DC vs GG WPL 2024:2024 డబ్ల్యూపీఎల్ లీగ్ దశలో ఆఖరి మ్యాచ్లో దిల్లీ ఘన విజయం సాధించింది. బుధవారం గుజరాత్ జెయింట్స్తో జరిగిన మ్యాచ్లో 7 వికెట్ల తేడాతో నెగ్గిన దిల్లీ నేరుగా ఫైనల్స్కు దూసుకెళ్లింది. గుజరాత్ నిర్దేశించిన 127 పరుగుల లక్ష్యాన్ని దిల్లీ ఓవర్లలో ఛేదించింది. దిల్లీ బ్యాటర్లలో షఫాలీ వర్మ (71 పరుగులు) హాఫ్ సెంచరీతో అదరగొట్టగా, జెమిమా రోడ్రిగ్స్ (38* పరుగులు) రాణించింది. గుజరాత్ బౌలర్లలో తనుజా రెండు వికెట్లు దక్కించుకుంది. ఇక ఈ విజయంతో దిల్లీ మహిళల ప్రీమియర్ లీగ్లో వరుసగా రెండోసారి ఫైనల్స్కు అర్హత సాధించింది.
స్వల్ప లక్ష్య ఛేదనను దిల్లీ ఘనంగానే ఆరంభించింది. అయితే మూడో ఓవర్లో గుజరాత్ రెండు వికెట్లు తీసి గేమ్లోకి వచ్చినట్లు కనిపించింది. ఓపెనర్ మెగ్ లానింగ్ రనౌట్ కాగా, అదే ఓవర్ ఐదో బంతికి అలీస్ కాప్సీ (0) పెవిలియన్ బాట పట్టింది. అయినప్పటికీ యంగ్ బ్యాటర్ షఫాలీ వర్మ ఏ మాత్రం జోరు తగ్గించలేదు. ఎడాపెడా బౌండరీలతో స్కోర్ బోర్డును పరుగులు పెట్టించింది. ఆమెకు తోడుగా జెమిమా రోడ్రిగ్స్ కూడా విలువైన ఇన్నింగ్స్ ఆడుతూ గుజరాత్కు మరో ఛాన్స్ ఇవ్వలేదు. మూడో వికెట్కు 94 పరుగుల భాగస్వామ్యం నెలకొల్పిన ఈ జోడీ దిల్లీని విజయంలో కీలక పాత్ర పోషించారు