ఒలింపిక్ మెడలిస్ట్​ స్వప్నిల్​కు డబుల్ ప్రమోషన్​ - రైల్వే శాఖలో పదోన్నతి - Paris Olympics 2024

Paris Olympics 2024 Swapnil Kusale Double Promotion : పారిస్ ఒలింపిక్స్ కాంస్య విజేత స్వప్నిల్ కుసాలేకు మెడల్​తో పాటు ఉద్యోగంలోనూ ప్రమోషన్ లభించింది. టీటీఈగా ఉన్న స్వప్నిల్​కు ఓఎస్‌ డీగా పదోన్నతి ఇచ్చింది రైల్వే శాఖ. పూర్తి వివరాలు స్టోరీలో

Paris Olympics 2024 Swapnil Kusale Double Promotion :పారిస్ ఒలింపిక్స్​లో పురుషుల 50మీటర్ల రైఫిల్ 3పొజిషన్స్ ఈవెంట్​ లో​ యంగ్ షూటర్ స్వప్నిల్ కుసాలే కాంస్య పతకాన్ని సాధించిన విషయం తెలిసిందే. అయితే ఈ ఒలింపిక్ పతక విజేతకు ప్రోత్సాహకంగా సెంట్రల్ రైల్వే పదోన్నతి కల్పించింది. స్వప్నిల్​ను టీటీఈ నుంచి ఆఫీసర్‌ ఆన్‌ స్పెషల్‌ డ్యూటీ (ఓఎస్‌ డీ)గా నియమిస్తూ ప్రమోషన్‌ ఆర్డర్​ను జారీ చేసినట్లు సెంట్రల్‌ రైల్వే తెలిపింది. ఇకపై కుసాలే ముంబయిలోని స్పోర్ట్స్‌ సెల్​కు ఓఎస్‌డీగా వ్యవహించనున్నాడు.

9 ఏళ్ల తర్వాత ప్రమోషన్ -స్వప్నిల్ తొమ్మిదేళ్లుగా సెంట్రల్ రైల్వేలో టికెట్ కలెక్టర్​గా పనిచేస్తున్నాడు. అయితే ఎన్ని సార్లు ప్రమోషన్​కు అప్లై చేసుకున్నా ఫలితం లేకుండా పోయిందని అతడి కోచ్ దీపాలి దేశ్‌ పాండే ఓ ఛానల్​కు ఇచ్చిన ఇంటర్వ్యూలో తెలిపారు. రైల్వే శాఖ నిర్ణయం పట్ల స్వప్నిల్​ నిరాశ చెందాడని ఆమె ఆరోపించారు. 'స్వప్నిల్ ప్రమోషన్ ఫైల్​ను ఉన్నతాధికారుల పరిశీలనకు పంపేందుకు అతడిని ఆఫీసులో రిపోర్టు చేయమని రైల్వే అధికారులు అడిగారు. అయితే పారిస్ ఒలింపిక్స్​కు వెళ్లేందుకు శిక్షణలో బిజీగా ఉండడం వల్ల స్వప్నిల్ రైల్వే కార్యాలయానికి వెళ్లలేకపోయాడు.' అని దీపాలి దేశ్‌ పాండే తెలిపారు.

రెండు రోజుల్లో డబుల్ ప్రమోషన్ - ఒలింపిక్ పతక విజేత స్వప్నిల్ కుసాలేకు రెండు రోజుల్లో డబుల్ ప్రమోషన్ కల్పిస్తామని సెంట్రల్ రైల్వే అసిస్టెంట్ స్పోర్ట్స్ ఆఫీసర్ రంజిత్ మహేశ్వరి పేర్కొన్నారు. ఆయన ప్రమోషన్​ను అడ్డుకున్నామన్న వార్తల్లో నిజం లేదని స్పష్టం చేశారు.

పారిస్ ఒలింపిక్స్​లో భాగంగా గురువారం(ఆగస్ట్ 1) జరిగిన పురుషుల 50మీటర్ల రైఫిల్ 3 పొజిషన్స్ ఈవెంట్​లో​ యంగ్ షూటర్ స్వప్నిల్ కుసాలే 451.4 పాయింట్లతో మూడో స్థానంలో నిలిచి కాంస్యాన్ని గెలిచాడు. ఆట ప్రారంభంలో స్వప్నిల్ కాస్త నెమ్మదించినప్పటికీ, తర్వాత పుంజుకున్నాడు. ఒక దశలో టాప్ -2లోకి దూసుకెళ్లాడు. ఇక చివర్లో ప్రత్యర్థుల నుంచి పోటీ ఎదురవడం వల్ల స్వప్నిల్ మూడో స్థానానికి పరిమితమయ్యాడు. స్వప్నిల్ కంటే ముందు 463.6 పాయింట్లతో లీ యుకున్ (చైనా) స్వర్ణ పతకం దక్కించుకోగా, 461.3 పాయింట్లతో కులిశ్ (ఉక్రెయిన్) రజతం గెలుచుకున్నాడు.