రోహిత్, రాహుల్ ఓపెనింగ్ ఎవరు?- క్లారిటీ ఇచ్చేసిన హిట్​మ్యాన్

బ్యాటింగ్ ఆర్డర్​పై రోహిత్ క్లారిటీ- ఓపెనర్​గా రాహులేనట

Rohit Sharma Batting Position :టీమ్ఇండియా కెప్టెన్ రోహిత్ శర్మ బ్యాటింగ్ ఆర్డర్​పై సస్పెన్స్ వీడింది. ఆస్ట్రేలియాతో జరుగుతున్న టెస్టు సిరీస్​లో స్టార్ బ్యాటర్ కే ఎల్ రాహుల్ ఓపెనింగ్ బ్యాటర్​గా కొనసాగుతాడని రోహిత్ స్వయంగా వెల్లడించాడు. తాను మిడిల్ ఆర్డర్​లో బరిలో దిగుతానని స్పష్టం చేశాడు. ప్రస్తుతం భారత్ ఓపెనింగ్ జోడీ బాగానే ఉందన్న రోహిత్, దాన్ని మార్చడం అవసరం లేదని పేర్కొన్నాడు. రెండో టెస్టుకు ముందు పాల్గొన్న మీడియా సమావేశంలో రోహిత్ ఓపెనింగ్ జోడీపై క్లారిటీ ఇచ్చాడు.

'తొలి మ్యాచ్​లో రాహుల్ బ్యాటింగ్​ నేను లైవ్​లో చూశాను. అతడు అద్భుతంగా ఆడాడు. ప్రస్తుతం టీమ్ఇండియా ఓపెనింగ్ బాగుంది. ​ఓవర్సీస్​లో రాహుల్ రాణిస్తున్నాడు. జైస్వాల్- రాహుల్ జోడీనే తొలి మ్యాచ్​ గెలుపులో కీలకం అయ్యింది. ఈ జోడీని ఇప్పుడు మార్చాల్సిన అవసరం లేదు. భవిష్యత్​లో మాత్రం ఈ పరిస్థితులు మారవచ్చు' అని రోహిత్ టీమ్ఇండియా బ్యాటింగ్ ఆర్డర్​పై క్లారిటీ ఇచ్చాడు.

ఇక తాజా క్లారిటీతో యంగ్ బ్యాటర్ యశస్వీ జైస్వాల్​తో కలిసి రాహుల్​ ఓపెనర్​గా కొనసాగన్నాడు. ఒకవేళ శుభ్​మన్ తుది జట్టులోకి వస్తే వన్​ డౌన్​లో దిగడం పక్కా. నాలుగో స్థానంలో విరాట్ కోహ్లీ, ఐదో ప్లేస్​లో రోహత్ వచ్చే అవకాశం ఉంది. డిసెంబర్ 6న ఇరుజట్ల మధ్య రెండో టెస్టు ప్రారంభం కానుంది. ఈ మ్యాచ్​ డే/నైట్ ఫార్మాట్​లో ఆడిలైడ్ వేదికగా జరగనుంది.

అయితే వ్యక్తిగత కారణాల వల్ల బోర్డర్- గావస్కర్ ట్రోఫీలో రోహిత్ తొలి టెస్టుకు దూరమయ్యాడు. దీంతో జైస్వాల్​తో కలిసి రాహుల్ టీమ్ఇండియా ఇన్నింగ్స్ ప్రారంభించాడు. తొలి ఇన్నింగ్స్​లో విఫలమైన ఈ జోడీ, రెండో ఇన్నింగ్స్​లో మాత్రం అదరగొట్టింది. జైస్వాల్ భారీ సెంచరీ (161 పరుగులు)తో రాణించగా, రాహుల్ (77 పరుగులు) ఆకట్టుకున్నాడు. ఈ ఇద్దరూ తొలి వికెట్​కు 201 పరుగులు జోడించి జట్టుకు బలమైన పునాది వేశారు. దీంతో రెండో ఇన్నింగ్స్​లో భారత్ 487-6 వద్ద డిక్లేర్డ్ చేసింది. అనంతరం 534 పరగులు భారీ లక్ష్యంతో బరిలోకి దిగిన ఆసీస్ 238 స్కోర్ వద్ద ఆలౌటైంది. భారత్ 295 రన్స్​తో నెగ్గింది.