ప్రజా సంక్షేమమే ధ్యేయంగా జాతీయ మేనిఫెస్టో : కిషన్​ రెడ్డి - Kishan Reddy on BJP Manifesto 2024

Kishan Reddy on BJP Manifesto 2024 : ప్రజా సంక్షేమమే ధ్యేయంగా సంకల్ప పత్ర పేరుతో బీజేపీ జాతీయ మేనిఫెస్టో రిలీజ్​ చేసినట్లు కేంద్రమంత్రి, రాష్ట్ర బీజేపీ చీఫ్​ కిషన్‌రెడ్డి ఉద్ఘాటించారు. రాష్ట్ర పార్టీ కార్యాలయంలో మేనిఫెస్టోను వివరించిన ఆయన, జనగణన పూర్తయ్యాక చట్ట సభల్లో మహిళా రిజర్వేషన్లు అమలు చేస్తామని వెల్లడించారు. ఈ క్రమంలోనే కాంగ్రెస్‌, బీఆర్ఎస్​ పార్టీలు ఇచ్చిన హామీలను అమలు చేయలేదని దుయ్యబట్టారు.

Kishan Reddy on BJP Manifesto 2024 : పేదలు, మహిళలు, యువత, రైతులే లక్ష్యంగా వచ్చే ఐదేళ్లు పనిచేయాలనే సంకల్పం తీసుకున్నట్లు కేంద్రమంత్రి, బీజేపీ రాష్ట్ర అధ్యక్షుడు కిషన్‌రెడ్డి వెల్లడించారు. దేశాన్ని గ్లోబల్‌ మాన్యూఫాక్చరింగ్‌ హబ్‌గా తీర్చిదిద్దుతామని రాష్ట్ర పార్టీ కార్యాలయంలో తెలిపారు. పార్లమెంట్ ఎన్నికల(Parliament Election) కోసం బీజేపీ సంకల్ప పత్రాన్ని విడుదల చేసిందన్న కేంద్రమంత్రి, 1980నుంచి ప్రజా సంక్షేమమే ధ్యేయంగా మేనిఫెస్టోను విడుదల చేస్తున్నామని వివరించారు.

నాంపల్లిలోని పార్టీ కార్యాలయంలో బీజేపీ మేనిఫెస్టోను వివరించిన ఆయన, మహిళలకు 33 శాతం రిజర్వేషన్‌, స్వయం సహాయక సంఘాల బలోపేతం సహా పేపర్ల లీకేజీలు అడ్డుకునేలా చర్యలు తీసుకుంటామని పేర్కొన్నారు. వచ్చే ఐదేళ్లలో పేదలకు 3కోట్ల ఇళ్లు కట్టిస్తామన్న కిషన్‌రెడ్డి, తెల్లరేషన్‌ కార్డు(Ration Card) లేని మధ్య తరగతి కుటుంబాల్లో సీనియర్ సిటిజన్స్‌కు ఆయుష్మాన్ భారత్‌ అందించనున్నట్లు వివరించారు. గిగ్‌ వర్కర్ల కుటుంబాలకు ఈ-శ్రమ్‌ కార్డు కింద ఇన్సూరెన్స్‌, విద్యా, ఆరోగ్య సౌకర్యాలు కల్పిస్తామని హామీ ఇచ్చారు.

"ఈరోజు భారతదేశం, యూకే వంటి దేశాలను వెనుకకు నెట్టేసి ఐదో స్థానంలో ఉన్నాము. రానున్న రోజుల్లో ఐదో శక్తిగా ఉన్నటువంటి భారత్​ను, మూడో శక్తిగా ప్రపంచంలో అతిపెద్ద ఆర్థిక వ్యవస్థ కలిగినటువంటి దేశంగా తీసుకొస్తాం. అదేవిధంగా ఇండియాను వచ్చే ఐదేళ్లలో గ్లోబల్‌ మ్యానుఫ్యాక్చరింగ్‌ హబ్‌గా తీర్చిదిద్దే సంకల్పాన్ని తీసుకున్నాం. దీనిద్వారా ఎంప్లాయిమెంట్​ జనరేషన్ పెద్ద ఎత్తున పెరిగే అవకాశం ఉంది."-కిషన్​రెడ్డి, బీజేపీ రాష్ట్ర అధ్యక్షుడు

రేపు బీజేపీ కార్యాలయంలో రైతు దీక్ష : ముద్ర లోన్స్‌ పరిమితి రూ.20 లక్షలకు పెంచనున్నట్లు కిషన్‌రెడ్డి తెలిపారు. అదేవిధంగా అతిపెద్ద ప్రజాస్వామ్య భారతదేశంలో ఎన్నికల వ్యవస్థకు సంబంధించి వన్ నేషన్, వన్ ఎలక్షన్ (One Nation-One Election) అవసరమని వివరించారు. రైతులకు న్యాయం చేయాలని డిమాండ్ చేస్తూ రేపు పార్టీ కార్యాలయంలో దీక్ష చేపడుతున్నట్లు కేంద్రమంత్రి కిషన్​రెడ్డి వెల్లడించారు. రేవంత్ రెడ్డి కొత్తగా రుణాలు తీసుకోవాలని, అధికారంలోకి వచ్చిన తర్వాత మాఫీ చేస్తామన్నారని ఇప్పుడెందుకు చేయడం లేదని మండిపడ్డారు.

పెట్రోల్‌, డీజిల్‌ ధరలు తగ్గించని ప్రభుత్వం ఏదైనా ఉందంటే అది తెలంగాణ ప్రభుత్వమేనని ధ్వజమెత్తారు. రాష్ట్రంలో అధికారంలో ఉన్న హస్తం పార్టీ (Congress Party), గత పదేళ్లు పాలించిన బీఆర్ఎస్ పార్టీలు​ ఇచ్చిన హామీలను అమలు చేయలేదని కిషన్‌రెడ్డి దుయ్యబట్టారు. కాంగ్రెస్‌ నేతలకు బ్యాంకులను మోసం చేసే అలవాటు ఉందన్న ఆయన, కుటుంబ పార్టీ, అవినీతి అంశాల్లో కాంగ్రెస్‌తో బీజేపీ పోటీ పడలేదని వ్యాఖ్యానించారు.