Dinesh Karthik On RCB Fans:రాయల్ ఛాలెంజర్స్ బెంగళూరు స్టార్ బ్యాటర్ దినేశ్ కార్తిక్ ఈ ఫ్రాంచైజీ అభిమానులపై షాకింగ్ కామెంట్స్ చేశాడు. రీసెంట్గా ఓ ఇంటర్వ్యూలో పాల్గొన్న కార్తిక్, తనతోపాటు తన ఫ్యామిలీని కూడా ఆర్సీబీ ఫ్యాన్స్ చాలాసార్లు తిట్టారని అన్నాడు. ప్రస్తుతం ఈ వ్యాఖ్యలు సోషల్ మీడియాలో వైరల్గా మారాయి. ఇంతకీ ఏం జరిగిందంటే?
2024 ఐపీఎల్లో బిజీగా ఉన్న దినేశ్ కార్తిక్, రాజస్థాన్ రాయల్స్ స్పిన్నర్ రవిచంద్రన్ అశ్విన్ యూట్యూబ్ ఛానెల్లో ఓ ఇంటర్వ్యూలో పాల్గొన్నాడు. ఈ చిట్చాట్లో డీకే, అశ్విన్తో చాలా విషయాలు షేర్ చేసుకున్నాడు. 'ఆర్సీబీకి మ్యాచ్ ఫినిషర్గా క్రీజులోకి వెళ్తున్నప్పుడు చిన్నస్వామి స్టేడియంలోని ఫ్యాన్స్ 'డీకే' 'డీకే' అని అరుస్తుంటే నువ్వు ఎలా ఫీలౌతావు?', 'ఆర్సీబీ ఫ్యాన్బేస్ గురించి చెప్పు' అని కార్తిక్ను అశ్విన్ అడుగుతాడు. దానికి కార్తిక్ నవ్వుతూ సమాధానం ఇచ్చాడు.
'ఆర్సీబీ ఫ్యాన్స్ ఒక ఫ్యామిలీ లాంటి వాళ్లు. వాళ్లు ఆర్సీబీ పట్ల లాయల్(విదేయులు)గా ఉంటారు. కానీ, వాళ్ల గురించి మంచి, చెడు రెండు మార్గాల్లో చెబుతా. మంచి ఏంటంటే, నేను క్రీజులోకి వెళ్తుంటే స్టేడియం అంతా నా పేరు మార్మోగిస్తారు. ఈ ప్రపంచంలో నేనే గ్రేట్ ప్లేయర్ అన్నట్లుగా ఫుల్ ఎంకరేజ్ చేస్తారు. మా జట్టు ప్లేయర్లు బాగా ఆడరు అని ఎవరైనా అంటే వాళ్లతో ఫైట్ చేస్తారు. మా రికార్డుల గురించి చెబుతూ వాళ్లపై విరుచుకుపడతారు. కానీ, నేను మ్యాచ్లో బాగా ఆడకపోతే అదే ఫ్యాన్స్ పర్సనల్గా నాకు డైరెక్ట్ మెసేజ్లు చేసి తిడుతుంటారు. నన్ను ఒక్కడినే కాదు, నా ఫ్యామిలీ మొత్తాన్ని తిడతారు. కానీ బయటకు మాత్రం అది తెలియనివ్వరు. నేను ఐపీఎల్లో చాలా టీమ్స్కు ఆడాను. అన్ని ఫ్రాంచైజీలకు ఫ్యాన్స్ ఉన్నారు. కానీ, ఆర్సీబీ ఫ్యాన్స్ మాత్రం చాలా స్పెషల్' అని నవ్వుతూ బదులిచ్చాడు.