Teamindia Retirement : టీమ్ ఇండియా సీనియర్ ఆఫ్ స్పిన్నర్ రవిచంద్రన్ అశ్విన్ అంతర్జాతీయ క్రికెట్కు రిటైర్మెంట్ ప్రకటించి యావత్ క్రీడా ప్రపంచాన్ని ఆశ్చర్యానికి గురిచేశాడు. భారత జట్టుకు ఎన్నో చిరస్మరణీయ విజయాలను అందించిన ఈ మేటి బౌలర్ క్రికెట్కు గుడ్ బై చెప్పాడు. అయితే అశ్విన్ బాటలోనే మరికొందరు సీనియర్లు నడవనున్నట్లు తెలుస్తోంది.
క్రిక్బజ్లోని నివేదిక ప్రకారం
2025, భారత క్రికెట్లో రిటైర్మెంట్ సంవత్సరం కానుంద‌ని విశ్లేషకులు అంటున్నారు. సీనియర్ ఆట‌గాళ్లు అంతా ఒక్కొక్క‌రిగా లేదంటే ఒకేసారి రిటైర్మెంట్ కావొచ్చన‌ని చెబుతున్నారు. ఒకవేళ భారత జ‌ట్టు వ‌రల్డ్ టెస్ట్ ఛాంపియన్‌ షిప్ (డబ్ల్యూటీసీ) ఫైనల్ చేరుకుంటే ఆ మ్యాచ్ తర్వాత జట్టులో కచ్చితంగా మార్పులు చోటు చేసుకుంటాయ‌టని అంటున్నారు. వచ్చే ఏడాది జూన్లో లార్డ్స్ వేదిక‌గా డబ్ల్యూటీసీ ఫైనల్ జ‌ర‌గ‌నుంది.
ఒకవేళ భార‌త్ డబ్ల్యూటీసీ ఫైన‌ల్కు చేరుకోకపోతే బోర్డర్ - గావస్కర్ ట్రోఫీ త‌ర్వాతే జట్టులో మార్పులు చోటు చేసుకోవ‌డం ఖాయమ‌ని అంటున్నారు. ఇక రోహిత్ శర్మ, విరాట్ కోహ్లీ, రవీంద్ర జడేజా వంటి సీనియర్ ఆట‌గాళ్ల‌కు ఇదే చివ‌రి ఆస్ట్రేలియా టూర్ కావొచ్చన‌ని క్రిక్బజ్ నివేదిక పేర్కొంది. భారత క్రికెట్ భ‌విష్య‌త్తును దృష్టిలో ఉంచుకుని జ‌ట్టు మేనేజ్‌మెంట్ నిర్ణ‌యాలు తీసుకునే అవకాశం ఉందని తెలుస్తోంది.
రిటైర్మెంట్ ఇయర్గా 2025
"2025లో భారత జట్టులో చాలా మార్పులు ఉంటాయి. బహుశా వచ్చే ఏడాది ఇంగ్లాండ్ పర్యటన నాటికి టీమ్ ఇండియా సీనియర్లు తమ భవితవ్యంపై ఓ క్లారిటీకి వచ్చే అవకాశం ఉంది. 2008లో సౌరభ్ గంగూలీ, అనిల్ కుంబ్లే ఒకే సిరీస్ తర్వాత రిటైర్మెంట్ తీసుకున్నట్లుగానే 2025 భారత క్రికెట్లో రిటైర్మెంట్ సంవత్సరం కావచ్చు." అని క్రిక్ బజ్ ఓ నివేదికలో తెలిపింది.
ఇప్పటికే టీ20కి గుడ్ బై
కాగా, టీమ్ ఇండియా క్రికెటర్లు రోహిత్ శర్మ, విరాట్ కోహ్లీ, రవీంద్ర జడేజా ఈ ఏడాది జరిగిన పొట్టి ప్రపంచ కప్ తర్వాత అంతర్జాతీయ టీ20 ఫార్మాట్కు గుడ్ బై చెప్పారు. ప్రస్తుతం వన్డే, టెస్టు ఫార్మాట్లలోనే ఈ ముగ్గురు టీమ్ ఇండియా తరఫున ఆడుతున్నారు.
బోర్డర్-గావస్కర్ ట్రోఫీలో విఫలం
బోర్డర్- గావస్కర్ ట్రోఫీలో విరాట్ ఒక సెంచరీ చేసినప్పటికీ మిగతా ఇన్నింగ్స్లో అంతగా రాణించలేకపోయాడు. అలాగే మొదటి టెస్టుకు దూరమైన రోహిత్, మిగిలిన రెండు టెస్టుల్లో నిరాశపరిచాడు. జడేజా కూడా తన స్థాయికి తగ్గ ప్రదర్శన చేయలేదు. ఈ నేపథ్యంలో వచ్చే ఏడాది నాటికి అశ్విన్ బాటలోనే వీరందరూ రిటైర్మెంట్ పలకనున్నారని వార్తలు వస్తున్నాయి.
'రెండేళ్లుగా నాకు క్రికెట్ గురించి ఎటువంటి జ్ఞాపకాలు లేవు - అందుకే ఈ రిటైర్మెంట్ అంత బాధగా అనిపించట్లేదు!'
'రెండేళ్లుగా నాకు క్రికెట్ గురించి ఎటువంటి జ్ఞాపకాలు లేవు - అందుకే ఈ రిటైర్మెంట్ అంత బాధగా అనిపించట్లేదు!'
