మజ్లిస్, కాంగ్రెస్ మధ్య సయోధ్య - చేతిలోన చెయ్యేసి సర్కార్‌కు ఒవైసీ భరోసా!

MIM With Congress in Telangana : పాతబస్తీలో మెట్రోరైలు శంకుస్థాపన మజ్లిస్, కాంగ్రెస్ మధ్య సయోధ్య కుదిర్చింది. హైదరాబాద్‌లో హస్తం పార్టీ ప్రభుత్వం చేసే అభివృద్ధి పనులకు మద్దతు ఇస్తామని ఎంఐఎం అధినేత అసదుద్దీన్ ఓవైసీ ప్రకటించగా మజ్లిస్‌ మద్దతుతో పాతబస్తీని అభివృద్ధి చేసి అసలైన హైదరాబాద్ అంటే ఏంటో చూపిస్తానని ముఖ్యమంత్రి రేవంత్‌రెడ్డి తెలిపారు. ఇలా ఇరు పార్టీల నేతల ప్రసంగాలు ఆసక్తికరంగా సాగడం పాతబస్తీలోని కాంగ్రెస్, మజ్లిస్‌ శ్రేణుల్లో ఉత్సాహాన్ని నింపింది.

AIMIM With Congress in Telangana : రాజకీయాలు ఎన్నికలప్పుడే అభివృద్ధి విషయంలో అంతా ఒక్కటే అంటున్నాయి కాంగ్రెస్, మజ్లీస్ పార్టీలు. హైదరాబాద్ అభివృద్ధి విషయంలో ఇరు పార్టీల ఆలోచనలు, విధానాలు ఒకటేనని ముఖ్యమంత్రి రేవంత్‌రెడ్డి (CM Revanth Reddy), ఎంఐఎం అధినేత అసదుద్దీన్ ఓవైసీ స్పష్టం చేశారు. మెట్రోరైలు విస్తరణలో భాగంగా ఎంజీబీఎస్ నుంచి ఫలక్‌నుమా వరకు పాతబస్తీలో మెట్రో మార్గానికి ఇద్దరు నేతలు కలిసి శంకుస్థాపన చేశారు.

CM Revanth Laid Foundation For Old City Metro Project : అనంతరం వేదికపై ఇద్దరు నేతలు ఆసక్తికర వ్యాఖ్యలు చేశారు. రేవంత్‌రెడ్డి మొండిఘటమని, పట్టుదలతో అనుకున్నది సాధించి తెలంగాణకు ముఖ్యమంత్రి అయ్యారని అసదుద్దీన్ ఓవైసీ ఆనందం వ్యక్తం చేశారు. అయితే ప్రజలు ఇచ్చిన ఐదేళ్ల అధికారాన్ని పూర్తిగా వినియోగించుకొని రాష్ట్ర అభివృద్ధికి పాటుపడాలని కోరారు. ఎన్నికల సమయంలో ఇచ్చిన వాగ్దానాలను అమలు చేయాలని ఆయన సూచించారు.

Asaduddin Owaisi on Congress Govt : హైదరాబాద్ అభివృద్ధిలో కాంగ్రెస్ ప్రభుత్వానికి తమ పార్టీ తరపున మద్దతు ఉంటుందని అసదుద్దీన్ ఓవైసీ (Asaduddin Owaisi) ప్రకటించారు. అంతేకాకుండా పాతబస్తీలో అభివృద్ధి పనులకు అడిగిన వెంటనే నిధులు సమకూర్చిన రేవంత్‌రెడ్డికి ధన్యవాదాలు తెలిపారు. ముఖ్యమంత్రి చిరకాల కోరిక అయిన మూసీనది అభివృద్ధికి తమవంతు సహకారం అందిస్తామని వెల్లడించారు. ఉస్మానియా ఆసుపత్రికి కొత్త భవనం నిర్మించాలని, చంచల్ గూడ జైలును తరలించి ఆ ప్రదేశంలో పేదల కోసం విద్యాసంస్థను నిర్మించాలని ఆయన ముఖ్యమంత్రిని కోరారు. తెలంగాణలో కొన్ని శక్తులు విధ్వంసానికి కుట్రు చేస్తున్నాయని, రాష్ట్రాన్ని శాంతియుతంగా ముందుకు తీసుకెళ్లాలని అసదుద్దీన్ ఓవైసీ సూచించారు.

CM Revanth on Hyderabad Development : అసదుద్దీన్ ఓవైసీ విజ్ఞప్తిపై స్పందించిన రేవంత్‌రెడ్డి చంచల్‌గూడ జైలును తరలించి కేజీ టూ పీజీ వరకు ఆ పరిసర ప్రాంత పేద ప్రజలకు ఉపయోగపడే విద్యాసంస్థను నిర్మిస్తామని ప్రకటించారు. అలాగే తన హయాంలో తప్పకుండా ఉస్మానియా ఆసుపత్రికి కొత్త భవనం నిర్మిస్తామని హామీ ఇచ్చారు. స్థానిక ప్రజల మద్దతుతో అక్బరుద్దీన్, అసదుద్దీన్ వరుసగా గెలుస్తూ వస్తున్నారని తెలిపారు. అయితే రాజకీయాలు కేవలం ఎన్నికల వరకు మాత్రమేనని, మిగిలిన సమయమంతా అభివృద్ధి పనులపై దృష్టి పెడుతామని రేవంత్‌రెడ్డి చెప్పారు.

ప్రజా సమస్యలపై పోరాటం తప్ప ఎవరిపై వ్యక్తిగత కక్షలు లేవని రేవంత్‌రెడ్డి అన్నారు. నగరం అభివృద్ధి చెందాలంటే నాయకుల సహకారం కావాలనే ఉద్దేశంతో లండన్ పర్యటనలో అక్బరుద్దీన్ ఓవైసీని వెంట తీసుకెళ్లినట్లు గుర్తుచేశారు. అసలైన హైదరాబాద్ ఎలా ఉంటుందో ఎంఐఎంతో కలిసి పాతబస్తీని అభివృద్ది చేసి చూసిస్తామని హామీ ఇచ్చారు. 2014 నుంచి 2023 వరకు బీఆర్ఎస్ అధికారంలో ఉంటే కాంగ్రెస్ ప్రభుత్వం రాష్ట్రంలో 2034 వరకు అధికారంలో కొనసాగుతుందని రేవంత్‌రెడ్డి ధీమా వ్యక్తం చేశారు.

"రాజకీయాలు వేరు అభివృద్ధి వేరు. హైదరాబాద్‌లో ప్రతి గల్లీలో అభివృద్ధికి నేను భరోసా ఇస్తున్నాను. కాంగ్రెస్ ప్రభుత్వం రాష్ట్రంలో 2034 వరకు అధికారంలో కొనసాగుతుంది. అసలైన హైదరాబాద్‌ ఎలా ఉంటుందో ఎంఐఎంతో కలిసి పాతబస్తీని అభివృద్ది చేసి చూసిస్తాం. అభివృద్ధి పనులకు మా సహకారం ఎప్పుడూ ఉంటుంది." - రేవంత్‌రెడ్డి, ముఖ్యమంత్రి

పార్లమెంట్ ఎన్నికల వేళ రేవంత్‌రెడ్డి, అసదుద్దీన్ ఓవైసీ పరస్పరం ఒకరినొకరు పొగుడుకుంటూ ప్రసంగించడం ఇరుపార్టీల శ్రేణుల్లో ఉత్సాహాన్ని నింపింది. సభకు హాజరైన స్థానిక ప్రజలు, ఇరు పార్టీల కార్యకర్తలు ఎంఐఎం, కాంగ్రెస్ పార్టీలకు మద్దతుగా నినాదాలు చేశారు. రేవంత్‌రెడ్డి తరుచూ పాతబస్తీకి రావాలంటూ ప్లకార్డులు ప్రదర్శిస్తూ హర్షం వ్యక్తం చేశారు. అయితే అసెంబ్లీ ఎన్నికల్లో బీఆర్ఎస్‌కు మద్దతు ప్రకటించిన మజ్లిస్ పార్లమెంట్ ఎన్నికల సమయంలో హస్తంవైపు తిరగడం రాజకీయాల్లో చర్చనీయాంశంగా మారింది.