విరాట్​కు అరుదైన గౌరవం- మైనపు విగ్రహ ఆవిష్కరణ- ఫొటోలు చూశారా? - Virat Kohli Wax Statue

Virat Kohli Wax Statue: టీమ్ఇండియా స్టార్ బ్యాటర్ విరాట్ కోహ్లీకి అరుదైన గౌరవం దక్కింది. జైపుర్ వాక్స్ మ్యూజియంలో విరాట్ మైనపు విగ్రహాన్నీ ఆవిష్కరించారు.

Virat Kohli Wax Statue:టీమ్ఇండియా స్టార్ బ్యాటర్ విరాట్ కోహ్లీకి అరుదైన గౌరవం దక్కింది. ప్రపంచ వారసత్వ దినోత్సవం సందర్భంగా గురువారం (ఏప్రిల్ 18) జైపుర్ నహర్‌ఘర్ వాక్స్ మ్యూజియంలో విరాట్ మైనపు విగ్రహాన్ని ఆవిష్కరణ జరిగింది. మ్యూజియం ఫౌండర్, డైరెక్టర్ అనూప్ ఈ విగ్రహాన్ని ఆవిష్కరించారు. ఈ విగ్రహం బరువు 35 కేజీలు ఉంటుందని అనూప్ పేర్కొన్నారు. ఇక ఈరోజు (శుక్రవారం) నుంచి టూరిస్ట్​లు చూడడానికి అనుమతి ఇచ్చారు.

టీమ్ఇండియా జెర్సీతో రెండు చేతుల్లో బ్యాట్ పట్టుకున్న విరాట్ విగ్రహం టూరిస్ట్​లను ఆకట్టుకుంటోంది. ఇక ఇప్పటికే దిల్లీ మేడమ్ టుస్సాడ్స్ మ్యూజియంలో విరాట్ మైనపు విగ్రహం ఉంది. ఈ మ్యూజియంలో క్రికెట్ గాడ్ సచిన్ తెందుల్కర్, టీమ్ఇండియా మాజీ కెప్టెన్ ఎమ్ ఎస్ ధోనీ విగ్రహాలు ఉన్నాయి. ఇక మ్యూజియం నిర్వాహకులు గత వారం ఈ మైనపు విగ్రహ ఫస్ట్​లుక్​ను రిలీజ్ చేశారు. 'గత కొంతకాలం నుంచి పర్యాటకులు, ముఖ్యంగా పిల్లలు, యువత నుంచి విరాట్ కోహ్లీ విగ్రహాన్ని తయారు చేయాలనే డిమాండ్ ఉంది. అందుకే ఈ విగ్రహం ఏర్పాటు చేశాం' అని మ్యూజియం ఫౌండర్ అనూప్ తెలిపారు.

కాగా, ఈ మ్యూజియంలో ఇప్పటికే మహాత్మా గాంధీ, దలైలామా, రవీంద్రనాథ్ ఠాగూర్, భగత్ సింగ్, కల్పనా చావ్లా, జాకీ చాన్, ఆల్బర్ట్ ఐన్‌స్టీన్, బాలీవుడ్ సెలబ్రిటీలు అమితాబ్ బచ్చన్, దీపికా పదుకొణె, ఫుట్​బాల్ స్టార్ లియోనెల్ మెస్సీ మొదలగు 44 మంది ప్రముఖుల విగ్రహాలు కూడా ఉన్నాయి.

ప్రస్తుత ఐపీల్​లో రాయల్ ఛాలెంజర్స్​ తరఫున ప్రాతినిధ్యం వహిస్తున్న విరాట్ అద్భుతంగా రాణిస్తున్నాడు. ఇప్పటి వరకు ఆడిన 7 మ్యాచ్​ల్లో 147.35 స్ట్రైక్ రేట్​తో 361 పరుగులు చేశాడు. అందులో ఓ సెంచరీ, 2 హాఫ్ సెంచరీలు ఉన్నాయి. కానీ, ఆర్సీబీ మాత్రం ఆశించిన స్థాయిలో ప్రదర్శన చేయలేకపోతోంది. ప్రస్తుత సీజన్​లో ఇప్పటివరకు 7 మ్యాచ్​లు ఆడగా అందులో కేవలం ఒక్కదాంట్లోనే విజయం సాధించింది. ఫలితంగా రెండు పాయింట్లతో పట్టికలో అట్టడుగున కొనసాగుతోంది.