అప్పుడు అదే రైట్, ఇప్పుడు ఇదే కరెక్ట్- వివాదస్పదంగా థర్డ్ అంపైర్ నిర్ణయాలు!

బోర్డర్ గావస్కర్​లో మరోసారి వివాదస్పద నిర్ణయం- ఈసారి సుందర్ బలి!

Washington Sundar Catch Out Controversy : బోర్డర్- గావస్కర్​ ట్రోఫీలో అంపైర్ నిర్ణయం మరోసారి కాంట్రవర్సీకి దారి తీసింది. టీమ్ఇండియా బ్యాటర్ వాషింగ్టన్ సుందర్ ఔట్ పట్ల థర్డ్ అంపైర్ నిర్ణయంపై కెప్టెన్ జస్ప్రీత్ బుమ్రా అసంతృప్తి వ్యక్తం చేశాడు. ఈ క్రమంలోనే థర్డ్ అంపైర్ గత మ్యాచ్​లో ఒకలా, ఈ మ్యాచ్​లో మరోలాగా వ్యవహరించారంటూ నెటిజన్లు కూడా మండిపడుతున్నారు.

ఇదీ జరిగింది
సిడ్నీ టెస్టు తొలి ఇన్నింగ్స్​లో టాస్ నెగ్గిన భారత్ బ్యాటింగ్ ఎంచుకుంది. ఈ ఇన్నింగ్స్​లో కమిన్స్​ వేసిన 66 ఓవర్​లో వాషింగ్టన్ సుందర్ (14 పరుగులు, 30 బంతుల్లో) వివాదాస్పద రీతిలో క్యాచ్ ఔటయ్యాడు. కమిన్స్ వేసిన బంతిని సుందర్ థర్డ్ మ్యాన్ దిశగా ఆడే ప్రయత్నం చేశాడు. అయితే బ్యాట్​ను తాకకుండానే బంతి కీపర్ చేతిలో పడింది. దీంతో ఆసీస్ ప్లేయర్లు అప్పీల్ చేశారు. ఫీల్డ్ అంపైర్ నాటౌట్ ఇవ్వగా, ఆసీస్ రివ్యూ కోరింది.

థర్డ్ అంపైర్ పలు యాంగిల్స్​లో బంతిని పరిశీలించాడు. ఆ బంతి సుందర్ గ్లౌవ్​ను తాకిందా? లేదా అని స్నికో మీటర్ సాయంతో రిప్లైలో పలుమార్లు పరిశీలించాడు. అయితే అది ఓ యాంగిల్​లో తాకనట్లు, మరో యాంగింల్​లో తాకినట్లు స్నికో మీటర్ స్పైక్ వచ్చింది. దీంతో అంపైర్ అది ఔట్​గా ప్రకటించాడు. దీంతో నాన్ స్ట్రైకర్‌గా ఉన్న బుమ్రా అసంతృప్తి వ్యక్తం చేశాడు.

JASPRIT BUMRAH IS NOT HAPPY WITH WASHINGTON SUNDAR DECISION:

- Bumrah saying " last game he didn't give it out on snicko and now this give out".pic.twitter.com/TNl69lFcY5

— Tanuj Singh (@ImTanujSingh) January 3, 2025

గత మ్యాచ్​లో ఒకలా, ఇప్పుడు మరోలా నిర్ణయాలు తీసుకుంటున్నట్లు బుమ్రా అన్నాడు. 'గత మ్యాచ్‌లో స్నికో మీటర్ ఆధారంగా నిర్ణయం తీసుకోలేదు. ఈ మ్యాచ్‌లో మాత్రం స్నికోలో స్పైక్ వచ్చిందని ఔటిచ్చాడు'అని బుమ్రా అన్న మాటలు స్టంప్ మైక్​లో రికార్డ్ అయ్యాయి. అయితే మెల్​బోర్న్​ మ్యాచ్‌ రెండో ఇన్నింగ్స్​లో యశస్వీ జైస్వాల్ ఔట్ కూడా ఇలాగే వివాదస్పదం అయ్యింది. అప్పుడు స్నికో మీటర్​లో స్పైక్ రాకున్నా, బంతి గమనం మారిందని అంపైర్ ఔట్​గా ప్రకటించాడు.

ఇక మ్యాచ్ విషయానికొస్తే, తొలి ఇన్నింగ్స్​లో భారత్ 185 పరుగులకు ఆలౌటైంది. రిషభ్ పంత్ (40 పరుగులు) టాప్ స్కోరర్. ఆసీస్ బౌలర్లలో స్కాట్ బొలాండ్ 4, మిచెల్ స్టార్క్ 3, కమిన్స్ 2, లియాన్ 1 వికెట్ దక్కించుకున్నారు. మరోవైపు ఆసీస్ 9-1తో కొనసాగుతోంది.