Confusion In Selection Of Teacher Jobs In Nizamabad : డీఎస్సీ-2024లో ఉత్తీర్ణత సాధించిన అభ్యర్థుల్లో మెరిట్‌ ఆధారంగా జరిపిన ఎంపికల్లో గందరగోళం కొనసాగుతోంది. ఖమ్మం జిల్లాలో అర్హత లేని ఏడుగురిని ఎంపిక చేశారంటూ ఆలస్యంగా గుర్తించిన విద్యాశాఖ, ఈ వ్యవహారంలో బాధ్యులుగా పేర్కొంటూ ఇద్దరు ప్రధానోపాధ్యాయులపై సస్పెన్షన్‌ వేటు వేసింది. ఈ క్రమంలోనే శనివారం నిజామాబాద్ జిల్లాలో ఓ ఉపాధ్యాయురాలిని అనర్హురాలిగా పేర్కొంటూ అధికారులు ఉద్యోగం నుంచి తొలగిస్తున్నట్లు ఉత్తర్వులిచ్చారు.
ఎస్జీటీ తెలుగు మాధ్యమంలో 257వ ర్యాంకు సాధించిన ఉట్నూర్‌ లావణ్యకు నిజామాబాద్ జిల్లా ధర్పల్లి మండలం దుబ్బాక వడ్డెర కాలనీ ప్రాథమిక పాఠశాలలో పోస్టింగ్ ఇచ్చారు. గత నెల 16న బాధ్యతలు చేపట్టిన ఆమె, శనివారం వరకు (23 రోజులు) విధులు నిర్వర్తించారు. కాగా సాంకేతిక కారణాలతో పొరపాటున లావణ్య ఉద్యోగానికి ఎంపిక అయ్యారని, సర్టిఫికెట్ల పరిశీలనకు హాజరైన 125వ ర్యాంకు అభ్యర్థి భార్గవి గైర్హాజరైనట్లు చూపడంతో ఇలా జరిగిందని తెలిపారు. దీంతో దీనిని సరిచేసి లావణ్యను విధుల్లో నుంచి తొలగిస్తూ ఉత్తర్వులు ఇచ్చామన్నారు. దీంతో బాధితురాలు ప్రభుత్వం తనకు న్యాయం చేయాలంటూ రోధిస్తూ ఓ ఆడియోను సోషల్ మీడియాలో పోస్ట్ చేశారు. తనకు జరిగిన అన్యాయంపై సోమవారం ఉన్నతాధికారులను కలిసి వివరిస్తానని పేర్కొన్నారు. ఈ విషయంపై కలెక్టర్ రాజీవ్‌ గాంధీ హన్మంతు స్పందిస్తూ విచారణ చేయిస్తానని తెలిపారు.