మన్కడింగ్ బాస్ అశ్విన్​​కే వార్నింగ్ ఇచ్చిన బౌలర్ - ఇప్పుడిదే హాట్​టాపిక్​! - Ravichandran Ashwin Mankad

Ravichandran Ashwin Mankading : భారత ఆఫ్​ స్పిన్నర్​ రవిచంద్ర అశ్విన్​కు మన్కడింగ్ రుచి చూపించాడు ఓ బౌలర్. బంతి వేయకముందే నాన్ స్ట్రైక్​లో ఉన్న అశ్విన్ క్రీజు దాటుతుంటే అతడిని హెచ్చరించాడు. అసలు అశ్విన్​ను మన్కడింగ్ వార్నింగ్ ఇచ్చిన బౌలర్ ఎవరు? ఏ మ్యాచ్​లో ఈ ఘటన జరిగింది? తదితర విషయాలు చూద్దాం పదండి.

Ravichandran Ashwin Mankading : మన్కడింగ్​ అనగానే క్రికెట్​ ప్రియులకు టక్కున గుర్తొచ్చే పేరు టీమ్ ఇండియా స్పిన్నర్ రవిచంద్రన్ అశ్విన్. ఎందుకంటే అతడితోనే ఈ మన్కడింగ్ వివాదం మొదలైంది. తన బౌలింగ్​లో నాన్‌ స్ట్రైకర్ ఎండ్​లో ఉన్న ప్రత్యర్థి బ్యాటర్ బంతి వేయక ముందే క్రీజ్ దాటినందుకు ఔట్ చేయించిన సందర్భాలు చాలా ఉన్నాయి. అయితే తాజాగా తమిళనాడు ప్రీమియర్ లీగ్ మ్యాచ్​లో అశ్విన్​కే మన్కడింగ్ రుచి చూపించాడు ఓ బౌలర్. ఇందుకు సంబంధించిన ఆసక్తికర వీడియో ప్రస్తుతం వైరల్ అవుతోంది. మన్కడింగ్ బాస్​కే దాని గురించి హెచ్చరించారని కామెంట్లు పెడుతున్నారు క్రికెట్ ప్రియులు.

అశ్విన్​కు ఝలక్ ఇచ్చిన బౌలర్ - తమిళనాడు ప్రీమియర్ లీగ్​లో భాగంగా దిండిగల్ డ్రాగన్స్, నెల్లాయ్ రాయల్ కింగ్స్ ఆదివారం తలపడ్డాయి. దిండిగల్ డ్రాగన్స్ జట్టు బౌలర్ ఎస్. మోహన్ ప్రశాంత్ 15వ ఓవర్​లో బౌలింగ్ వేశాడు. అప్పుడు నాన్ స్ట్రైకర్ ఎండ్​లో ఉన్న రవిచంద్రన్ అశ్విన్ బౌలర్ బంతి వేయకముందే క్రీజ్ దాటే ప్రయత్నం చేశాడు. ఇది గమనించిన ప్రశాంత్ బంతి వేయడం ఆపి అశ్విన్​ను హెచ్చరించాడు. విషయం అంపైర్ దృష్టికి తీసుకెళ్లాడు. దిగ్గజ క్రీడాకారుడికి ప్రశాంత్ ఇలా ముచ్చెమటలు పట్టించిన వైనం ప్రేక్షకులను విశేషంగా ఆకట్టుకుంటోంది. అలాగే మ్యాచ్ సమయంలో కామెంటేటర్లు కూడా నవ్వుతున్నట్లు వీడియోలో కనిపించింది. ఈ వీడియోను స్టార్ స్పోర్ట్ తమిళ్ క్యాప్షన్​తో పంచుకుంది. 'యాష్ అన్నా ఇలా చూడండి. మీరు చదివిన పాఠశాల హెడ్ మాస్టర్ అతడే' అని పోస్ట్ పెట్టింది.

మన్కడింగ్ బాస్ 'అశ్విన్' - బౌలర్‌ చేతిలోంచి బంతి వెళ్లకముందే నాన్‌ స్ట్రైకర్‌ ఎండ్​లో ఉన్న బ్యాటర్‌ క్రీజు వదిలి ముందుకు వెళితే బౌలర్‌ ఔట్‌ చేసే విధానాన్ని మన్కడింగ్​గా పిలుస్తారు. ఈ విధానాన్ని ఉపయోగించి టీమ్ ఇండియా బౌలర్ రవిచంద్రన్ అశ్విన్ చాలా మందిని పెవిలియన్​గా పంపాడు. అయితే అశ్విన్ తీరుపై కొందరు విమర్శిస్తుండగా, మరికొందరు మద్దతు తెలిపారు. మన్కడింగ్ విధానం ద్వారా ఇండియన్ ప్రీమియర్ లీగ్​లో సైతం చాలా మంది ఔట్ అయ్యారు.