Rohit Sharma Pakistan Visit :టీమ్ఇండియా కెప్టెన్ రోహిత్ శర్మ పాకిస్థాన్ వెళ్లనున్నాడా? ప్రస్తుతం క్రీడా వర్గాల్లో హాట్టాపిక్ ఇదే. అటు టీమ్ఇండియా అభిమానుల్లోనూ ఇదే ప్రశ్మ మెదులుతోంది. అందరూ దీనిపైనే చర్చించుకుంటున్నారు. మరి క్రీడా వర్గాల్లో ఈ చర్చ ఎందుకు వచ్చింది? అసలు రోహిత్ ఎందుకు పాకిస్థాన్ వెళ్లాలి? తెలుసుకుందాం
అంతర్జాతీయ క్రికెట్ కౌన్సిల్ (ఐసీసీ) టోర్నీ ఏదైనా సరే అందులో పాల్గొనే జట్ల కెప్టెన్లతో, బోర్డు ఓ మెగా ఈవెంట్ నిర్వహిస్తుంటుంది. అన్ని జట్ల కెప్టెన్లు టైటిల్తో ఫొటోషూట్లో పాల్గొంటారు. ఇదే ఈవెంట్లో మీడియాతో మాట్లాడుతూ తమతమ స్ట్రాటజీల గురించి చర్చించుకుంటారు. అయితే టోర్నీకి ఆతిథ్యం ఇచ్చే దేశంలోనే ఈ ఈవెంట్ నిర్వహించడం ఆనవాయితిగా వస్తోంది.
అయితే ఫిబ్రవరిలో ప్రారంభమయ్యే ఛాంపియన్స్ ట్రోఫీకి పాకిస్థాన్ ఆతిథ్యం ఇస్తోంది. ఈ నేపథ్యంలో పాకిస్థాన్లో ఐసీసీ మెగా ఈవెంట్, కెప్టెన్ల ఫొటోషూట్ నిర్వహించే ఛాన్స్ ఉంది. టోర్నీలో పాల్గొంటున్న జట్టు కెప్టెన్గా రోహిత్ అక్కడికి వెళ్లాల్సి ఉంటుంది. అయితే పాకిస్థాన్తో ఉన్న భద్రతా కారణాల వల్ల భారత్ ఆ దేశంలో పర్యటించడమే లేదు. అలాంటిది మన కెప్టెన్ రోహిత్ ఈ ఫొటోషూట్ కోసం పాక్కు వెళ్తాడా? లేదా? అన్నది క్రీడా వర్గాల్లో ఆసక్తికరంగా మారింది.
ఒకవేళ వెళ్తే?
ఈ ఫొటోషూట్ కోసం రోహిత్ పాకిస్థాన్ వెళ్తే మాత్రం సెన్సేషన్ అవుతుంది. ఈ టోర్నీకి కూడా వరల్డ్వైడ్గా విపరీతమైన బజ్ క్రియేట్ అవుతుంది. కానీ, రోహిత్ పాక్ వెళ్లడం అసాధ్యమే. ఆ దేశంతో దౌత్యపరంగా ఉన్న సమస్యల మధ్యలో బీసీసీఐ రోహిత్ను అక్కడకు పంపే సాహసం చేయదని విశ్లేషకుల మాట.