసం ఆరు నెలల సమయం తీసుకునేది. కానీ ప్రస్తుతం కేంద్ర ప్రభుత్వం నెల నుంచి రెండు నెలల్లోనే సూర్యఘర్‌ యోజన నుంచి రాయితీ సొమ్ము జమ అవుతోందని ఓ బ్యాంకు మేనేజర్​ తెలిపారు.

ఇలా దరఖాస్తు చేసుకోండి

సోలార్‌ ప్లాంటు ఏర్పాటుకు సూర్యఘర్‌ పోర్టల్‌లోని ఆధార్​కార్డు సహకారంతో దరఖాస్తును పంపాలి. ఎంపిక చేసుకున్న సోలార్‌ ఏజెన్సీ వాళ్లే అప్లికేషన్​ పంపటం, బ్యాంకులోనూ వచ్చేలా చేయటం వంటివి చేస్తున్నారు. అయితే వారికి ఆధార్​కార్డుతో పాటు తాజా కరెంటు బిల్లు కాపీ, బ్యాంకు ఖాతా కాపీ, పాన్​కార్డు, ఫోన్‌ నంబరు ఇవ్వాలి. బ్రాండెడ్‌ కంపెనీలకు చెందిన ప్యానళ్లను ఎంపిక చేసుకుంటే ఏజెన్సీ వాళ్లే పూర్తి యూనిట్​ ఏర్పాటు చేయటం, డిస్కమ్​తో అగ్రిమెంట్​ చేయించటం, ట్రాన్స్‌కో వారితో నెట్‌ మీటరు బిగించటంతో పాటు సూర్యఘర్‌ పోర్టల్‌ ద్వారా సబ్సిడీ కూడా వచ్చేలా చేయడం వంటివి బాధ్యతలు తీసుకుంటున్నారు. లేదా బ్యాంకులు కూడా సుమారు సోలార్‌ ప్లాంట్ల ఏర్పాటుకు సిద్ధంగా ఉన్నవారికి సహకారం అందిస్తున్నాయి.

కరెంటు ఉత్పత్తి ఎలా అంటే?

సాధారణంగా ఎండ ఉన్న రోజుల్లో ప్రతి రోజూ ఒక కిలోవాట్‌కు 4 యూనిట్ల కరెంటు తయారవుతుంది. అంటే ఇంటిపై మూడు కిలోవాట్ల ప్లానళ్లు అమర్చుకుంటే రోజూ 12 (కిలోవాట్‌ అవర్‌) యూనిట్ల కరెంటు తయారవుతుంది. దీని ప్రకారం నెలకు 360 యూనిట్లు తయారవుతుంది. ఎండ లేని రోజుల్లో మాత్రం తగ్గిపోతుంది. ఎండాకాలంలో రోజుకు 15 యూనిట్లతో నెలకు 450 యూనిట్లు తయారవుతుంది. ఇందులో ఇంటి అవసరాలకు 200 యూనిట్లు ఖర్చు చేసినా మిగతా 160 నుంచి 250 యూనిట్ల కరెంటు డిస్కమ్‌ గ్రిడ్‌కు వెళ్లిపోతోంది.