గంభీర్​ 5 బిగ్ టార్గెట్స్​- 2027పైనే స్పెషల్ ఫోకస్- ఏం చేస్తాడో? - Gautam Gambhir Targets

Gautam Gambhir Targets: టీమ్ఇండియా కొత్త కోచ్ గంభీర్ తన పదవీకాలంలో 5 మేజర్ ఈవెంట్లు ఎదుర్కోనున్నాడు. మరి అవి ఏంటో చూద్దాం.

Gautam Gambhir Targets:టీమ్ఇండియా కొత్త కోచ్​గా ఎంపికైన మాజీ క్రికెటర్ గౌతమ్ గంభీర్ 2027 వరకు ఆ బాధ్యతల్లో కొనసాగనున్నాడు. ఈ మూడేళ్ల కాలంలో గంభీర్ నేతృత్వంలో టీమ్ఇండియా పలు ద్వైపాక్షిక సిరీస్​లతోపాటు కీలకమైన ఐసీసీ ఈవెంట్​లలో పాల్గొననుంది. ఈ నేపథ్యంలో గంభీర్ పదవీకాలంలో తన ముందు 5 మేజర్ టార్గెట్​లు ఉన్నాయి. అవేంటంటే?

మిషన్ 2025:కోచ్​గా ఎంపికైన గంభీర్​పై టీమ్ఇండియా ఫ్యాన్స్​లో భారీ అంచనాలు ఉన్నాయి. అయితే ఈ బాధ్యతలు తీసుకోనున్న గంభీర్ మరో 10 నెలల్లోపే రెండు ఐసీసీ మేజర్ ఈవెంట్​లు ఎదుర్కోనున్నాడు. 2025 ఛాంపియన్స్ ట్రోఫీ, డబ్ల్యూటీసీ ఈవెంట్​లు ప్రస్తుతం గంభీర్ ముందున్న లక్ష్యాలు. అయితే ప్రస్తుతం పటిష్ఠంగా ఉన్న టీమ్ఇండియాకు ఈరెండిట్లో కోచ్​గా వ్యవహరించడం గంభీర్​కు పెద్ద కష్టమేమీ కాకపోవచ్చు.

పైగా టీ20 వరల్డ్​కప్ విజయంతో సీనియర్ జట్టు కూడా మంచి జోష్​లో ఉంది. ఇదే ఊపులో వచ్చే ఏడాది ఛాంపియన్స్ ట్రోఫీ, డబ్ల్యూటీసీ టైటిళ్లూ పట్టేయాలని తహతహలాడుతోంది. కాగా, ఈ రెండు టోర్నమెంట్​లలో టీమ్ఇండియాకు రోహిత్ శర్మే సారథ్యం వహించనున్నట్లు రీసెంట్​గా కన్ఫార్మ్ అయిపోయింది. ఇక రోహిత్- గంభీర్ ఈ మేజర్ ఈవెంట్లపై ఫోకప్ పెట్టాల్సి ఉంది.

కుర్రాళ్లతో 2026 ఛాలెంజింగ్:స్టార్ ప్లేయర్లు రోహిత్ శర్మ, విరాట్ కోహ్లీ, రవీంద్ర జడేజా ఇప్పటికే పొట్ట ఫార్మాట్​కు గుడ్​బై చెప్పేశారు. దీంతో 2026 టీ20 వరల్డ్​కప్​లో టీమ్ఇండియా కుర్రాళ్లతోనే నిండి ఉంటుంది. బుమ్రా, హార్దిక్ పాండ్య మినహా జట్టులో పెద్దగా అనుభవం ఉన్న ప్లేయర్లు ఉండరు. దీంతో అంత పెద్ద ఐసీసీ ఈవెంట్​లో కుర్రాళ్లతో జట్టును నడిపించడం గంభీర్​కు ఛాలెంజింగ్ అనే చెప్పవచ్చు. అయితే ఇప్పట్నుంచే యంగ్ ప్లేయర్లను ఒత్తిడి ఎదుర్కొనే విధంగా తయారు చేస్తే మంచి ఫలితం అందుకోవచ్చు.

2027లో ఫేర్​వెల్!: గంభీర్​కు కోచ్​గా 2027 ఆఖరి ఏడాది. ఈ ఏడాదే గంభీర్​కు అసలైన పరీక్ష ఉండనుంది. వన్డే వరల్డ్​కప్ 2027లోనే ఉంటుంది. వన్డే ప్రపంచకప్​ కోసం టీమ్ఇండియా సుదీర్ఘ ఎదురుచూపులకు ఈ ఎడిషన్​లోనైనా తెరపడాలని ఫ్యాన్స్ భావిస్తున్నారు. 2011 వరల్డ్​కప్ నెగ్గడంలో ప్లేయర్​గా కీలక పాత్ర పోషించిన గంభీర్​కు, 2027లో కోచ్​గా టీమ్ఇండియాను విజేతగా నిలిపేందుకు మంచి అవకాశం దక్కింది. మరి ఈ టోర్నీ నాటికి సీనియర్లు రోహిత్, కోహ్లీ ఉంటారా? అనేది సందేహమే!