మానేరు డ్యామ్​లో అడుగంటిన జలాలు - తాగునీటి సమస్యతో కరీంనగర్ వాసుల తిప్పలు - Drinking Water Crisis in Karimnagar

Drinking Water Problems In Karimnagar : వేసవి ముంగిట్లోకి వచ్చిన తరుణంలో కరీంనగర్‌ దిగువ మానేరు జలాశయంలో నీరు అడుగంటడం ఆందోళన కలిగిస్తోంది నగరంతోపాటు గ్రామాలకు తాగునీటిని అందించేందుకు నగరపాలక, మిషన్‌ భగీరథ అధికారులు ఈ జలాశయంపైనే ఆధారపడి నీటిని సరఫరా చేస్తుంటారు జలాశయం నుంచి నీటి శుద్ధి కేంద్రాలకు రావాటర్‌ పంపింగ్‌ చేసుకొని, శుద్ధ జలాన్ని గొట్టపు మార్గం ద్వారా ప్రజలకు సరఫరా చేస్తుంటారు. నగరానికి ప్రతి రోజు సరఫరా చేయాల్సి ఉండగా, నెల రోజులుగా పలు ప్రాంతాలకు రోజు విడిచి పంపిణీ చేస్తున్నారు. దీంతో వేసవి కాలంలో నీటి సరఫరా కోసం ప్రత్యామ్నాయ ఏర్పాట్లు చేయాలని స్థానికులు కోరుతున్నారు.

Drinking Water Problems In Karimnagar : కరీంనంగర్‌ నగర పాలక సంస్థ పరిధిలో తాగునీటికిఇక్కట్లు మొదలయ్యాయి. దిగువ మానేరు జలాశయంలో నీటి నిల్వలు వేగంగా అడుగంటుతున్నాయి. మేడిగడ్డ బ్యారేజీ కుంగిపోవడం(Medigadda Barrage Damage) వల్ల కాళేశ్వరం ఎత్తిపోతలు ఆగిపోయాయి. దీంతో వేసవిలో నీటి సరఫరాపై ఆందోళన నెలకొంది.

దిగువ మానేరు జలాశయంలో ప్రస్తుతం 5టీఎంసీల నీరు నిల్వ ఉంది. ప్రతి రోజు దిగువకు 3వేల249 క్యూసెక్కుల నీటిని వదులుతున్నారు. 2 వేల100 క్యూసెక్కుల నీరు మధ్య మానేరు నుంచి వస్తోంది. వచ్చే దాని కంటే అదనంగా 1149 క్యూసెక్కుల నీరు మానేరు నుంచి దిగువకు వదలాల్సిన పరిస్థితి. ప్రతిరోజు నీటిని సరఫరా చేసే నగరపాలక సంస్థ ఇప్పుడు రోజు విడిచి రోజు ఇస్తోంది.

"నీటి కొరత వల్ల మేము తీవ్ర ఇబ్బందులు ఎదుర్కొంటున్నాం. నీరు అరగంట కూడా సక్రమంగా రావట్లేదు. ఫలితంగా డబ్బులు పెట్టి ట్యాంకర్లను తెప్పించుకోవాల్సిన పరిస్థితి ఏర్పడింది. మార్చిలోనే పరిస్థితి ఇలా ఉంటే ఏప్రిల్, మేలో ఇంకా ఇబ్బందులు ఎదురయ్యే అవకాశం ఉంది. మా సమస్యకు పరిష్కారం చూపండి. " - స్థానిక మహిళ

నగరంలో మొదలైన తాగునీటికి ఇక్కట్లు :జలాశయంలో ప్రస్తుతం అయిదు టీఎంసీలే మిగిలి ఉంటుంది. అందులో రెండు టీఎంసీలు డెడ్‌ స్టోరేజీ, మూడు టీఎంసీల నీరు ఉండే అవకాశముంది. దీనితో ఇప్పటికే ఎలగందుల, సిద్దిపేట, నగరానికి తాగునీటికి కష్టాలు మొదలయ్యాయి. నగరపాలక నీటిశుద్ధి కేంద్రానికి 65 ఎంఎల్‌డీల రావాటర్‌ రావాల్సి ఉండగా 53 ఎంఎల్‌డీలు వస్తుండటంతో సరిపోవడం లేదు. 8 టీఎంసీలు నిల్వ ఉంటే తప్ప రోజు సరఫరా చేయడం సాధ్యం కాదంటున్నారు.

Drinking Water Crisis in Karimnagar :అసలే ఎండాకాలం, ఆపై నీరు లేకపోవడంతో నగర నీటి సరఫరాపైప్రభావం పడేలా కనిపిస్తోంది. జిల్లా ప్రజాప్రతినిధులు, ఉన్నతాధికారులు స్పందించి డ్యాంలో కనీస నిల్వలు ఉండేలా చర్యలు తీసుకోవాల్సిన అవసరముంది. తాగునీటి ఇక్కట్ల దృష్టిలో ఉంచుకుని ఎగువ జలాశలయాల నుంచి నీరు విడుదల చేయాలని మేయర్ సునీల్‌రావు ప్రభుత్వానికి విజ్ఞప్తి చేశారు.

"ఇక్కడి ప్రజలకు నీటి కష్టాలు తప్పడం లేదు. పొట్టకూటికోసం ఇతర ప్రాంతాలకు వెళ్లి తిరిగి వచ్చేటప్పటికీ నీరు లేకపోవడంతో మహిళలు చాలా ఇబ్బందులు ఎదుర్కొంటున్నారు. నీరు ఏ టైమ్​కు ఇస్తున్నారో కూడా చెప్పలేని పరిస్థితి తలెత్తింది. దిగువ మానేరు డ్యామ్​లో కేవలం తాగునీటికి మాత్రమే నీరు ఉన్నాయి. వాటిని ఇతర అవసరాల కోసం మల్లించకూడదు. మరి ఇలాంటి పరిస్థితి కొనసాగితే బెంగళూరు లాంటి పరిస్థితి ఉత్పన్నమయ్యే అవకాశం ఉంది" - సునీల్ రావు, మేయర్ కరీంనగర్

ఒకవైపు ప్రజలు తాగునీటికి ఇబ్బంది పడుతుంటే మరోవైపు మురుగు నీటికి సరైన కాల్వలు లేక పలు కాలనీల ప్రజలు తీవ్ర ఇబ్బందులు పడుతున్నారు. విద్యానగర్‌, శాతవాహన యూనివర్సిటీ ప్రాంతం నుంచి వచ్చే మురుగు నీటి కోసం సరైన కాల్వలు(Drainages) నిర్మించకపోవడం వల్ల తాము అనేక ఇబ్బందుల పడుతున్నామని ప్రజలు ఆవేదన వ్యక్తం చేస్తున్నారు. స్మార్ట్‌సిటీగా ఎంపికైన కరీంనగర్‌లో తాగునీరు, మురుగు నీటి ఇబ్బందులు ఎదుర్కోక తప్పడం లేదని ప్రజలు వాపోతున్నారు.