DY CM Bhatti Vikramarka Campaign For Cong In Panjab :ఇండియా కూటమి అధికారంలోకి రాగానే చట్టబద్ధంగా రైతులకు కనీస మద్దతు ధరను అందిస్తామని ఉపముఖ్యమంత్రి భట్టి విక్రమార్క అన్నారు. అన్నదాతల కష్టానికి తగిన ఫలితం రాబోయే రోజుల్లో దక్కనుందని తెలిపారు. ఆదివారం పంజాబ్ రాష్ట్రంలోని ఫరీద్కోట్ లోక్సభ నియోజకవర్గ పరిధిలోని ఓ అసెంబ్లీ నియోజకవర్గ పరిధిలో భట్టి విక్రమార్క పాల్గొని ఎన్నికల సమావేశంలో ప్రసంగించారు.
Bhatti Vikramarka Comments On Modi :దేశంలో వరి, పత్తి, చెరకు రైతులకు మద్దతు ధర లభించడం లేదని, నరేంద్ర మోదీ నల్లచట్టాలు తెచ్చి వారి ధనాన్ని లాక్కోవడానికి ప్రయత్నిస్తున్నారని భట్టి విక్రమార్క ఆరోపించారు. దేశంలోని నిరుద్యోగులకు అప్రెంటీస్ హక్కు కల్పిస్తూ కొత్త చట్టాన్ని తీసుకొస్తామన్నారు. దేశంలోని పట్టభద్రులు, డిప్లమో చేసిన వారందరికీ ఈ హక్కు ఇవ్వబోతున్నామన్నారు. దేశంలోని పబ్లిక్ ప్రైవేటు సెక్టార్లలో సుమారు 30 లక్షల ఉద్యోగ ఖాళీలు ఉన్నాయన్నారు.
నిరుద్యోగులకు ఏడాదికి లక్ష రూపాయలు :ఆగస్టు 15 లోపు ఈ ఉద్యోగాలను ఇండియా కూటమి ప్రభుత్వం భర్తీ చేస్తుందని భట్టి విక్రమార్క స్పష్టం చేశారు. ప్రభుత్వ కార్యాలయాలు, ప్రభుత్వ వర్శిటీలు, కళాశాలలు, పాఠశాలలు, ఆసుపత్రుల్లో నిరుద్యోగులకు ఉపాధి కల్పిస్తామన్నారు. కోట్లాదిమంది నిరుద్యోగులకు ఏడాదికి లక్ష రూపాయల నగదు వారి బ్యాంకు ఖాతాల్లో జమ చేస్తామన్నారు. నెలకు రూ.8500 వేస్తామన్నారు. ప్రస్తుతం ఉపాధి హామీ కూలీలకు లభిస్తున్న రోజువారి కూలీలు రూ. 250 నుంచి రూ. 400 కు పెంచడంతోపాటు ఆశ అంగన్వాడీ మహిళల ఆదాయాన్ని రెట్టింపు చేస్తామని వివరించారు.
కాంగ్రెస్ ప్రభుత్వం కోట్లమందిని లక్షాధికారుల్ని చేస్తుంది :గత పదేళ్ల కాలంలో మోదీ 25 మందికి సంబంధించిన రూ. 16 లక్షల కోట్ల అప్పులు మాఫీ చేశారని భట్టి విక్రమార్క విమర్శించారు. ఆ విధంగా ఆయన 24 ఏళ్ల పాటు ఉపాధి హామీ పథకాన్ని అమలు చేసేందుకు సరిపడా డబ్బులను వారికి ఇచ్చారు అని తెలిపారు. బీజేపీ ప్రభుత్వం 25 మందిని కుబేరుని చేస్తే కాంగ్రెస్ ప్రభుత్వం కోట్లాదిమంది దేశ ప్రజల్ని లక్షాధికారులని చేస్తుందని భరోసా ఇచ్చారు. మోదీ, అమిత్ షా ఆందోళనలో ఉన్నారని అభివృద్ధిని చూసి ఓటు వేయమని మోదీ అడగడం లేదని విమర్శించారు.