Potato Household Uses: దుంపజాతికి చెందిన కూరగాయల్లో బంగాళ దుంప ఒకటి. దీనినే ఆలుగడ్డ, ఉర్లగడ్డ, పొటాటో అని వివిధ పేర్లతో పిలుస్తారు. బంగాళదుంపలతో చేసిన వంటకాలను దాదాపు అందరూ ఇష్టపడతారు. చాలా మంది ఎంతో ఇష్టంగా ఆలూతో చేసిన కూరలు, స్నాక్స్ ఆరగిస్తూ ఉంటారు. ఇక పిల్లలైతే కనీసం వారానికి ఓ రెండుమాడు సార్లు అయినా పొటాటో కర్రీ చేయమని గోల చేస్తుంటారు. ఇలా ఇది మన రోజువారి జీవితాల్లో భాగం అయ్యింది. అయితే ఆలుగడ్డతో కేవలం కూరలు, తదితర వంటకాలు మాత్రమే కాకుండా ఎన్నో రకాలుగా దీనిని వాడొచ్చు. మరి ఆ ప్రయోజనాలు ఇప్పుడు చూద్దాం..
బంగారు, వెండి వస్తువులు: బంగాళదుంపలను ఉడకబెట్టిన నీళ్లను కొన్ని తీసుకుని అందులో చెంచా డిటర్జెంట్‌ పౌడర్‌ వేయాలి. దీంట్లో నగలను వేసి ఒక గంటపాటు నాననివ్వాలి. ఆ తర్వాత వాటిని టూత్‌ బ్రష్తో మృదువుగా రుద్దితే కొత్తవాటిలా మెరుస్తాయి. ఇక వెండి ఆభరణాలు వంటివి కొన్నాళ్లకు నల్లబడి పోతుంటాయి. వాటిని తిరిగి తెల్లగా మార్చటం కోసం.. బంగాళ దుంపలు ఉడకించిన నీళ్లల్లో వెండి వస్తువుల్ని కాసేపు ఉంచి తరువాత బ్రష్తో శుభ్రం చేసుకోవాలి. ఇలా చేస్తే నల్ల బడ్డ వెండి వస్తువులు తళతళ మెరుస్తాయని అంటున్నారు.
ఐరన్: తుప్పుపట్టిన స్టీలు, ఐరన్ పాత్రలను తిరిగి కొత్తవాటిలా మార్చటంలో బంగాళ దుంప బాగా పనిచేస్తుంది. అందుకోసం బంగాళ దుంపను కొంచెం మందంగా కట్ చేసి.. సోప్ లిక్విడ్లో ముంచి తుప్పు పట్టినపాత్రలపై రుద్ది.. ఆ తర్వాత మంచి నీటితో కడిగేస్తే క్షణాల్లోనే తుప్పు తొలగిపోతుందని అంటున్నారు. అలాగే కటింగ్ కోసం ఉపయోగించే కత్తులు వంటివి తుప్పు పట్టిననప్పుడు.. దానిని వదిలించుకునేందుకు బంగాళ దుంప ముక్కను వాటిపై రుద్ది 5నిమిషాలు ఉంచాక నీటితో కడగి పొడి వస్త్రంతో తుడిస్తే కొత్తవాటిలా మెరవడంతో పాటు పదనుగా ఉంటాయని అంటున్నారు.
మాడిన గిన్నెలు: కొన్ని సందర్భంలో గిన్నెలు మాడి నల్లగా తయారవుతుంటాయి. అలాంటప్పుడు బంగాళదుంప ముక్కను నిమ్మరసంలో ముంచి మాడిన ప్రదేశాల్లో రుద్దాలి. అరగంట తరువాత వాటిని సబ్బునీటితో రుద్ది కడిగితే మాడిన మరకలు పోతాయంటున్నారు.
మిర్రర్స్: ఇంట్లో ఉండే డ్రస్సింగ్ మిర్రర్లు, గ్లాస్ కిటికీలు, కళ్లద్దాలు మసకబారినట్లు కనిపిస్తుంటాయి. అలాంటి సందర్భాల్లో వాటిని శుభ్రం చేయటానికి బంగాళదుంప ముక్కను తీసుకుని రుద్దితే సరిపోతుందని అంటున్నారు. దుంపలోని స్టార్చ్ అద్దాలు మసకబారకుండా చేయటంలో దోహదం చేస్తాయని అంటున్నారు.