Police Arrest People Illegally Transporting Deer Skins:జింక చర్మాలను అక్రమంగా రవాణా చేస్తున్న ముఠాని అనంతపురం జిల్లా పోలీసులు అరెస్ట్ చేశారు. వారి నుంచి 24 జింక చర్మాలు, రెండు కొమ్ములను పోలీసులు స్వాధీనం చేసుకున్నారు. పోలీసులు తెలిపిన వివరాలు ఇలా ఉన్నాయి. జిల్లాలోని వజ్రకరూరు మండలం కొనకొండ్ల వద్ద జింక చర్మాలు, కొమ్ములను అక్రమంగా తరలిస్తున్న ముఠాను అరెస్ట్ చేసినట్లు ఎస్ఐ నాగస్వామి తెలిపారు.
గుంతకల్లుకు చెందిన షికారి దేవరాజు, షికారి గోవిందు, షికారి బాబు, వడ్డే చిన్న ఫయాజీ అలియాస్ పెద్ద అంజి, షికారి బాలరాజులు గుంతకల్లు, ఆలూరు, చిప్పగిరి ప్రాంతాల్లో ఉచ్చులు ఏర్పాటు చేసి జింకలను వేటాడేవారు. వాటిని చంపి మాంసం విక్రయించి, చర్మాన్ని కర్ణాటకలోని బళ్లారి, కంప్లి, హొసపేటె ప్రాంతాల్లో విక్రయిస్తుంటారు. జింక చర్మాలను అక్రమంగా తరలిస్తున్నట్లు సమాచారంతో అటవీ శాఖ అధికారులు, వజ్రకరూరు పోలీసులు కలిసి దాడి చేసి సంచుల్లో ఉన్న చర్మాలు, కొమ్ములను స్వాధీనం చేసుకున్నట్లు చెప్పారు. నిందితులపై కేసు నమోదు చేసి రిమాండ్కు తరలిస్తున్నట్లు ఎస్ఐ నాగస్వామి తెలిపారు.