'యశస్వి యంగ్ సచిన్​ను గుర్తుచేస్తున్నాడు- అతడు ఫ్యూచర్ సూపర్​స్టార్'

Ravi Shastri On Yashasvi Jaiswal: రాజ్​కోట్ టెస్టులో శతకంతో అదరగొట్టిన జైశ్వాల్ పలు రికార్డులు ఖాతాలో వేసుకున్నాడు. దీంతో అతడి​పై ప్రశంసలు కురుస్తున్నాయి.

Ravi Shastri On Yashasvi Jaiswal: టీమ్ఇండియా యంగ్ బ్యాటర్ యశస్వి జైశ్వాల్​పై మాజీలు ప్రశంసల జల్లు కురిపిస్తున్నారు. తాజాగా ఇంగ్లాండ్​తో టెస్టులో రెండో ఇన్నింగ్స్​లో శతకం బాది పలు రికార్డులు ఖాతాలో వేసుకున్నాడు. ఈ మ్యాచ్​లో 104 పరుగులు బాదిన యశస్వి, రిటైర్డ్ హర్ట్​గా క్రీజును వదిలాడు. ఈ నేపథ్యంలో టీమ్ఇండియా మాజీ ప్లేయర్ రవిశాస్త్రి అతడిని యంగ్ ఏజ్​ నాటి సచిన్ తెందూల్కర్​తో పోల్చాడు.

'జైశ్వాల్​ను చూస్తుంటే యంగ్ ఏజ్​ నాటి సచిన్​ గుర్తొస్తున్నాడు. అతడు బ్యాటింగ్​ మాత్రమే కాకుండా ఫీల్డింగ్​లోనూ అదరగొడుతున్నాడు. సచిన్ తన కెరీర్ ప్రారంభంలో ఎంత చురుగ్గా ఉండేవాడో ఇప్పుడు జైశ్వాల్ కూడా అలాగే ఆడుతున్నాడు. అతడు రోహిత్ శర్మకు పార్ట్​టైమ్ బౌలర్​గా కూడా ఉపయోగపడతాడు. జట్టుకు అవసరమైనప్పుడు జైశ్వాల్​కు రోహిత్ బౌలింగ్ ఇవ్వాలి' అని రవిశాస్త్రి అన్నాడు.

నెక్ట్స్​ సూపర్ స్టార్:జైశ్వాల్ మూడు ఫార్మాట్​ల ఫ్యూచర్ సూపర్ స్టార్ అని ఇంగ్లాండ్ మాజీ క్రికెటర్ మైఖేల్ వాగన్ అన్నాడు. 'మరో రోజు కూడా అద్భుతమైన గేమ్​ చూశాం. మ్యాచ్​లో ఇంగ్లాండ్ కొన్ని తప్పిదాలు చేసింది. అవి భారత్​కు కలిసొచ్చాయి. ఇక రానున్న రోజుల్లో జైశ్వాల్ అన్ని ఫార్మాట్​లలో సూపర్​స్టార్​గా ఎదుగుతాడు' అని ట్వీట్ చేశాడు.

ఈ మ్యాచ్​తో జైశ్వాల్ కెరీర్​లో మూడో సెంచరీ నమోదు చేశాడు. ఈ నేపథ్యంలో టెస్టుల్లో అత్యంత వేగంగా మూడు సెంచరీలు నమోదు చేసిన 3వ బ్యాటర్​గా రికార్డు కొట్టాడు. జైశ్వాల్ టెస్టుల్లో 3 సెంచరీలకు 13 ఇన్నింగ్స్​ తీసుకున్నాడు. దీంతో అతడు దిగ్గజాలు వీరేంద్ర సెహ్వాగ్, సంజయ్ మంజ్రేకర్ సరనన నిలిచాడు. ఇక 13 ఇన్నింగ్స్​ల తర్వాత చూసుకుంటే జైశ్వాల్, ఓ విషయంలో సెహ్వాగ్ కంటే ముందున్నాడు. ఇప్పటివరకు జైశ్వాల్ 62 సగటున 65 స్ట్రైక్​రేట్​తో పరుగులు నమోదు చేస్తే, ఇదే 13 ఇన్నింగ్స్​కు సెహ్వాగ్ సగటు 53, స్ట్రైక్ రేట్ 62గా ఉంది. 2023లో వెస్టిండీస్​పై టెస్టుల్లో అరంగేట్రం చేసిన జైశ్వాల్ తన కెరీర్​లో ఇప్పటివరకు 13 ఇన్నింగ్స్​లో 751 పరుగులు బాదాడు. అందులో 3 సెంచరీలు, 2 హాఫ్ సెంచరీలు ఉన్నాయి.