ఐపీఎల్​లో తొలి బంతి వేసిన బౌలర్ ఎవరో తెలుసా?

ఐపీఎల్​లో తొలి బంతిని వేసిన బౌలర్ ఎవరు? ఆ బాల్​ను షాట్ కొట్టిన క్రికెటర్ ఎవరో తెలుసా?

IPL First Bowler : భారత్​​లో ఐపీఎల్​కు ఉండే ఆదరణే వేరు. ఈ లీగ్​లో ఆడేందుకు దేశవిదేశాల్లోని అంతర్జాతీయ ఆటగాళ్లు సైతం మొగ్గు చూపుతారు. అలాగే ఐపీఎల్ మ్యాచ్​లను చూసేందుకు ప్రేక్షకులు సైతం విపరీతంగా ఆసక్తి కనబరుస్తారు. కాగా, 2008లో ప్రారంభమైన ఐపీఎల్ ఇప్పటివరకు 17 సీజన్లు పూర్తి చేసుకుంది. అయినప్పటికీ ఈ లీగ్​కు ఉన్న క్రేజ్ మాత్రం తగ్గలేదు. అందుకే ఐపీఎల్ శాటిలైట్ రైట్స్ వంటివి భారీ ధర పలుకుతుండటం మనం చూస్తూనే ఉన్నాయి.

అయితే ఈ లీగ్​ తమ టాలెంట్​ను చూపించుకునేందుకు మంచి వేదికగా కూడా అవుతోంది. ఐపీఎల్​లో రాణించేవారికి టీమ్​ఇండియా వంటి జట్లు టీ20ల్లో చోటు ఇస్తున్నాయి. ఈ క్రమంలో ఐపీఎల్​లో మొదటి బాల్ వేసిన బౌలర్ ఎవరు? ఫస్ట్ బాల్ ఆడిన బ్యాటర్ ఎవరు? తదితర వివరాలు ఈ స్టోరీలో తెలుసుకుందాం.

ఆర్​సీబీ వర్సెస్ కేకేఆర్
2008 ఏప్రిల్ 18న ఐపీఎల్ మొద‌టి సీజ‌న్ ప్రారంభమైంది. అందులో భాగంగా రాయ‌ల్స్ ఛాలెంజ‌ర్స్ బెంగ‌ళూరు, కోల్​క‌తా నైట్‌ రైడ‌ర్స్ జ‌ట్ల మ‌ధ్య మొద‌టి మ్యాచ్ జ‌రిగింది. బెంగ‌ళూరులోని చిన్న‌స్వామి స్టేడియం ఆ మ్యాచ్​కు వేదికైంది. తొలుత కేకేఆర్ బ్యాటింగ్ చేసింది. అయితే తొలి బంతిని ఆర్ సీబీ బౌలర్ ప్రవీణ్ కుమార్ వేయగా, కేకేఆర్ బ్యాటర్ సౌరభ్ గంగూలీ ఆడాడు. ప్రవీణ్ కుమార్ వేసిన లెంగ్త్ బాల్​ను గంగూలీ డిఫెన్స్ ఆడాడు. ఇలా ఐపీఎల్​లో మొదటి బాల్ వేసిన బౌలర్​గా ప్రవీణ్, బ్యాటింగ్ చేసిన ఆటగాడిగా గంగూలీ ఘనత సాధించారు. ఈ మ్యాచ్​లో సౌరభ్ గంగూలీ 12 బంతుల్లో కేవలం 10 పరుగులే చేసి వెనుదిరిగాడు.

అయితే ఐపీఎల్ తొలి సీజన్​లో జరిగిన ఈ మ్యాచ్​లో కేకేఆర్ జట్టు రికార్డు స్కోరు చేసింది. నిర్ణీత 20 ఓవర్లలో ఏకంగా 3 వికెట్ల నష్టానికి ఏకంగా 222 పరుగులు చేసింది. ఓపెనర్ బ్రెండన్ మెక్​కల్లమ్ విధ్వంసం సృష్టించాడు. కేవలం 73 బంతుల్లో 158 రన్స్ చేశాడు. అందులో 10 ఫోర్లు, 13 సిక్సర్లు ఉన్నాయి. 223 పరుగుల లక్ష్యఛేదనకు దిగిన ఆర్​సీబీ కేవలం 82 పరుగులకే ఆలౌటైంది. దీంతో కేకేఆర్ 140 రన్స్ తేడాతో గెలిచి, ఐపీఎల్ చరిత్రలో తొలి విజయాన్ని నమోదు చేసింది.