Hyderabad Metro Coaches Capacity :మెట్రో రైళ్లలో రద్దీ కష్టాలు ఇప్పట్లో తీరేలా లేవు. పుణె, నాగ్‌పుర్ నుంచి లీజు పద్ధతిలో కోచ్‌లను తీసుకురావాలనే ప్రయత్నాలూ ఫలించలేదు. దీంతో కొత్త కోచ్‌లు కొనేందుకు ఎల్ అండ్‌ టీ హైదరాబాద్ మెట్రో రైలు సంస్థ దేశీయంగా మెట్రో కోచ్‌లు తయారు చేసే 3 సంస్థలతో చర్చలు జరుపుతోంది. ఆర్డర్‌ ఇచ్చిన తర్వాత, తయారు చేసి సరఫరా చేసేందుకు 18 నెలల సమయం పడుతుందని అధికారులు అంటున్నారు. వెరసి మరో రెండు సంవత్సరాలైనా పడుతుంది. అదీ కూడా ప్రభుత్వం ఆర్థిక తోడ్పాటు అందిస్తేనే. అప్పటి వరకు ఇప్పుడు ఉన్న కోచ్‌లతోనే సర్దుబాటు చేసుకోక తప్పదని మెట్రో అధికారులు అంటున్నారు. లీజుకు తీసుకునేందుకు పుణె, నాగ్‌పుర్ మెట్రో రైళ్లను సంప్రదించినా, అక్కడ కూడా రద్దీ పెరుగుతుండటంతో ఇవ్వలేని పరిస్థితులు ఏర్పడ్డాయని అధికారులు తెలిపారు.
మెట్రో రైళ్లలో ఉదయం, సాయంత్రం సమయాల్లో రద్దీ ఎక్కువగా ఉంటోందని, కాలు లోపల పెట్టేంత స్థలం కూడా దొరకడం లేదని ప్రయాణికలు ఆవేదన వ్యక్తం చేస్తున్నారు. ముఖ్యంగా అమీర్‌పేట నుంచి రాయదుర్గం మార్గంలో మరింత అధికంగా రద్దీగా ఉంటుంది. మధ్యలోంచే కొన్ని మెట్రో రైళ్లను (షార్ట్‌ లూప్స్‌) నడుపుతున్నా సరిపోవడం లేదు.
నిత్యం సగటున 5 లక్షల మంది మెట్రో ప్రయాణం చేస్తున్నారు. ఇప్పుడు ఉన్న మెట్రో రైళ్లు 7 లక్షల వరకు సరిపోతాయని మెట్రో అధికారులు చెబుతున్నారు. కొద్దిగా క్రమ శిక్షణ పాటిస్తే కొత్త కోచ్‌లు వచ్చే వరకు వెసులుబాటు ఉంటుందని అంటున్నారు. తలుపుల వద్దే చాలా మంది ఉంటున్నారని, చాలా సార్లు లోపల ఖాళీగా ఉంటుందని తెలిపారు. ప్రయాణికులు సహకరిస్తే కొత్తవి వచ్చే వరకు ఇప్పుడు ఉన్న వాటితో సర్దుబాటు అవుతుందని అధికారులు అన్నారు.