తెలంగాణ స్టైల్​ "వంకాయ కొత్తిమీర కారం" - కిర్రాక్​ టేస్ట్​తో అన్నం, చపాతీల్లోకి సూపర్​ కాంబినేషన్​!

-వంకాయలతో రొటీన్​ కర్రీలు బోర్​ -ఇలా ప్రిపేర్​ చేయండి సూపర్​గా ఉంటుంది

How to Make Brinjal Kothimeera Karam:కూరల్లో రారాజు.. వంకాయ. అందుకే వీటితో ఎన్ని రకాల కూరలు చేసినా "ఆహా ఏమి రుచి అనరా మైమరచి" అంటూ పాడుకుంటూ లొట్టలేసుకుని తింటుంటారు. ఇక వంకాయతో ఎన్ని వెరైటీలు చేసినా అస్సలు బోర్​ కొట్టదు. ఇంకా ఎప్పటికప్పుడు సరికొత్తగా చేయాలని ఆలోచిస్తుంటారు. మరి మీరు కూడా అలానే ఆలోచిస్తున్నారా? అయితే మీ కోసం అద్దిరిపోయే "వంకాయ కొత్తిమీర కారం" రెసిపీ తీసుకొచ్చాం. చాలా తక్కువ పదార్థాలతో అతి తక్కువ సమయంలో అద్దిరిపోయే రుచితో ఈ రెసిపీని ప్రిపేర్​ చేసుకోవచ్చు. ఇది కేవలం అన్నంలోకి మాత్రమే కాదు చపాతీ, పూరీల్లోకి కూడా పర్ఫెక్ట్​ కాంబినేషన్​. మరి ఈ రెసిపీ తయారీకి కావాల్సిన పదార్థాలు, ప్రిపరేషన్​ విధానం ఈ స్టోరీలో తెలుసుకుందాం..

కావాల్సిన పదార్థాలు:

కారం కోసం:

పచ్చిమిర్చి - 6

కొత్తిమీర కట్ట - ఒకటి

జీలకర్ర - 1 టీ స్పూన్​

వాటర్​ - 1 టేబుల్​ స్పూన్​

కర్రీ కోసం:

నూనె -3 టేబుల్​ స్పూన్లు

వంకాయలు - అర కిలో

ఉప్పు - రుచికి సరిపడా

నీళ్లు - 75ml

పసుపు - పావు చెంచా

తయారీ విధానం:

• ముందుగా వంకాయలను శుభ్రంగా కడిగి సన్నగా, పొడుగ్గా కట్​ చేసుకోవాలి. ఇలా కట్​ చేసుకున్న వంకాయ ముక్కలు నల్లగా మారకుండా ఓ గిన్నెలోకి ఉప్పు, నీళ్లు పోసి కలిపి అందులో వీటిని వేసుకుని పక్కన పెట్టాలి..
• ఇప్పుడు పచ్చిమిర్చి కారం ప్రిపేర్​ చేసుకోవాలి. అందుకోసం మిక్సీ జార్​లోకి పచ్చిమిర్చి, కాడలతో సహా కొత్తిమీర, జీలకర్ర, నీరు పోసి మెత్తగా పేస్ట్​ చేసుకుని పక్కన ఉంచాలి. కావాలంటే ఈ పేస్ట్​ను రోట్లో కూడా దంచుకోవచ్చు. ఇలా రోట్లో దంచితే రుచి అద్దిరిపోతుంది.
• స్టవ్​ ఆన్​ చేసి పాన్ పెట్టి నూనె పోసి వేడి చేసుకోవాలి. ఆయిల్​ హీటెక్కిన తర్వాత కట్​ చేసిన వంకాయ ముక్కలు వేసి కలిపి మూత పెట్టి మీడియం ఫ్లేమ్​లో ఓ 5 నిమిషాలు మగ్గించుకోవాలి.
• ఆ తర్వాత రుచికి సరిపడా ఉప్పు, నీళ్లు, పసుపు వేసి కలిపి మూత పెట్టి నీళ్లు ఇంకి నూనె పైకి తేలేంతవరకు ఫ్రై చేసుకోవాలి.
• ఆ తర్వాత పచ్చిమిర్చి కొత్తిమీర పేస్ట్​ను వేసి బాగా కలిపి కారం పచ్చి వాసన పోయే వరకు మూత పెట్టి ఉడికించుకోవాలి.
• పచ్చి వాసన పోయిన తర్వాత స్టవ్​ ఆఫ్​ చేసి సర్వ్​ చేసుకుంటే సూపర్​ టేస్టీగా ఉండి నిమిషాల్లో ప్రిపేర్​ అయ్యే వంకాయ కొత్తిమీర కారం రెడీ. నచ్చితే మీరూ ఓసారి ట్రై చేయండి.