కపిల్ దేవ్​ను దాటేసిన బుమ్రా- ఏకైక భారత బౌలర్​గా రికార్డ్

జోరు కొనసాగిస్తున్న బుమ్రా- ఖాతాలో మరో ఘనత

Jasprit Bumrah vs Australia :బోర్డర్- గావస్కర్ ట్రోఫీలో అదరగొడుతున్న టీమ్ఇండియా స్టార్ పేసర్ జస్ప్రీత్ బుమ్రా కెరీర్​లో మరో అరుదైన ఘనత సాధించాడు. గబ్బా వేదికగా జరుగుతున్న మూడో టెస్టు తొలి ఇన్నింగ్స్​లో 5 వికెట్లతో రాణించిన బుమ్రా, రెండో ఇన్నింగ్స్​లోనూ అదే జోరు కొనసాగిస్తున్నాడు. స్టార్ బ్యాటర్లు ఉస్మాన్ ఖవాజా (8 పరుగులు), మార్నస్ లబుషేన్ (1 పరుగు) ​ను పెవిలియన్ చేర్చాడు.

ఈ క్రమంలోనే ఆసీస్ గడ్డపై టెస్టుల్లో అత్యధిక వికెట్లు పడగొట్టిన భారత బౌలర్​గా రికార్డు సృష్టించాడు. ఇప్పటివరకు 10 ఇన్నింగ్స్​ల్లో 53 వికెట్లు పడగొట్టిన బుమ్రా, దిగ్గజం కపిల్ దేవ్ (51 వికెట్లు)ను అధిగమించి ఆల్​టైమ్ రికార్డు కొట్టాడు. ఇందులో 3సార్లు 5 వికెట్ల ప్రదర్శన చేశాడు.

ఆస్ట్రేలియా గడ్డపై టెస్టుల్లో అత్యధిక వికెట్లు పడగొట్టిన భారత బౌలర్లు

బౌలర్	వికెట్లు	ఎకనమీ
జస్ప్రీత్ బుమ్రా	53 వికెట్లు	2.39
కపిల్ దేవ్	51 వికెట్లు	2.49
అనిల్ కుంబ్లే	49 వికెట్లు	3.46
రవిచంద్రన్ అశ్విన్	40 వికెట్లు	2.93
బిషన్ బేడి	35 వికెట్లు	2.14

ఈ మ్యాచ్​లో రెండు ఇన్నింగ్స్​ల్లో కలిపి బుమ్రా మొత్తం 8 వికెట్లు (తొలి ఇన్నింగ్స్ 5, రెండో ఇన్నింగ్స్ 3) పడగొట్టాడు. దీంతో ఆసీస్ గడ్డపై టెస్టుల్లో బుమ్రా 53 వికెట్లు పడగొట్టి టాప్​లో కొనసాగుతున్నాడు. ఇక ఈ ఒక్క సిరీస్​లోనే ఇప్పటివరకు ఏకంగా 21 వికెట్లు నేలకూల్చాడు.

Bumrah Test Career : కాగా, 2018లో టెస్టు అరంగేట్రం చేసిన బుమ్రా ఆరేళ్లుగా జట్టులో కీలక పాత్ర పోషిస్తున్నాడు. ఇప్పటివరకు 43 మ్యాచ్​ల్లో 2.75 ఎకనమీతో బుమ్రా 194 వికెట్లు దక్కించుకున్నాడు. ఇందులో 12సార్లు 5 వికెట్ల ప్రదర్శన చేశాడు. మరో 6 వికెట్లు పడగొడితే 200 వికెట్ల మైలురాయి అందుకుంటాడు. ప్రస్తుతం బుమ్రా ఉన్న ఫామ్​కు నాలుగో మ్యాచ్​లోనే ఈ మైలురాయి అందుకోవడం ఖాయంగా కనిపిస్తోంది.

ఇక మ్యాచ్ విషయానికొస్తే, ఆసీస్ రెండో ఇన్నింగ్స్​ను 89/7 పరుగుల వద్ద డిక్లేర్డ్ చేసింది. దీంతో తొలి ఇన్నింగ్స్​ లీడ్ 185 పరుగులు కలుపుకొని భారత్​కు 275 రన్స్​ టార్గెట్ నిర్దేశించింది.