నేడు బీజేపీ కేంద్ర ఎన్నికల కమిటీ భేటీ - రాష్ట్రంలో 10 మంది ఎంపీ అభ్యర్థిత్వాలపై రానున్న క్లారిటీ!

BJP Central Election Committee Meeting Today : ఈసారి ఎలాగైనా గతంలోలాగే పార్లమెంటు ఎన్నికల్లో రాష్ట్రంలో అధిక సీట్లు గెలుచుకోవాలని బీజేపీ భావిస్తోంది. 17 లోక్​సభ నియోజకవర్గాలను కవర్​ చేస్తూ కమలం పార్టీ విజయ సంకల్ప యాత్రల పేరుతో ముందుకు దూసుకుపోతుంది. ఇప్పుడు ఎవరెవరిని అభ్యర్థులుగా ఖరారు చేయాలి అన్న దానిపై నేడు బీజేపీ కేంద్ర ఎన్నికల కమిటీ సమావేశం కానుంది.

BJP Central Election Committee Meeting Today : పార్లమెంటు ఎన్నికలకు అభ్యర్థుల ఖరారే అజెండాగా బీజేపీ(BJP) కేంద్ర ఎన్నికల కమిటీ నేడు సమావేశం కానుంది. ఈ సమావేశంలో దేశవ్యాప్తంగా 120 సీట్లలో అభ్యర్థుల ఎంపికపై చర్చించనున్నట్లు పార్టీ వర్గాలు తెలిపాయి. రాష్ట్రంలో అభ్యర్థుల ఎంపికపైనా ఈ భేటీలో చర్చించనున్నారు. పార్టీ అధ్యక్షుడు జేపీ నడ్డా(JP Nadda) అధ్యక్షతన జరిగే ఈ సమావేశానికి రాష్ట్రానికి చెందిన కేంద్ర ఎన్నికల కమిటీ సభ్యుడు లక్ష్మణ్, పార్టీ రాష్ట్ర అధ్యక్షుడు కిషన్​ రెడ్డి, బండి సంజయ్​, డీకే అరుణ, ఈటల రాజేందర్​ హాజరు కానున్నారు.

తొలి జాబితాలో పది పేర్లు ప్రకటించే అవకాశం : తొలి జాబితా(TS BJP Lok Sabha First List)లో రాష్ట్రానికి చెందిన 10 మంది పేర్లు ఉండే అవకాశం కనిపిస్తోంది. ప్రస్తుతం ఉన్న 4 సిట్టింగ్‌ స్థానాలతో పాటు మహబూబ్‌నగర్‌, చేవెళ్ల, భువనగిరి, మెదక్‌ స్థానాలకు అభ్యర్థులను ప్రకటించనున్నట్లు పార్టీ వర్గాలు తెలిపాయి. సికింద్రాబాద్‌-కిషన్‌రెడ్డి, నిజామాబాద్‌-ధర్మపురి అర్వింద్‌, కరీంనగర్‌-బండి సంజయ్‌, ఆదిలాబాద్‌-సోయం బాపూరావు, భువనగిరి-బూర నర్సయ్య గౌడ్‌, చేవెళ్ల-కొండా విశ్వేశ్వర్‌రెడ్డి, మహబూబ్‌ నగర్‌-డీకే అరుణ అభ్యర్థిత్వాలు దాదాపు ఖరారైనట్లు సమాచారం.

Lok Sabha Election 2024 : ఈ క్రమంలో మల్కాజిగిరి స్థానానికి తీవ్రమైన పోటీ నెలకొంది. ఈటల రాజేందర్​, మురళీధర్​రావు, చాడ సురేశ్​ రెడ్డి, తూళ్ల వీరేందర్​ గౌడ్​, పన్నాల హరీశ్​ రెడ్డి మల్కాజ్​గిరి సీటును ఆశిస్తున్నారు. ఈటలకు మల్కాజ్​గిరి స్థానం కేటాయిస్తే రఘునందన్​ రావుకు మెదక్​ సీటు దక్కే అవకాశం ఉంది. ఒకవేళ మల్కాజిగిరి నుంచి మురళీధర్​రావుకు అవకాశం కల్పిస్తే ఈటలను మెదక్​ బరిలో నిలిపే అవకాశం ఉన్నట్లు తెలుస్తోంది.

బీజేపీ విజయ సంకల్ప యాత్రలు :ఈసారి జరిగే లోక్​సభ ఎన్నికల్లో రాష్ట్రంలో 10 ఎంపీ స్థానాలు గెలుపే లక్ష్యంగా బీజేపీ విజయ సంకల్ప యాత్ర(BJP Vijaya Sankalpa Yatra)ను ప్రారంభించింది. ఇందులో భాగంగా రాష్ట్రవ్యాప్తంగా ఐదు సంకల్ప యాత్రలను ప్రారంభించింది. కృష్ణమ్మ క్లస్టర్​, కుమురం భీం క్లస్టర్​, భాగ్యలక్ష్మి క్లస్టర్​, రాజరాజేశ్వర క్లస్టర్​ వంటి నాలుగు యాత్రలను ప్రారంభించగా, మరొకటి ఇంకా ప్రారంభించాల్సి ఉంది. ఈ క్లస్టర్స్​ అన్ని కలిపి రాష్ట్రవ్యాప్తంగా 17 పార్లమెంటు నియోజకవర్గాలను కవర్​ చేస్తాయి. కేంద్రంలో బీజేపీ ప్రభుత్వం తెలంగాణకు ఎన్ని నిధులు ఇచ్చింది, పథకాలు, కేంద్ర ప్రభుత్వ పథకాలు ద్వారా ఎంతమంది లబ్ధి పొందారనే విషయాలను నేరుగా రాష్ట్ర ప్రజలకు తెలియజేసే బాధ్యతను తీసుకున్నారు. ఈ సమావేశాలకు కేంద్రమంత్రులు, వివిధ బీజేపీ రాష్ట్రాల ముఖ్యమంత్రులు హాజరుకానున్నారు. ఈసారి బీజేపీ 400 పార్లమెంటు స్థానాలను గెలుచుకోవాలని భావిస్తోంది.