Syed Mushtaq Ali Trophy :ప్రతిష్టాత్మక సయ్యద్ ముస్తాక్ అలీ ట్రోఫీలో తాజాగా ఓ సెన్సేషనల్ రికార్డు నమోదైంది. టీ20 క్రికెట్ చరిత్రలో మునుపెన్నడూ లేని విధంగా బరోడా క్రికెట్ జట్టు అద్భుత పెర్ఫామ్ చేసి టీ20 క్రికెట్లో అత్యధిక పరుగులు చేసిన జట్టుగా రికార్డుకెక్కింది. దీంతో పాటు ఈ మ్యాచ్‌లో బరోడా టీమ్ మరెన్నో కొత్త రికార్డులు కూడా సృష్టించింది.
గురువారం బరోడా, సిక్కిం జట్లు తలపడ్డాయి. బరోడా ఓపెనర్లు శాశ్వత్ రావత్, అభిమన్యు సింగ్ రాజ్‌పుత్ విధ్వంసకరంగా బ్యాటింగ్ చేసి జట్టును ముందుకు నడిపించారు. అయితే ఆరో ఓవర్లో జట్టు తొలి వికెట్ పడింది. అప్పటికి జట్టు స్కోరు 92 పరుగులకు చేరుకుంది. దీంతో కేవలం 17 బంతుల్లోనే 53 పరుగులు చేసి అభిమన్యు ఔటయ్యాడు. ఈ స్కోర్లో 5 సిక్సర్లు, 4 ఫోర్లు ఉండటం విశేషం.
మరో ఓపెనర్‌ శాశ్వత్ రావత్ కూడా అద్భుతమైన ఇన్నింగ్స్ ఆడాడు. 16 బంతుల్లో 43 పరుగులు జోడించాడు. ఆ తర్వాత బరిలోకి దిగిన భాను పునియా మరింత దూకుడుగా ఆడాడు. ఈ క్రమంలో అతడు 51 బంతుల్లో 134 పరుగులు స్కోర్ చేశాడు. అందులో 15 సిక్సర్లు, 5 ఫోర్లు ఉండటం విశేషం.