గూగుల్​మ్యాప్స్​ను నమ్మారు - సీదా పోల్​కు ఢీ కొట్టారు

గూగుల్​మ్యాప్స్​ను నమ్మి రోడ్డు ప్రమాదానికి గురైన ఇద్దరు వ్యక్తులు - ఓ వ్యక్తి రెండు కాళ్లకు తీవ్రగాయాలు

Man Gets Into Road Accident After Trusting Google Maps in Amberpet :గూగుల్​ మ్యాప్స్​ నమ్మి బైక్​పై వెళ్లిన వ్యక్తి రోడ్డు ప్రమాదానికి గురైన ఘటన హైదరాబాద్​లోని కాచిగూడ పోలీస్​ స్టేషన్​ పరిధిలోని అంబర్​పేట్​లో చోటుచేసుకుంది. పోలీసులు తెలిపిన వివరాల ప్రకారం ఈసీఐఎల్​కు చెందిన ఇమాముద్దీన్​ గతరాత్రి ఒంటిగంట సమయంలో తన మిత్రుడు విశ్వజిత్​తో కలిసి ఎంజీబీఎస్​ నుంచి ఈసీఐఎల్​కు బయలుదేరాడు. అయితే ఈసీఐఎల్​కు వెళ్లడానికి గూగుల్​ మ్యాప్స్​ను ఆన్​ చేసుకున్నారు. మ్యాప్స్​ను తన ఫోన్లో ఆన్​ చేసిన ఇమాముద్దీన్​ విశ్వజిత్​కు ఇచ్చాడు. వారిద్దరు గోల్నాక సమీపంలో ఫోన్లో​ నిర్మాణంలో ఉన్న ఫ్లైఓవర్​ నుంచి వెళ్లాలని దారి చూపించింది. దీంతో వారిద్దరు ప్లైఓవర్​ పైకి వెళ్లారు. చిమ్మ చీకటిలో ఫ్లైఓవర్​ పై అడ్డంగా ఉన్న పైపును ఢీ కొట్టడంతో కింద పడ్డారు.

నూతనంగా నిర్మిస్తున్న ఫ్లైఓవర్​ పనులు తుది దశకు వచ్చాయి. కాంట్రాక్టర్ ఫ్లైఓవర్​ పైకి ఎవరు వెళ్లకుండా ఇనుప స్తంభాన్ని అడ్డంగా పెట్టాడు. దాన్ని గమనించని వారు గూగుల్ మ్యాప్​ను నమ్ముకొని వేగంగా వెళ్లడంతో స్తంభానికి తగిలి కిందపడ్డారు. ఈ ప్రమాదంలో ఇమాముద్దీన్​ రెండు కాళ్లకు తీవ్ర గాయలయ్యాయి. వెనుక కూర్చున్న అతని మిత్రుడు విశ్వజిత్​కు స్వల్ప గాయలయ్యాయి. ఇమాముద్దీన్​ను చికిత్స నిమిత్తం ఉస్మానియా ఆసుపత్రికి తరలించారు.

కాంట్రాక్టర్​ నిర్లక్ష్యం కారణంగానే ఈ ప్రమాదం జరిగిందని స్థానికులు ఆరోపిస్తున్నారు. ఫ్లైఓవర్​పైకి ఎవరు ఎక్కకుండా ప్రారంభంలోనే పెట్టాల్సిన పోల్​ను మధ్యలో పెట్టడం సరికాదన్నారు. అంబర్​పేట్​లో సుదీర్ఘకాలంగా కొనసాగుతున్న ఫ్లైఓవర్ నిర్మాణం వాహనదారులు తీవ్ర ఇబ్బందులకు గురవు తున్నారు. కాచిగూడ పోలీసులు కేసు నమోదు చేసుకుని దర్యాప్తు చేస్తున్నారు.