Sri Rama Temple in Singapore: తెలంగాణ కల్చరల్ సొసైటీ సింగపూర్ (TCSS) వారు భారత దేశం నుంచి ప్రత్యేకంగా తీసుకొచ్చిన అయోధ్య శ్రీ రాముల వారి ప్రాణ ప్రతిష్ట అక్షింతలను సింగపూర్లో నివసిసిస్తున్న భక్తులకు అందజేశారు. చాంగి గ్రామంలో ఉన్న శ్రీ రాముని గుడిలో ఎంతో కన్నుల పండుగగా ఈ కార్యక్రమాన్ని నిర్వహించారు. సింగపూర్లోని దేవాలయాల్లో ఈ ప్రక్రియ నిర్వహించే అవకాశం దక్కడం సొసైటీకి దక్కిన అదృష్టం అని సొసైటీ సభ్యులు తెలిపారు.
ఈ పవిత్ర కార్యంలో స్థానిక భక్తులందరూ భక్తిశ్రద్ధలతో రామ నామస్మరణ చేస్తూ పాల్గొని అక్షింతలతో పాటు ప్రసాదం స్వీకరించి శ్రీ రాముని పూజలో పాల్గొన్నారు. ఈ సందర్భంగా ఆలయ ప్రాంగణం అంతా జై శ్రీ రామ్ నామస్మరణతో మారుమోగింది. ఈ వేడుకల్లో చిన్న పెద్ద అనే తేడా లేకుండా అందరు శ్రీ రాముని సేవలో భక్తితో పరవశించిపోయారు.
శ్రీ రామ నామాలు జమ చేసే బ్యాంక్ - ఖాతాదారులకు సర్టిఫికెట్- ఎక్కడ ఉందంటే?
ఈ మహోత్సవంలో సుమారు ఒక వెయ్యి మంది వరకు భక్తులు పాల్గొని అయోధ్య శ్రీరామ పవిత్ర అక్షింతలను స్వీకరించారని నిర్వాహకులు తెలిపారు. ఈ సందర్భంగా భక్తులు మాట్లాడుతూ ఈ కార్యక్రమాన్ని సింగపూర్లో నిర్వహించిన తెలంగాణ కల్చరల్ సొసైటీ సింగపూర్ వారికి హృదయపూర్వక ధన్యవాదాలు తెలిపారు. దీంతో పాటు సొసైటీ స్థాపన నుంచి ఎలాంటి ఆడంబరాలకు పోకుండా, లాభాపేక్ష లేకుండా విభిన్న కార్యక్రమాలు నిర్వహిస్తున్న సొసైటీని స్థానికులు కొనియాడారు.
ఈ కార్యక్రమంలో తెలుగు వారితో పాటు ఇతర రాష్ట్రాల భక్తులు పెద్ద ఎత్తున శ్రీరాముని సేవలో పాల్గొని సహాయ సహకారాలు అందించిన దాతలకు ప్రతి ఒక్కరికి పేరు పేరున టీసీఎస్ఎస్ సభ్యులు కృతజ్ఞతలు తెలియజేశారు. ఈ సందర్భంగా ప్రతిఒక్కరికి సొసైటీ అధ్యక్షులు గడప రమేష్ బాబు, ప్రధాన కార్యదర్శి బసిక ప్రశాంత్ రెడ్డి, కోశాధికారి జూలూరి సంతోష్ కుమార్ మొదలైన వారు భక్తులందరికీ ధన్యవాదాలు తెలిపారు.
భారత్ నుంచి ఈ పవిత్ర అక్షింతలను సింగపూర్కి తీసుకురావడంలో ముఖ్య భూమిక పోషించిన గోనె నరేందర్ రెడ్డికి సభ్యులు కృతజ్ఞతలు తెలిపారు. అక్షింతల వితరణ కార్యక్రమం తమ ఆలయంలో నిర్వహించడం ఎంతో సంతోషంగా ఉందని శ్రీరామ ఆలయ అధికారులు తెలిపారు.
