కళ్లెదుటే కొట్టుకుపోయిన కర్షకుల కష్టం - కేంద్ర బృందం ఎదుట ఆవేదన వ్యక్తం - Central Team To Assess Flood Damage

Central Team To Assess Flood Damage: వరద నష్టం అంచనాల కోసం రాష్ట్రంలో కేంద్ర బృందం పర్యటన కొనసాగుతోంది. కృష్ణా, బాపట్ల జిల్లాల్లో దెబ్బతిన్న ఇళ్లు, పంట పొలాలను కేంద్ర బృందం పరిశీలించింది. నష్టపోయిన వారికి తగిన పరిహారం ఇవ్వాలని రైతులు, రైతు సంఘాలు, రాజకీయ పార్టీల నేతలు వినతి ప్రతాలు అందించారు.

Central Team To Assess Flood Damage :కళ్లెదుటే తమ కష్టం కొట్టుకుపోయిందని వరద బాధితులు కేంద్ర బృందానికి మొరపెట్టుకున్నారు. కేంద్ర హోంశాఖ సంయుక్త కార్యదర్శి అనిల్ సుబ్రమణియం నేతృత్వంలోని కేంద్ర బృందం కృష్ణ జిల్లా పెనమలూరు, పామర్రు, గుడివాడ నియోజకవర్గాల్లో పర్యటించింది. పెదపులిపాకలో దెబ్బతిన్న మొక్కజొన్న పంటలు, వరదలకు నీట మునిగిన ఇళ్లను పరిశీలించింది.

పెనమలూరు ఎమ్మెల్యే బోడె ప్రసాద్ యనమలకుదురు, పెదపులిపాక, మద్దురు, ఉప్పులూరు గ్రామాల్లో జరిగిన పంట, ఆస్తి నష్టం వివరాలను అధికారులకు అందించారు. చోడవరంలో బొప్పాయి, అరటి కంద వంటి దెబ్బతిన్న పంటల్ని పరిశీలించారు. సాగు మొదలు పెట్టిన 2 నెలలకే పంటలన్నీ కొట్టుకుపోయాయని పెనమలూరు రైతులు ఆవేదన వ్యక్తం చేశారు. బాధితులకు రైతు రుణాలను మాఫీ చేయాలని, మళ్లీ సాగు చేసుకునేందుకు ఎరువులు, విత్తనాలు అందిచాలని రైతు సంఘాల నేతలు కేంద్ర బృందాన్నికోరారు. కృష్ణా జిల్లా కలెక్టర్ బాలాజీ వరద నష్టం వివరాలను అధికారులకు వివరించారు.

పామర్రు ఎమ్మెల్యే కుమార్‌రాజ రొయ్యూరులో కేంద్రబృందాన్ని కలిసి వాడిపోయిన పంటలను చూపించారు. గుడివాడ నియోజకవర్గం పుట్టగుంట వద్ద నీట మునిగిన బుడమేరు బ్రిడ్జి, చేపల చెరువులను కేంద్ర బృందం పరిశీలించించింది. గుడివాడ ఎమ్మెల్యే వెనిగండ్ల రాము బుడమేరు విధ్వంసం గురించి వివరించారు.

బాపట్ల జిల్లా వేమూరు, రేపల్లె నియోజకవర్గంలో మరో కేంద్రం బృందం కృష్ణా నది వరదల విధ్వంసాన్ని పరిశీలించింది. రావి అనంతవరం వద్ద కరకట్ట లీకైన ప్రాంతాన్ని జిల్లా కలెక్టర్ వెంకట మురళి చూపించగా కరకట్ట పటిష్టం చేసేందుకు అవసరమైన ప్రతిపాదనలు పంపాలని కేంద్ర బృంద కోరింది. కృష్ణా నదికి కనీవినీ ఎరుగని వరద వచ్చి రూ.1085.46 కోట్ల నష్టం సంభవించినట్లు కేంద్ర బృందానికి బాపట్ల జిల్లా కలెక్టర్‌ వెంకటమురళి వివరించారు. గుంటూరు జిల్లా తాడేపల్లిలో వరద నష్టంపై ఏర్పాటు చేసిన ఛాయాచిత్ర ప్రదర్శనను కేంద్ర బృందం తిలకించింది.

లక్షల మందిపై వరద ప్రభావం :ప్రాథమిక అంచనాల ప్రకారం వరదలతో రాష్ట్రంలో వివిధ రంగాలకు రూ.6,880 కోట్ల నష్టం వాటిల్లిందని, మరింత పెరిగే అవకాశం ఉందని కేంద్ర బృందానికి అధికారులు నివేదించారు. ఏడు జిల్లాల్లో ప్రభావం అధికంగా ఉందని తెలిపారు. 10.63 లక్షల మంది ప్రభావితం అయ్యారని పేర్కొన్నారు. బాధితులకు న్యాయం జరిగేలా చూడాలని ప్రత్యేక ప్రధాన కార్యదర్శి ఆర్‌పీ సిసోదియా కోరారు. వరద నష్టం పరిశీలనకు వచ్చిన కేంద్ర బృందం, ప్రభావిత ప్రాంతాలకు వెళ్లేముందు కుంచనపల్లిలోని అధికారులతో సమావేశమైంది. నష్టం వివరాలతో కూడిన ప్రాథమిక నివేదికను సిసోదియా వారికి అందజేశారు.