రామోజీరావు కృషికి నిరుపమానం - ఆతిథ్యరంగ సంస్థల్లో ప్రముఖ స్థాయిలో డాల్ఫిన్ హోటళ్లు - Dolphin Hotels History

Dolphin Hotels History: దేశంలోనే పేరొందిన డాల్ఫిన్ హోటళ్లు రామోజీరావు కృషితో మేటి ఆతిథ్యరంగ సంస్థల్లో ప్రముఖ స్థాయికి ఎదిగాయి. ఈనాడు దినపత్రిక లాగానే విశాఖపట్నంలో మొదలైన డాల్ఫిన్ హైదరాబాద్‌లో అడుగు పెట్టడం విశేషం. ఈ హోటళ్ల సముదాయం ప్రపంచ స్థాయిలో ఐఎస్ఓ గుర్తింపు పొందింది. ఆహార నాణ్యతకు ఈ హోటళ్లు గీటురాయిగా నిలిచాయి. ఆతిథ్య సేవలకు అంతర్జాతీయ స్థాయిలో పేరొందిన ఈ హోటళ్ల శ్రేణిని తీర్చిదిద్దడంలో రామోజీరావు కృషి నిరుపమానం.

Ramoji Group Dolphin Hotels :సువిశాల రామోజీ ఫిలిం సిటీలో డాల్ఫిన్ గ్రూప్ రెండు ప్రతిష్టాత్మక హోటళ్లను నిర్మించింది. అవే తార, సితార. ఆధునిక సదుపాయాలతో దేశ, విదేశీ పర్యాటకులను ఆకట్టుకునే ఈ స్టార్ హోటళ్లు సౌకర్యవంతమైన వసతులకు పేరు పడ్డాయి. రామోజీరావు అసమాన కృషితో తయారైన డాల్ఫిన్ హోటళ్లు ఫిలిం సిటీలో ఏటా జరిగే వందలాది కార్పొరేట్ సదస్సులకు హాజరయ్యే ప్రముఖులకు బస సౌకర్యాన్ని కల్పిస్తున్నాయి. ఫిలిం సిటీలో 2002లో జరిగిన ప్రపంచ చదరంగ పోటీలకు హాజరైన దేశ, విదేశీ ప్రములందరికీ ఆతిథ్య సేవలందించిన కేంద్రాలివే. అదే సంవత్సరం జరిగిన నేషనల్ గేమ్స్‌కు ఆధికారిక ఆతిథ్య సంస్థగా క్రీడాకారులందరికీ డాల్ఫిన్ భోజన సదుపాయాలు కల్పించింది.

సితార థీమ్స్, రాయల్ స్వీట్స్ ప్రత్యేక ఆకర్షణ. ఆమ్రపాలి, క్లియోపాత్రా, మొఘల్-ఎ-ఆజమ్ థీమ్స్ స్వీట్స్ ఆయా సంస్కృతులకు అద్దం పడతాయి. బోబ్రా ది గ్రీక్, ఎంటర్ ది డ్రాగన్ రాయల్ స్వీట్స్ గ్రీస్, చైనా దేశాల అంలకరణలతో అలరిస్తాయి. ఇంకా ఈతకొలను, టెన్నిస్, బాస్కెట్ బాల్, స్క్వాష్ లాంటి క్రీడల కోసం కోర్టలు, విస్తృతమైన గ్రంథాలయం, హెల్త్ క్లబ్, యోగా సెంటర్‌లతో సకల సౌకర్యాలను ఒకచోట అందిస్తున్నారు.

రామోజీరావు దూరదృష్టితో హోటళ్ల నిర్మాణం :ప్రముఖ కార్పొరేట్ కంపెనీలు అధికారిక సమావేశాలను, కాన్ఫరెన్సులను, సెమినార్లను నిర్వహించుకోవడానికి ఈ సౌకర్యాలు అనువుగా ఉంటాయి. అప్పటికప్పుడు వచ్చినా నేరుగా సమావేశాల్లో పాల్గొనడానికి వీలుగా ఏర్పాట్లు ఉండటం విశేషం. రామోజీరావు దూరదృష్టితో ఫిలిం సిటీలో డాల్ఫిన్ శ్రేణిలోనే సహారా, శాంతినికేతన్ హోటళ్లు కూడా నిర్మించారు. ఫిలిం సిటీకి వచ్చే సినీరంగ ప్రముఖుల నుంచి లైట్ బాయ్స్ వరకు పలు రకాల వసతి ఏర్పాట్లను ఇవి అందిస్తాయి. వేర్వేరు స్థాయిల్లో ఏర్పాట్లు ఉండటం వల్ల సినీ నిర్మాతకు ఎంతో వ్యయం కలిసి వస్తుంది.

హొరైజాన్ 2010లో ఉత్తమ రెస్టారెంట్‌గా : రామోజీరావు కృషితో డాల్ఫిన్ సంస్థ తొలి అడుగు పడి దాదాపు నాలుగున్నర దశాబ్దాలు అవుతోంది. విశాఖలో మొదటి త్రీస్టార్ హోటల్‌గా డాల్ఫిన్ హోటల్ 1980లో మొదలైంది. నాలుగు అంతస్థులుగా మొదలై ఏండంతస్థులకు విస్తరించిన ఈ హోటల్ స్థాయి కూడా ఫోర్ స్టార్‌కు పెరిగింది. విశాఖలోనే ఉత్తమమైనదిగా 2008లో ప్రభుత్వ గుర్తింపు సాధించింది. ఇందులోని హొరైజాన్ 2010లో ఉత్తమ రెస్టారెంట్‌గా గుర్తింపు పొందింది.

దేశ, విదేశాల పర్యాటకులు ఎందరినో ఆకట్టుకున్న డాల్ఫిన్ హోటల్‌కు ఫెడరేషన్ ఆఫ్ హోటల్స్ అండ్ రెస్టారెంట్స్ అసోసియేషన్, ఇంటర్నేషనల్ హోటల్ అసోసియేషన్, ట్రావెల్ ఏజెంట్స్ అసోసియేషన్ ఆఫ్ ఇండియా సంస్థల్లో సభ్యత్వం ఉంది. ఈ హోటళ్ల శ్రేణిలో పనిచేస సిబ్బంది ఇక్కడ బస చేసే పర్యాటకులకు ఎలాంటి సమాచారం, సహకారం కావాలన్నా నిమిషాల్లో అందించగలిగిన విధంగా నడుచుకుంటారు. వినియోగదారుల అభిరుచులకు అనుగుణంగా ఏర్పాట్లు చేస్తారు. ఆతిథ్యానికి ఆత్మీయతను మేళవిస్తారు. దీనంతటి వెనుక ఉన్న కృషి, ఆలోచన అంతా రామోజీరావుదే.