కుంబ్లే రికార్డు బ్రేక్ చేసిన అశ్విన్ - తొలి భారత బౌలర్​గా ఘనత - Ashwin Records

Ashwin Records : టీమ్ఇండియా స్టార్ స్పిన్నర్ రవిచంద్రన్ అశ్విన్ మరో రికార్డు కొట్టాడు. బంగ్లాదేశ్​తో జరుగుతున్న రెండో టెస్టులో అశ్విన్ రేర్ ఫీట్ అందుకున్నాడు.

Ashwin Records :టీమ్ఇండియా స్టార్ స్పిన్నర్ రవిచంద్రన్ అశ్విన్ బంగ్లాదేశ్ పర్యటనలో అదరగొడుతున్నాడు. ఇప్పటికే తొలి టెస్టులో పలు ఘతనలు సాధించిన అశ్విన్, తాజాగా రెండో మ్యాచ్​లో మరో రికార్డు సృష్టించాడు. టెస్టు ఫార్మాట్​ క్రికెట్​లో ఆసియాలో అత్యధిక వికెట్లు పడగొట్టిన భారత బౌలర్​గా అవతరించాడు. ఇప్పటివరకు అశ్విన్ ఆసియాలో 420 వికెట్లు నేలకూల్చాడు. ఈ క్రమంలోనే టీమ్ఇండియా దిగ్గజ బౌలర్ అనిల్ కుంబ్లే (419 వికెట్లు)ను అధిగమించాడు.

కాన్పూర్ టెస్టులో బంగ్లా కెప్టెన్ నజ్ముల్ హొసన్ షాంటో వికెట్ పడగొట్టిన అశ్విన్ ఈ రేర్ ఫీట్ సాధించాడు. కాగా, ఓవరాల్​గా టెస్టు క్రికెట్​లో ఆసియాలో అత్యధిక వికెట్లు దక్కించుకున్న రెండో బౌలర్​గా అశ్విన్ కొనసాగుతున్నాడు. శ్రీలంక లెజెండరీ స్పిన్నర్ ముత్తయ్య మురళీధరణ్ (612) అగ్రస్థానంలో ఉన్నాడు.

టెస్టు ఫార్మాట్​లో ఆసియాలో అత్యధిక వికెట్లు పడగొట్టిన బౌలర్లు

ముత్తయ్య మురళీధరణ్	శ్రీలంక	612
రవిచంద్రన్ అశ్విన్	భారత్	420*
అనిల్ కుంబ్లే	భారత్	419
రంగన హెరాత్	శ్రీలంక	354
హర్భజన్ సింగ్	భారత్	300

Ashwin Test Career : ఇక ఓవరాల్​గా కెరీర్​లో 102 టెస్టు మ్యాచ్​లు ఆడిన అశ్విన్ ఇప్పటివరకు 523 వికెట్లు పడగొట్టాడు. ఇందులో 37 సార్లు 5 వికెట్ల ప్రదర్శన చేశాడు. భారత్​ నుంచి సుదీర్ఘ ఫార్మాట్ క్రికెట్​లో అత్యధిక వికెట్లు కూల్చిన రెండో బౌలర్​ కూడా అశ్వినే. అనిల్ కుంబ్లే 132 మ్యాచ్​ల్లో 619 వికెట్లతో అగ్రస్థానంలో ఉన్నాడు. ఇక మూడో స్థానంలో కపిల్ దేవ్ (434 వికెట్లు), నాలుగో ప్లేస్​లో హర్భజన్ సింగ్(417) ఉన్నారు.

Ind vs Ban Test Series 2024 :రెండో టెస్టులో తొలి రోజు ఆట అర్ధంతరంగా ఆగిపోయింది. వర్షం తీవ్ర ఆటంకం కలిగించడం వల్ల మ్యాచ్​ను 35 ఓవర్లకే రద్దు చేశారు. తొలి రోజు ఆట ముగిసేసరికి బంగ్లాదేశ్ 35 ఓవర్లలో 107 పరుగులకు 3 వికెట్లు కోల్పోయింది. ప్రస్తుతం క్రీజులో మొమినుల్ హక్ (40 పరుగులు), ముష్ఫికర్ రహీమ్ (6 పరుగులు) ఉన్నారు. టీమ్ఇండియా బౌలర్లలో ఆకాశ్ దీప్ 2, అశ్విన్ 1 వికెట్ పడగొట్టారు.