అజ్ఞాతం వీడిన అవినాష్‌రెడ్డి పీఏ రాఘవరెడ్డి - కడప సైబర్ క్రైం స్టేషన్​లో విచారణ

కడపలో పోలీసు విచారణకు హాజరైన అవినాష్‌రెడ్డి పీఏ రాఘవరెడ్డి

Police Questioned YS Avinash Reddy PA : వైఎస్సార్సీపీ ఎంపీ వైఎస్ అవినాష్‌రెడ్డి పీఏ రాఘవరెడ్డి ఈ రోజు కడపలో పోలీసుల విచారణకు హాజరయ్యారు. వర్రా రవీందర్‌రెడ్డి కేసులో ఆయన ఆరోపణలు ఎదుర్కొంటున్న విషయం తెలిసిందే. అవినాష్​రెడ్డి పీఏ ఇచ్చిన కంటెంట్​ని తాను సోషల్ మీడియాలో పోస్ట్ చేశానని వర్రా పోలీసులకు తెలిపాడు. ఈ మేరకు రాఘవరెడ్డి కోసం పోలీసులు గాలించగా అజ్ఞాతంలోకి వెళ్లిపోయాడు. మరోవైపు ఈనెల 12 వరకు ఆయణ్ని అరెస్ట్ చేయవద్దని హైకోర్టు ఆదేశాలు ఇచ్చింది.

దీంతో నెల రోజుల తర్వాత ఆదివారం నాడు రాఘవరెడ్డి పులివెందులలో ప్రత్యక్షమ్యయాడు. ఈ క్రమంలోనే పోలీసులు ఆయనకు 41ఏ నోటీసులు ఇచ్చారు. సోమవారం ఉదయం 10 గంటలకు కడప సైబర్ క్రైమ్ పోలీస్ స్టేషన్లో విచారణకు హాజరుకావాలని సూచించారు. నోటీసులు అందుకున్న రాఘవరెడ్డి ఇవాళ కడప సైబర్ క్రైమ్ పోలీస్ స్టేషన్​లో విచారణకు హాజరయ్యారు. తొలుత ఆయణ్ని సైబర్ క్రైమ్ సీఐ విచారించారు.

Varra Ravinder Reddy Case : ఈ క్రమంలోనే జిల్లా అదనపు ఎస్పీ ప్రకాష్​బాబు పోలీస్​స్టేషన్​కి వచ్చారు. రాఘవరెడ్డి విచారణ ఎంతవరకు వచ్చిందనే దానిపై సీఐతో చర్చించారు. ప్రస్తుతం డీఎస్పీ మురళీ నాయక్‌ రాఘవరెడ్డిని విచారిస్తున్నారు. సాయంత్రం వరకు విచారణ కొనసాగే అవకాశం ఉంది. మరోవైపు పులివెందుల నుంచి వైఎస్సార్సీపీ కార్యకర్తలు పెద్ద ఎత్తున పీఎస్​కు చేరుకున్నారు.