'ప్లీజ్ ఇకపై నన్ను కింగ్ అని పిలవొద్దు'- స్టార్ క్రికెటర్ రిక్వెస్ట్

క్రికెట్​లో కింగ్!- తనను ఇకపై అలా పిలవొద్దని స్టార్ క్రికెటర్ రిక్వెస్ట్

King In Cricket : క్రికెట్​లో 'కింగ్' అనగానే ఎవరికైనా టక్కున విరాట్ కోహ్లీనే గుర్తొస్తాడు. అయితే పాకిస్థాన్ జట్టులో మాజీ కెప్టెన్ బాబర్ అజామ్​ను కూడా ఆ దేశ అభిమానులు ముద్దుగా కింగ్ అని పిలుచుకుంటారు. కెరీర్ ప్రారంభంలో బాబర్ నిలకడైన ఆట తీరుతో ఆకట్టుకున్నాడు. కీలక ఇన్నింగ్స్​లతో కొద్ది కాలంలోనే కీలక ప్లేయర్​గా ఎదిగాడు. కానీ, కొంతకాలంగా బాబర్ దారుణంగా విఫలమవుతున్నాడు. ఈ నేపథ్యంలో అతడు అభిమానులకు, మీడియాకు ఓ ఆసక్తికరమైన విజ్ఞప్తి చేశాడు. ఇక నుంచి తనను కింగ్ అని పిలవొద్దని కోరాడు.

ఒకప్పుడు నిలకడకు మారు పేరైన బాబర్ ఆజామ్ ప్రస్తుతం పేలవ ఫామ్‌తో ఇబ్బంది పడుతున్నాడు. గతంలో నిలకడైన బ్యాటింగ్‌తో పరుగుల వరద పారించిన బాబర్, మూడేళ్లుగా ఫామ్​లేమితో తంటాలు పడుతున్నాడు. 2022 డిసెంబర్‌లో టెస్టుల్లో చివరిసారి సెంచరీ చేసిన బాబర్, వన్డేల్లో 2023 ఆగస్టులో శతకం బాదాడు.

ఆ తర్వాత నిలకడలేమి ఆటతో ఇబ్బంది పడుతున్నాడు. ఐసీసీ ఛాంపియన్స్ ట్రోఫీ 2025కి ముందు సౌతాఫ్రికా, న్యూజిలాండ్‌తో జరుగుతున్న ముక్కోణపు సిరీస్‌లోనూ బాబర్ ఆజామ్ తన పేలవ ఫామ్‌ కొనసాగిస్తున్నాడు. రెండు ఇన్నింగ్స్‌ల్లో అతడు 16.50 సగటుతో 33 పరుగులు మాత్రమే చేశాడు. ఈ నేపథ్యంలో బాబర్ ఆజామ్ ఫ్యాన్స్, మీడియాకు తనను కింగ్ అని పిలవొద్దని విజ్ఞప్తి చేశాడు.

ప్లీజ్ అలా పిలవొద్దు
'దయచేసి నన్ను కింగ్ అని పిలవద్దు. నేను కింగ్ కాదు. ప్రస్తుతం నేను ఆ స్థితిలో లేను. నాపై కొత్త బాధ్యతలు ఉన్నాయి. గతంలో నేను చేసిన పరుగులు, రికార్డులు అన్నీ గతమే. ఇప్పుడు ప్రతీ మ్యాచ్‌ తాజా సవాలే. నేను వార్తమానంతో పాటు భవిష్యత్తుపై ఫోకస్ పెట్టాలి. అని బాబర్ మీడియాతో వ్యాఖ్యానించాడు.

𝗕𝗮𝗯𝗮𝗿 𝗔𝘇𝗮𝗺 - 🗣️🗣️ " please stop calling me the king. i am not like that. i need to forget the past and look ahead. i need to focus on the present."#BabarAzam #PakistanCricket pic.twitter.com/mP6SXXfD84

— Cricket Insight • (@_CricketInsight) February 13, 2025

క్రికెట్​లో 'కింగ్'
టీమ్ఇండియా రన్ మెషీన్ విరాట్ కోహ్లీని కింగ్ అని ఫ్యాన్స్ పిలుచుకుంటారు. ఆస్ట్రేలియాలో నివసిస్తున్న కునాల్ గాంధీ అనే భారతీయ క్రికెట్ అభిమాని గతంలో ఓ ఇంటర్వ్యూలో కోహ్లీ గురించి గొప్పగా చెప్పడానికి అతడిని 'కింగ్' అని అభివర్ణించాడు. అప్పటి నుంచి కోహ్లీని అభిమానులు కింగ్​గా పిలుస్తున్నారు.