'పేర్ని నాని రెట్టింపు జరిమానా కట్టాలి- క్రిమినల్​ చర్యలు ఎదుర్కోవాలి'

పేర్ని నాని గోదాములో రూ.90 లక్షల బియ్యం మాయం-రెట్టింపు జరిమానా వసూలుకు పౌరసరఫరాల సంస్థ ఎండీ ఆదేశం

Criminal Proceedings Against Former Minister Perni Nani By Order Of Civil Supplies MD : మాజీ మంత్రి, వైఎస్సార్సీపీ కృష్ణా జిల్లా అధ్యక్షుడు పేర్ని వెంకట్రామయ్య (నాని) గోదాములో రేషన్‌ బియ్యం గల్లంతయ్యాయి. రాష్ట్ర పౌరసరఫరాల సంస్థ అద్దెకు తీసుకున్న ఈ గోదాములో దాదాపు రూ.90 లక్షల విలువైన బియ్యం లెక్కలు తేలలేదు. దీనిపై సమగ్ర విచారణ చేయాలని సంస్థ ఎండీ మన్‌జీర్‌ జిలానీ ఆదేశాలు జారీ చేశారు. బియ్యం గల్లంతుపై లెక్కలు తేల్చి రెట్టింపు జరిమానా, గోదాముల యజమానిపై క్రిమినల్‌ చర్యలు తీసుకోవాలని ఆదేశాలు జారీ చేశారు. ఆ ప్రకారం నాని దాదాపు రూ.1.80 కోట్లు జరిమానా చెల్లించడంతోపాటు క్రిమినల్‌ కేసులను ఎదుర్కోవాల్సి ఉంటుంది.

కృష్ణా జిల్లా మచిలీపట్నంలో పేర్ని నానికి చెందిన దాదాపు 40 వేల మెట్రిక్‌ టన్నుల సామర్థ్యం కలిగిన గోదాములను రాష్ట్ర గిడ్డంగుల సంస్థ ద్వారా పౌరసరఫరాల సంస్థ 2020లో వైఎస్సార్సీపీ హయాంలో అద్దెకు తీసుకుంది. బస్తాకు నెలకు రూ.5 వరకు అద్దె చెల్లిస్తుంది. దీన్ని బఫర్‌ - ఇన్వెస్టర్‌ గోదాములుగా వినియోగిస్తుంది. ఇక్కడ నిర్వహణ అంతా ప్రైవేటు యాజమాన్యం తీసుకుంటుంది. కేవలం పర్యవేక్షణ మాత్రం పౌరసరఫరాల సంస్థ చూస్తుంది. గోదాముల యజమాని ఆధ్వర్యంలోనే మేనేజర్, ఇతర సిబ్బంది ఉంటారు. కార్పొరేషన్‌ ఆధ్వర్యంలో జిల్లా మేనేజరు ఎప్పటికప్పుడు నిల్వలు పరిశీలించాల్సి ఉంటుంది.

తరుగు వచ్చిందని లేఖ రాసిన నాని :తమ గోదాములో ఆకస్మికంగా బియ్యం తరలించడం వల్ల తరుగు వచ్చిందని, దాదాపు 3,200 బస్తాలు తరుగు ఉన్నాయని ఆ మేరకు తాము సొమ్ములు చెల్లించేందుకు సిద్ధమంటూ గత నెల 27న పేర్ని నాని జిల్లా సంయుక్త కలెక్టర్‌ గీతాంజలి శర్మకు లేఖ రాశారు. దీంతో అధికారులు నవంబరు 28, 29 తేదీల్లో తనిఖీలు నిర్వహించారు. ఈ తనిఖీల్లో 3,700 బస్తాల (185 టన్నుల) బియ్యం తగ్గాయని, దీనిపై ఏం చర్యలు తీసుకోవాలో తెలియజేయాలంటూ పౌరసరఫరాల సంస్థ ఎండీకి అధికారులు లేఖ రాశారు. ప్రభుత్వ లెక్కల ప్రకారం టన్ను బియ్యం రూ.48,500 చొప్పునజజ గల్లంతైన బియ్యం విలువ రూ.89.72 లక్షలు. దీనికి రెట్టింపు జరిమానా వసూలు చేయాలని, క్రిమినల్‌ కేసులు నమోదు చేయాలని ఎండీ ఆదేశాలు జారీ చేశారు.

గోదామును బ్లాక్‌ లిస్ట్‌లో పెడతాం :దీనిపై పౌరసరఫరాల సంస్థ జిల్లా మేనేజర్‌ పద్మాదేవి మాట్లాడుతూ మరోసారి గోదాముల్లో బియ్యం బఫర్‌ స్టాక్‌తోపాటు పంపిణీ చేసిన వాటి వివరాలను సమగ్రంగా పరిశీలిస్తామని చెప్పారు. నివేదికను ప్రభుత్వానికి అందజేసి తక్కువ ఉన్న బియ్యానికి రెట్టింపు జరిమానాతో పాటు క్రిమినల్‌ చర్యలు తీసుకుంటామన్నారు. గోదామును బ్లాక్‌ లిస్టులో పెడతామని వెల్లడించారు.