Telangana Style Vankaya Pachi Karam Recipe : చాలా మంది ఇష్టంగా తినే రెసిపీలలో ఒకటి గుత్తొంకాయ. అయితే, మీరు ఇప్పటి వరకు వంకాయతో ఎన్నో రకాల రెసిపీలు ట్రై చేసి ఉంటారు. కానీ, ఓసారి ఇలా తెలంగాణ స్టైల్లో "వంకాయ పచ్చికారం" ప్రిపేర్ చేసుకొని చూడండి. టేస్ట్ అద్భుతంగా ఉండి.. తిన్నాకొద్దీ తినాలనిపిస్తుంది. పైగా దీన్ని ప్రిపేర్ చేసుకోవడం కూడా చాలా సులువు! మరి, అందుకు కావాల్సిన పదార్థాలేంటి? తయారీ విధానం ఏంటో ఈ స్టోరీలో తెలుసుకుందాం.
కావాల్సిన పదార్థాలు :
- తెల్ల గుత్తొంకాయలు - 8 నుంచి 10
- పల్లీలు - పావు కప్పు
- మెంతులు - పావు చెంచా
- జీలకర్ర - 1 టీస్పూన్
- తెల్ల నువ్వులు - 1 టేబుల్స్పూన్
- నూనె - పావు కప్పు
- కొత్తిమీర తరుగు - కొద్దిగా
ఆనియన్ పేస్ట్ కోసం :
- నూనె - 1 టేబుల్స్పూన్
- ఉల్లిపాయ - 1(పెద్ద సైజ్ది)
- పచ్చిమిర్చి - రుచికి తగినన్ని
- పసుపు - అరటీస్పూన్
- పచ్చికొబ్బరి ముక్కలు - ముప్పావు కప్పు
- పెరుగు - పావు కప్పు
- అల్లంవెల్లుల్లి పేస్ట్ - 1 టీస్పూన్
తయారీ విధానం :
- ఇందుకోసం ముందుగా రెసిపీలోకి కావాల్సిన ఉల్లిపాయను సన్నగా తరిగి పక్కన పెట్టుకోవాలి. అలాగే, గుత్తొంకాయలను శుభ్రంగా కడిగి తొడిమె వైపు కాకుండా కింది వైపు నుంచి నాలుగు భాగాలుగా చీల్చుకొని రెడీగా ఉంచుకోవాలి.
- ఇప్పుడు స్టౌపై కడాయి పెట్టుకొని మెంతులు, పల్లీలను వేసి మంచిగా వేయించుకోవాలి. అవి వేగాక జీలకర్ర వేసుకొని వేయించాలి. ఆ తర్వాత నువ్వులు కూడా వేసి చిటపటమనే వరకు వేయించుకొని దింపేసుకోవాలి.
- ఆ తర్వాత మిక్సీ జార్ తీసుకొని అందులో వేయించుకున్న పల్లీల మిశ్రమాన్ని వేసుకొని మెత్తని పొడిలా గ్రైండ్ చేసుకొని పక్కన ఉంచుకోవాలి.
- అనంతరం ఆనియన్ పేస్ట్ ప్రిపేర్ చేసుకోవాలి. దీనికోసం మళ్లీ స్టౌపై అదే కడాయి పెట్టుకొని ఆయిల్ వేసుకోవాలి. నూనె వేడయ్యాక సన్నని ఉల్లిపాయ తరుగు, పచ్చిమిర్చిచీలికలు వేసుకొని ఆనియన్స్లోని పచ్చివాసన పోయేంత వరకు వేయించుకోవాలి.
- ఇప్పుడు మిక్సీ జార్ తీసుకొని అందులో వేయించుకున్న ఉల్లిపాయ మిశ్రమం, పసుపు, పచ్చికొబ్బరి ముక్కలు, పెరుగు, అల్లంవెల్లుల్లి పేస్ట్ వేసుకోవాలి. ఆపై తగినన్ని వాటర్ యాడ్ చేసుకొని మెత్తని పేస్ట్లా మిక్సీ పట్టుకొని పక్కన పెట్టుకోవాలి.
- ఆ తర్వాత స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక అందులో ముందుగా సిద్ధం చేసుకున్న వంకాయలను వేసి మూతపెట్టి మీడియం ఫ్లేమ్ మీద అవి మెత్తబడే వరకు ఉడికించుకోవాలి.
- వంకాయలు మెత్తగా మగ్గాయనుకున్న తర్వాత ముందుగా మిక్సీ పట్టుకున్న ఉల్లిపాయ పేస్ట్, పల్లీల పొడి, రుచికి సరిపడా ఉప్పు వేసి ఒకసారి మొత్తం కలిసేలా చక్కగా కలుపుకోవాలి.
- ఆ తర్వాత 200ఎంఎల్ వాటర్ యాడ్ చేసుకొని కలిపి మూతపెట్టి మీడియం ఫ్లేమ్ మీద మధ్యమధ్యలో గరిటెతో కలుపుతూ కర్రీ దగ్గర పడేంత వరకు ఉడికించుకోవాలి.
- అయితే, మిశ్రమాన్ని మరీ దగ్గరగా మారేంత వరకు ఉడికించుకోకుండా కాస్త జారుడుగా ఉన్నప్పుడే కొత్తిమీర తరుగు వేసుకొని కలిపి దింపేసుకుంటే చాలు. అంతే.. ఎంతో రుచికరంగా ఉండే తెలంగాణ స్టైల్ "వంకాయ పచ్చికారం" రెడీ!
- దీన్ని వేడివేడి అన్నం, జొన్నరొట్టెలు, చపాతీలు ఇలా దేనిలోకి తిన్నా ఆ టేస్ట్ వేరే లెవల్లో ఉంటుంది. మరి, నచ్చిందా అయితే మీరు ఓసారి ఈ స్టైల్లో వంకాయ కర్రీని చేసుకోండి!
ఇవీ చదవండి :
లేత వంకాయలతో "కమ్మని గుజ్జు కూర" - మీరు తప్పకుండా ట్రై చేయాల్సిందే!
చూస్తేనే నోరూరిపోయే "వంకాయ పచ్చడి" - ఈ కొలతలతో చేసుకున్నారంటే అద్భుతః అనాల్సిందే!
