మళ్లీ వరద - సంగారెడ్డిలో ఏకధాటిగా కురిసిన భారీ వర్షం - Heavy Rain in Sangareddy

Heavy Floods in Sangareddy: తెలంగాణలో మంగళవారం అర్ధరాత్రి కురిసిన భారీ వర్షానికి సంగారెడ్డి పట్టణం తడిసి ముద్దయ్యింది. గత నెల సెప్టెంబర్​లో వర్షాలకు వరద ముంచెత్తగా నిన్న(అక్టోబర్​ 1) కూడా అదే పరిస్థితి తలెత్తింది. దీంతో వాహనదారులు తీవ్ర ఇబ్బందులు పడ్డారు. విద్యుత్తు సరఫరాకు తీవ్ర అంతరాయం కలిగింది.

Heavy Rain in Sangareddy in telangana :సంగారెడ్డి జిల్లా కేంద్రంలో నిన్న(అక్టోబర్​ 01) రాత్రి కురిసిన భారీ వర్షానికి లోతట్టు ప్రాంతాలు జలమయమయ్యాయి. మరోసారి సంగారెడ్డిలోని పలు ప్రాంతాలు నీట మునిగే పరిస్థితి ఏర్పడింది. పట్టణంలో ఏకధాటిగా 2 గంటల వ్యవధిలో 10 సెంటీ మీటర్ల వర్షం కురిసింది. విద్యుత్ సరఫరాకు తీవ్ర అంతరాయం ఏర్పడింది. నేషనల్ మార్టు సమీపంలో రోడ్డుపై వరద నీరు భారీగా చేరింది. అదే సమయంలో రోడ్డుపై వెళ్తున్న ఆర్టీసీ సూపర్​ లగ్జరీ బస్సు వరద నీటిలో చిక్కుకుంది. బస్సులో నుంచి ప్రయాణికులు బయటకు రావడానికి తీవ్ర అవస్థలు పడ్డారు.

జిల్లాలోని పలు అపార్టుమెంట్​లలో వరద నీరు చేరడంతో అధికారులు మోటార్లు పెట్టి వరద నీటిని బయటకు పంపే ప్రయత్నాలు చేశారు. సెల్లార్​లో పార్క్​ చేసిన వాహనాలు సైతం వరద నీటీలో మునిగిపోయాయి. ద్విచక్రవాహనాలు వరదనీటిలో కొట్టుకుపోయే పరిస్థితి ఏర్పడింది. ఓ ద్విచక్ర వాహనం వరదలో కొట్టుకుపోగా దాన్ని కాపాడుకునేందుకు ఇద్దరు యువకులు తీవ్రంగా శ్రమించాల్సి వచ్చింది. వరద ప్రవాహం వేగంగా ఉండటంతో ప్రజలు భయబ్రాంతులకు గురయ్యారు.