Shubman Gill Injury Update : ఆస్ట్రేలియాలోని పెర్త్‌ వేదికగా నవంబర్ 22 నుంచి జరగనున్న తొలి టెస్టుకు ముందు టీమ్ఇండియాకు శుభ్మన్ గిల్ గాయం ఓ పెద్ద షాక్నిచ్చింది. స్లిప్స్‌లో ఫీల్డింగ్ చేస్తున్నప్పుడు అతడి ఎడమ చేతికి గాయమవ్వగా, ఇంట్రా-స్క్వాడ్ మ్యాచ్లో రెండవ రోజు మైదానానికి తిరిగి రాలేని పరిస్థితి ఏర్పడింది. అయితే శుభ్మన్ ఫిట్నెస్పై టీమ్ ఇండియా బౌలింగ్ కోచ్ మోర్నీ మోర్కెల్ తాజాగా ఓ కీలక సమాచారాన్ని అందించారు.
"శుభ్మన్ గిల్ గాయం నుంచి కోలుకుంటున్నాడు. బీసీసీఐ డాక్టర్ల బృందం అతడ్ని నిశితంగా పరిశీలిస్తోంది. అయితే మ్యాచ్లో తనను ఆడించటంపై ఇప్పుడే ఏమీ చెప్పలేం. తొలి టెస్టు ఉదయమే గిల్ ఆడటంపై తుది నిర్ణయం తీసుకుంటాం. మ్యాచ్ ప్రాక్టీస్‌లో గిల్ ఎలాంటి ఇబ్బంది లేకుండానే ఆడాడు. అతడి విషయంలో మేము సానుకూలంగానే ఉన్నాం. ఇక మా దృష్టంతా షమీపైనే ఉంది. దాదాపు ఏడాది నుంచి అంతర్జాతీయ మ్యాచుల్లో ఆడలేదు. అతడు కమ్బ్యాక్ ఇస్తే మాత్రం ఇది గొప్ప విజయమే అవుతుంది. షమీకి మా సపోర్ట్ ఎప్పుడూ ఉంటుంది. అతడు ప్రపంచ స్థాయి బౌలర్‌. దేశవాళీ క్రికెట్‌లోనూ తన సత్తా ఏంటో మరోసారి చూపించాడు" అని మోర్నీ పేర్కొన్నారు. అయితే, గిల్‌ను ఈ తొలి టెస్టు తుది జట్టులోకి తీసుకొచ్చే విషయంపై మాత్రం స్పష్టమైన సమాచారం ఇవ్వకపోవడం గమనార్హం.