ఉద్దేశపూర్వకంగానే నిప్పు - మదనపల్లె ప్రమాదం వెనుక కుట్ర

జులై 21న మదనపల్లె సబ్‌కలెక్టర్‌ కార్యాలయంలో అగ్ని ప్రమాదం

Madanapalle Sub Collector Office Fire Incident Update :అన్నమయ్య జిల్లా మదనపల్లె సబ్‌ కలెక్టరేట్‌లో ఈ ఏడాది జులై 21న ఉద్దేశ పూర్వకంగానే అగ్గి రాజేశారని, రికార్డులను తగలబెట్టడం ద్వారా భూ అక్రమాల సాక్ష్యాధారాల్ని ధ్వంసం చేసేందుకే ఈ దురాగతానికి పాల్పడ్డారని ప్రాథమిక విచారణలో వెల్లడైనట్లు రెవెన్యూశాఖ ప్రత్యేక ప్రధాన కార్యదర్శి సిసోదియా వెల్లడించారు. ఇంజిన్‌ ఆయిల్‌ కొనుగోలు చేసి అక్కడ నిల్వ చేశారని పేర్కొన్నారు. ఆర్డీవోలుగా పని చేసిన మురళి, హరిప్రసాద్, సీనియర్‌ అసిస్టెంట్‌ గౌతమ్‌తేజ్‌ నాయుడుతో పాటు మాజీ మంత్రి పెద్దిరెడ్డి రామచంద్రారెడ్డి పీఏ తుకారాం, సన్నిహితుడు మాధవరెడ్డి పాత్ర ఉన్నట్లు ప్రాథమిక ఆధారాల ద్వారా తెలుస్తోందని వివరించారు.

మదనపల్లె సబ్‌ కలెక్టరేట్‌లో అగ్నిప్రమాదం, భూ కుంభకోణాలకు సంబంధించి ఇప్పటికే విధుల నుంచి సస్పెండైన పూర్వ ఆర్డీఓలు మురళి, హరిప్రసాద్, సీనియర్‌ సహాయకుడు గౌతమ్‌తేజ్‌లపై అభియోగాలు నమోదు చేస్తూ రెవెన్యూశాఖ ప్రత్యేక ప్రధాన కార్యదర్శి సిసోదియా గురువారం (నవంబర్​ 14న) ఉత్తర్వులు ఇచ్చారు. నిషిద్ధ జాబితా నుంచి చుక్కల భూములు, డి.పట్టా భూముల్ని తప్పించడంలో మాజీ మంత్రితో పాటు పలువురు అవకతవకలకు, అవినీతికి పాల్పడ్డారని ఉత్తర్వుల్లో పేర్కొన్నారు. ప్రాథమిక నివేదికలో గుర్తించిన పలు అంశాలను ఉత్తర్వుల్లో తెలియజేశారు.

ఎసైన్డ్‌ భూములపై హక్కులకు : మదనపల్లె సబ్‌ డివిజన్‌లో 79,107 ఎకరాలకు పూర్తి హక్కులు (Free Hold) కల్పించాలని ఎమ్మార్వో నుంచి ప్రతిపాదనలు అందాయి. 74,374 ఎకరాలకు జిల్లా కలెక్టర్‌ ఉత్తర్వులు ఇచ్చారు. మిగిలిన 4,732 ఎకరాలను కలెక్టర్​ తిరస్కరించారు. ఎమ్మార్వో నుంచి అందిన ప్రతిపాదనల్లో 2003 తర్వాత ఎసైన్‌ చేసిన భూములు, వివాదాలు, కోర్టు కేసులు నడుస్తున్నవి, ప్రభుత్వ భూములు తదితరాలు ఉన్నాయి. వీటి అన్నింటికీ పూర్వస్థాయి కల్పించాల్సిన అవసరం ఉంది. అప్పటి మదనపల్లె ఆర్డీవో కూడా కలెక్టరేట్‌కు అక్రమంగా కొన్ని ప్రతిపాదనలు పంపినట్లు సమాచారం.

మురళిని వారంవారం కలిసిన తుకారాం, మాధవరెడ్డి :మాజీ మంత్రి పెద్దిరెడ్డి రామచంద్రా రెడ్డి పీఏ తుకారాం, సన్నిహితుడు మాధవరెడ్డి ప్రతి వారంవారం పూర్వ ఆర్డీవో (EX RDO) మురళిని కలిసేవారని, ఆయన ఇంటికి వెళ్లేవారని, నగదు లావాదేవీలను నేరుగా నిర్వహించేవారని ఆర్డీవో సీసీ మణి ముదలియార్‌ పేర్కొన్నారు. వారు వెళ్లిపోయాక ఆర్డీవో ఫోన్‌ చేసి గౌతమ్‌తేజ్‌ను పిలిచేవారని తెలిపారు. దస్త్రాలను అనుకూలంగా తయారు చేయాలని అతనికి చెప్పేవారని వివరించారు. 22ఎ డీ నోటిఫికేషన్‌ నివేదికలను మార్చి, వారికి అనుకూలంగా ఇవ్వాలని ఎమ్మార్వోకు కొన్ని సార్లు మురళి సూచించారు.

2024 ఫిబ్రవరిలో ఆర్డీవోగా హరిప్రసాద్‌ బాధ్యతలు స్వీకరించిన తర్వాత మాధవరెడ్డిని కలిసేందుకు ప్రయత్నించినా కుదరలేదని మణి ముదలియార్​ పేర్కొన్నారు. పీలేరు ఎమ్మెల్యే పీఏ సత్యనారాయణ వారానికి మూడు, నాలుగుసార్లు ఆర్డీవోను కలిసేవారని పేర్కొన్నారు. ఆయన వెళ్లిపోయాక గౌతమ్‌తేజ్‌కు ఫోన్‌ చేసి నివేదికలను అనుకూలంగా తయారు చేసి తమకు ఇవ్వాలని హరిప్రసాద్‌ ఒత్తిడి చేశారని వివరించారు. ఆర్డీవోలుగా పనిచేసిన మురళి, హరిప్రసాద్‌ హయాంలో నగదు చేతులు మారిందని ముదలియార్‌ వెల్లడించారు. 500 ఎకరాల 22ఎ నిషిద్ధ జాబితా భూములతో పాటు 13 వేల ఎకరాల ఎసైన్డ్‌ భూములపై పూర్తి హక్కుల దస్త్రాలను ప్రాసెస్‌ చేసినట్లు గౌతమ్‌తేజ్‌ విచారణలో వెల్లడించారు.

ఎం.ఎస్‌.మురళి (EX RDO) : లంచాలు తీసుకుని, నిషిద్ధ జాబితా నుంచి భూముల్ని తప్పించేందుకు రెవెన్యూ సిబ్బంది సిద్ధం చేసిన దస్త్రాలకు ఆమోదముద్ర వేశారు. ఈ అంశంలో ఉన్నత అధికారులను తప్పుదోవ పట్టించారు. నకిలీ దస్త్రాలనూ సృష్టించారు. చుక్కల భూముల క్రమబద్ధీకరణ, డి-పట్టాలపై యాజమాన్య హక్కులు కల్పించడంలో ప్రజాప్రతినిధులు, ప్రైవేట్‌ వ్యక్తులకు పూర్తిగా సహకరించారు. భూముల వ్యవహారానికి సంబంధించిన నకిలీ దస్త్రాలను పుట్టించారు.

సి.హరిప్రసాద్‌ (EX RDO): మదనపల్లె ఆర్డీఓగా ఉన్న సమయంలో సబ్‌-కలెక్టర్‌ కార్యాలయంలో జులై 10, 2024 నుంచి సీసీ కెమెరాలు పనిచేయ లేదు. మంట పెట్టేందుకు ఉపయోగించే మెటీరియల్‌ను సిబ్బంది కార్యాలయంలోనికి తీసుకు వస్తున్నా గమనించలేదు. పర్యవేక్షణ అధికారిగా విధుల నిర్వహణలో నిర్లక్ష్యంగా వ్యవహరించారు. అందుకు ఫలితంగా కీలకమైన భూముల రికార్డులు కాలిపోయాయి.

గౌతమ్‌తేజ్‌ నాయుడు(Former Senior Assistant): నిషిద్ధ జాబితా నుంచి భూముల్ని తప్పించడంలో కీలకంగా వ్యవహరించారు. వాస్తవాల్ని స్వార్థ ప్రయోజనాలతో వక్రీకరించి, ఉన్నత అధికారులను తప్పుదోవ పట్టించారు. మంటలకు దోహదం చేసేలా ఇంజిన్‌ ఆయిల్, మస్కిటో రిపెల్లెంట్‌ను సబ్​ కలెక్టర్​ కార్యాలయంలో ఉంచారు. అక్కడ మంటలు చెలరేగడంలో కీలకంగా వ్యవహరించారు.