Fastest Ball In IPL:ఐపీఎల్ 2024 సీజన్లో 14 మ్యాచ్‌లు పూర్తయ్యాయి. ప్రతిరోజూ మ్యాచ్ విన్నింగ్‌ పెర్ఫార్మెన్స్‌ కనబర్చిన ప్లేయర్స్‌ గురించి అందరూ చర్చించుకోవడం మామూలే. కానీ అరంగేట్రం మ్యాచ్‌తోనే అందరి దృష్టిని తమ వైపు తిప్పుకున్నారు గెరాల్డ్ కాట్జీ, మయాంక్ యాదవ్. ఈ పేస్ బౌలర్లు ప్రస్తుత సీజన్లోనే కాదు, ఆల్టైమ్ ఐపీఎల్లో వేగవంతమైన బంతులు సంధించి రికార్డుల్లో నిలిచారు. దీంతో ఇప్పుడు ఐపీఎల్లో అత్యంత వేగవంతమైన డెలివరీ గురించే చర్చలు నడుస్తున్నాయి. మరి ఐపీఎల్ చరిత్రలోనే అత్యంత ఫాస్టెస్ట్ డెలివరీలు ఎవో తెలుసుకుందాం.
- షాన్ టైట్ (157.71 kmph):ఐపీఎల్ చరిత్రలో అత్యంత వేగంగా బాల్ డెలివరీ చేసిన రికార్డు షాన్ టైట్ పేరిట ఉంది. 2011లో షాన్ టైట్ రాజస్థాన్ రాయల్స్‌కి ఆడాడు. దిల్లీ క్యాపిటల్స్‌తో జరిగిన మ్యాచ్లో అతను వేసిన ఓ బాల్ 157.71 kmph స్పీడ్‌తో దూసుకెళ్లింది.
- గెరాల్డ్ కాట్జీ (157.4kmph): ముంబయి పేసర్ గెరాల్డ్ కాట్జీ 2024లోనే అత్యంత వేగవంతమైన బంతిని సంధించాడు. రీసెంట్గా రాజస్థాన్తో జరిగిన మ్యాచ్లో గెరాల్డ్ వేసిన ఓ బంతి ఏకంగా 157.4kmph తో దూసుకెళ్లింది. దీంతో ప్రస్తుత సీజన్లో ఫాస్టెస్ట్ డెలివరీగా రికార్డు సాధించాడు గెరాల్డ్. ఇక ఓవరాల్గా గెరాల్డ్ రెండో స్థానంలో ఉన్నాడు.
- లాకీ ఫెర్గూసన్(157.3 kmph):ఐపీఎల్ 2022లో, గుజరాత్ టైటాన్స్‌కు చెందిన లాకీ ఫెర్గూసన్ రాజస్థాన్ రాయల్స్‌తో జరిగిన మ్యాచ్లో వేగవంతమైన బాల్ రికార్డు అందుకున్నాడు. మ్యాచ్లో 157.3 kmph వేగంతో ఆ సీజన్లోనే వేగవంతమైన బంతిని బౌల్ చేశాడు. టోర్నమెంట్‌లో వేగవంతమైన డెలివరీకి ప్రైజ్‌ కూడా లభించింది.
- ఉమ్రాన్ మాలిక్( 157.0 kmph):ఇండియన్ ప్రీమియర్‌ లీగ్‌ 2022లో సన్‌రైజర్స్ హైదరాబాద్ ఆటగాడు ఉమ్రాన్ మాలిక్ అత్యంత వేగవంతమైన బాల్ సంధించాడు. దిల్లీ క్యాపిటల్స్‌తో జరిగిన మ్యాచ్లో ఏకంగా 157.0 kmph వేగంతో బాల్ డెలివరీ చేశాడు.
- అన్రిచ్ నోకియా (156.22kmph):అన్రిచ్ నోకియా దిల్లీ క్యాపిటల్స్‌కి ఆడుతున్నాడు. IPL 2020లో రాజస్థాన్ రాయల్స్‌తో జరిగిన మ్యాచ్లో 156.22 kmph స్పీడ్‌తో బాల్ వేశాడు. ఈ టోర్నీలో దిల్లీ ఫైనల్‌కి చేరింది.
- మయాంక్ యాదవ్ (155.8 kmph):ఐపీఎల్ 2024లో అన్‌క్యాప్డ్ ఇండియన్ బౌలర్ మయాంక్ యాదవ్ లఖ్నవూ సూపర్ జెయింట్స్‌కి ఆడుతున్నాడు. మార్చి 30న పంజాబ్‌ కింగ్స్‌తో జరిగిన మ్యాచ్లో అరంగేట్రం చేశాడు. ఈ మ్యాచ్లో మయాంక్ యాదవ్ అత్యధికంగా 155.8 kmph స్పీడ్‌తో ఓ బాల్ డెలివరీ చేశాడు.