మైండ్‌ను కంట్రోల్​లో పెట్టాలి - 'స్వచ్ఛ ఆంధ్ర'కై పని చేయాలి: సీఎం చంద్రబాబు

మన దేశం పరిశుభ్రంగా ఉండాలని గాంధీజీ తపించారు - స్వచ్ఛ ఆంధ్ర కోసం అందరూ కలిసి పని చేయాలన్న చంద్రబాబు

CM Chandrababu at NTR Death Anniversary Programme in Mydukur : ఇల్లు పరిశుభ్రంగా ఉంటేనే మన ఆలోచనలు బాగుంటాయని, ఇంటి పరిసరాల్లో ఆహ్లాదకర వాతావరణం ఉంటేనే ఏదైనా సాధించగలం అని సీఎం చంద్రబాబు తెలిపారు. ‘స్వచ్ఛ ఆంధ్ర’ కోసం అందరూ కలిసి పని చేయాలని చంద్రబాబు పిలుపునిచ్చారు. కడప జిల్లా మైదుకూరులో ‘స్వచ్ఛ ఆంధ్ర- స్వచ్ఛ దివస్‌’ను సీఎం ప్రారంభించారు. ఈ సందర్భంగా ఏర్పాటు చేసిన సభలో ఆయన మాట్లాడారు.

"మన దేశం పరిశుభ్రంగా ఉండాలని గాంధీజీ తపించారు. ప్రధాని మోదీ సారథ్యంలో స్వచ్ఛ భారత్‌ కార్యక్రమం చేపట్టాం. పారిశుద్ధ్య సాధన దిశగా దేశ ప్రజలంతా చేతులు కలపాలి. జపాన్‌లో రోడ్లు కూడా ఎంతో పరిశుభ్రంగా ఉంటాయి. అక్కడ కాగితం కూడా జేబులో పెట్టుకుని ఇంట్లోని చెత్తబుట్టలో వేస్తారు. మనం మాత్రం ఇంట్లో ఉండే చెత్తను రోడ్డుపై పోస్తున్నాం. గతంలో ఏ ఊరు వెళ్లినా చెత్తాచెదారం కనిపించేది. గ్రామాల్లో మహిళల పరిస్థితి చూసి ఎంతో బాధపడేవాడిని. ఆరోజుల్లో వంట చేయడం మహిళలకు నరకంగా ఉండేది. దీపం కార్యక్రమం కింద ఆనాడు ఉచితంగా గ్యాస్‌ కనెక్షన్లు ఇచ్చాం. ఇప్పుడు దీపం-2 కింద ఉచితంగా గ్యాస్‌ సిలిండర్లు ఇస్తున్నాం. ఆరోజు మేం ఇచ్చిన నివేదిక మేరకు స్వచ్ఛభారత్‌ కార్పొరేషన్‌ తెచ్చారు" అని చంద్రబాబు తెలిపారు.

"స్వచ్ఛ ఆంధ్ర కోసం సేవకులుగా పని చేస్తామని చాలా మంది వచ్చారు. సమాజహితం కోసం కష్టపడేవారిని మనమంతా గుర్తించాలి. మైదుకూరులో సరికొత్త చరిత్రకు శ్రీకారం చుట్టాం. ప్రతినెలా మూడో శనివారం స్వచ్ఛ ఆంధ్ర కోసం పని చేయాలి. తరతరాలుగా వస్తున్న అలవాట్లు త్వరగా పోవు. మంచి అలవాట్లు పాటించేందుకు చాలా సమయం పడుతుంది. చెడు ఆలోచనలు, చెడు పనులు చేయకుండా మన మైండ్‌ను నిత్యం మనమే కంట్రోల్‌ చేయాలి. పని ప్రాంతాన్ని కూడా అందరూ శుభ్రంగా ఉంచుకోవాలి ’’ అని సీఎం చంద్రబాబు సూచించారు.

అంతకుముందు మైదుకూరులో నందమూరి తారక రామారావు వర్ధంతి సభలో చంద్రబాబు పాల్గొన్నారు. ఎన్టీఆర్‌ విగ్రహానికి పూలమాల వేసి నివాళులు అర్పించారు. అనంతరం ప్రసంగించారు. తెలుగు జాతి చరిత్ర ఉన్నంత వరకూ తెలుగువారి గుండెల్లో ఉండే ఏకైక వ్యక్తి ఎన్టీఆర్‌ అని ముఖ్యమంత్రి చంద్రబాబు కొనియాడారు. అనుక్షణం తెలుగువారి ఆత్మగౌరవం కోసం తపించిన నాయకుడు అని పేర్కొన్నారు.

‘‘ఎన్టీఆర్‌ అంటే మూడు అక్షరాలు కాదు తెలుగువారి ఆత్మగౌరవం. పేదవాడి గుండెల్లో తీపి జ్ఞాపకం. ప్రభుత్వం అంటే పాలకులు కాదు సేవకులని చెప్పిన ఏకైక నాయకుడు. పేదవాళ్లకు పక్కా ఇళ్లు నిర్మించింది ఎన్టీఆర్‌’’ అని చంద్రబాబు కొనియాడారు. ఈ నెలాఖరులో వాట్సాప్‌ గవర్నెన్స్‌ తీసుకొస్తాం. ఏ పని కావాలన్నా ఒక మెసేజ్‌ పెడితే చాలు. మీ సమస్యల పరిష్కారానికి ఆఫీసులకు వెళ్లే పని లేదు. మీ ముందుకే వచ్చి సమస్యలు పరిష్కరించే ఏర్పాట్లు చేస్తున్నాం’’ అని చంద్రబాబు తెలిపారు.